Mamata Banerjee: హస్తినకు మమత.. పార్లమెంటు ఘటనపై కామెంట్‌!

కోల్‌కతా:  పశ్చిమబెంగాల్‌ ముఖ్యమంత్రి, తృణమూల్‌ కాంగ్రెస్‌ అధినేత్రి మమతా బెనర్జీ(Mamata Benarjee) దిల్లీకి బయల్దేరారు. విపక్ష పార్టీల కూటమి ‘ఇండియా’ సమావేశంలో పాల్గొనేందుకు ఆమె దేశ రాజధాని నగరానికి పయనమయ్యారు. ఈ సందర్భంగా కోల్‌కతాలోని నేతాజీ సుభాష్‌ చంద్రబోస్‌ అంతర్జాతీయ విమానాశ్రయంలో విలేకర్లతో మాట్లాడారు. ఇటీవల పార్లమెంటులో భద్రతా వైఫల్యంపై దీదీ ఆందోళన వ్యక్తం చేశారు.  ఇది చాలా తీవ్రమైన అంశం, పెద్ద తప్పిదమని పేర్కొన్నారు. ఈ విషయాన్ని కేంద్ర హోంమంత్రి ఇప్పటికే అంగీకరించారన్న దీదీ.. ఈ ఘటనపై విచారణ జరగనివ్వండి అని వ్యాఖ్యానించారు.

పార్లమెంట్‌ ఘటన తీవ్రమైన అంశం.. రాద్ధాంతం అనవసరం: ప్రధాని మోదీ

ఆరోగ్య కేంద్రాలకు కాషాయ రంగు వేయాలన్న కేంద్రం ఆదేశాన్ని మరోసారి ప్రస్తావిస్తూ ప్రజలు ఏం తినాలో, ఏం ధరించాలనే అంశాలను కూడా నిర్ణయించడానికి భాజపా ప్రయత్నిస్తోందని మండిపడ్డారు. మరోవైపు, డిసెంబర్‌ 20న మమతా బెనర్జీ ప్రధాని నరేంద్ర మోదీతో సమావేశం కానున్నారు. బెంగాల్‌కు రావాల్సిన బకాయి నిధులను విడుదల చేయాలని ఈ సందర్భంగా ప్రధానిని కోరనున్నారు.