Virat Kohli: కొత్త ఫోన్ పోయింది.. మీకు ఏమైనా కనిపించిందా..?: విరాట్

ఇంటర్నెట్ డెస్క్‌: టీమ్‌ఇండియా స్టార్‌ బ్యాటర్ విరాట్ కోహ్లీ (Virat Kohli) తన ఫోన్‌ను పోగొట్టుకొన్నాడట. అదీనూ కొత్త మొబైల్‌. ఈ మేరకు తన ట్విటర్‌లో ఆవేదన వ్యక్తం చేస్తూ పోస్టు పెట్టాడు. ‘‘బాక్స్‌లో నుంచి బయటకు కూడా తీయని ఫోన్ పోతే.. దానికంటే బాధాకరమైన ఫీలింగ్‌ మరొకటి ఉండదేమో.. మీలో ఎవరైనా చూశారా..?’’ అని విరాట్ కోహ్లీ ట్వీట్ చేశాడు. దీంతో సోషల్‌ మీడియాలో వైరల్‌గా మారింది. 

కొందరేమో ఇదేదో యాడ్‌ అయి ఉంటుందని కామెంట్‌ చేస్తుండగా.. మరికొందరేమో ఓ ఫోన్ల సంస్థను ట్యాగ్‌ చేస్తూ వెంటనే కోహ్లీకి ఓ మొబైల్‌ పంపించండి.. టెస్టు సిరీస్‌కు ముందు అతడిని ఒత్తిడికి గురి చేయొద్దని సూచించారు. ఇది ఇలా ఉంటే ఫుడ్ డెలివరీ యాప్‌ జొమాటో మాత్రం విచిత్రంగా స్పందించింది. ‘‘వదిన గారి ఫోన్ నుంచి ఐస్‌ క్రీమ్‌ను ఆర్డర్‌ చేసేందుకు మొహమాటం పడొద్దు. ఇప్పుడు అదే మీకు సాయపడుతుంది’’ అని జొమాటో కామెంట్ పెట్టింది. ప్రస్తుతం విరాట్ కోహ్లీ ఆస్ట్రేలియాతో నాలుగు టెస్టుల సిరీస్‌ కోసం సన్నద్ధమవుతున్నాడు. మొన్నటి వరకు కుటుంబంతో గడిపిన విరాట్.. ఇప్పుడు నెట్స్‌లో శ్రమిస్తున్నాడు. ఆసీస్‌పై మంచి రికార్డు ఉన్న విరాట్.. తనదైన ఆటతీరుతో మరోసారి ఆధిక్యం సాధించాలని ఉవ్విళ్లూరుతున్నాడు. ఫిబ్రవరి 9వ తేదీ నుంచి నాగ్‌పుర్ వేదికగా భారత్ - ఆసీస్‌ తొలి టెస్టు మ్యాచ్‌ ప్రారంభం కానుంది.