Australian cricketer: మెడకు తగిలిన బంతి.. మృత్యువుతో పోరాడి ఆసీస్‌ యువ క్రికెటర్ మృతి

ఇంటర్నెట్ డెస్క్: ఆస్ట్రేలియా క్రికెట్‌లో మరో విషాదం చోటుచేసుకుంది. పదకొండేళ్ల కిందట ఫిల్‌ హ్యూస్‌ మైదానంలోనే కుప్పకూలిన ఉదంతం ఇప్పటికీ అక్కడి అభిమానులను కలవరపెడుతోంది. తాజాగా 17 ఏళ్ల ఓ యువ క్రికెటర్ ఇదేతరహాలో ప్రాణాలు కోల్పోవడం గమనార్హం. అయితే, అతడు రెండు రోజులపాటు ఆసుపత్రిలో ఉన్నా ఫలితం లేకుండాపోయింది. 

• చేసిన త్యాగం చాలు.. సూర్యకు వన్‌డౌన్‌ బెస్ట్: ఉతప్ప

మెల్‌బోర్న్‌కు చెందిన బెన్ అస్టిన్ టీ20 మ్యాచ్‌ కోసం సన్నద్ధమవుతున్నాడు. ట్రైనింగ్‌ సెషన్‌లో ప్రాక్టీస్ చేస్తుండగా బంతి అతడి మెడకు బలంగా తగిలింది. దీంతో అతడు కుప్పకూలిపోయాడు. సహచర క్రికెటర్లు హుటాహుటిన ఆసుపత్రికి తరలించారు. ఇది మంగళవారం సాయంత్రం జరిగినట్లు తెలుస్తోంది. దాదాపు రెండు రోజులపాటు మృత్యువుతో పోరాడిన యువ క్రికెటర్‌ గురువారం ఉదయం ప్రాణాలు విడిచినట్లు వైద్యులు తెలిపారు. ప్రాక్టీస్‌ సమయంలోనూ అతడు తలకు హెల్మెట్‌ పెట్టుకొని ఉన్నట్లు అక్కడి క్రికెట్ వర్గాలు తెలిపాయి. 

‘‘బెన్ క్రికెట్‌ కాకుండా ఫుట్‌బాల్ మ్యాచులు ఆడేవాడు. బెన్ ఆకస్మిక మరణం మమ్మల్ని తీవ్రంగా కలచివేసింది. అతడి మృతి మా క్రికెట్ కమ్యూనిటీపై ప్రభావం చూపిస్తుంది. ఈ సందర్భంగా అందరికీ ఓ విజ్ఞప్తి చేస్తున్నాం. ఇలాంటి సమయంలో బెన్ కుటుంబం గోప్యతకు భంగం కలిగించవద్దని కోరుతున్నాం’’ అని ఫెర్న్‌ట్రీ గల్లీ క్రికెట్ క్లబ్‌ ఓ ప్రకటన విడుదల చేసింది.