Virat: ఎవరి అభిప్రాయాలు వారికి ఉంటాయి.. వాటిని దాటుకొని ముందుకు సాగడమే: విరాట్

ఇంటర్నెట్ డెస్క్‌:  భారత మాజీ కెప్టెన్‌, స్టార్‌ బ్యాటర్ విరాట్ కోహ్లీ (Virat Kohli) ఆటపరంగానే కాకుండా వ్యక్తిగతంగానూ అభిమానులకు ఆదర్శంగా ఉంటాడు. ఆటపట్ల నిబద్ధత తారస్థాయిలో ఉంటుంది. ఏ స్థాయి మ్యాచ్‌ అయినా సరే తన జట్టు గెలుపు బాటలోనే పయనించాలనే కోరుకుంటాడు. ఎన్ని అవాంతరాలు ఎదురైనా పోరాడి ముందుకు సాగడమే తన క్రికెట్‌ కెరీర్‌లో నేర్చుకున్న ప్రధాన అంశమని విరాట్ కోహ్లీ వ్యాఖ్యానించాడు. తాజాగా ఓ ఇంటర్వ్యూలో ఆసక్తికర అంశాలను ప్రస్తావించాడు. 

Prithvi shaw: పృథ్వీ!.. ప్రతిభ ఉంటే సరిపోతుందా..?

‘‘వ్యక్తిగతంగా, ఆటపరంగా నా సామర్థ్యాలను నమ్మి ముందుకు సాగడమే నన్నింత వరకు తీసుకురాగలిగింది. బయట ఉంటే ప్రజలకు వారి అభిప్రాయాలు, భావాలు ఉంటాయి. వాటి నుంచి కూడా అవసరమైనవాటిని నేర్చుకుని ముందుకు సాగుతుంటా. నా సామర్థ్యం మీద నమ్మకం ఉంచడం వల్ల ఎన్ని అవాంతరాలు ఎదురైనా దాటుకుని లక్ష్యాలను సాధించగలిగా. ఆత్మవిశ్వాసం ఉన్నత స్థాయిలో ఉండటం వల్లే నా గేమ్‌ మీద దృష్టి పెట్టి నిరంతరం మెరుగయ్యేందుకు ప్రయత్నిస్తుంటా. గతంలో ఏం సాధించాను.. వాటి నుంచి ఏం నేర్చుకుని ముందుకు సాగాలనేదానిపైనే ఆలోచిస్తుంటా. ఆటగాడిగా ఎలాంటి ప్రదేశాల్లో బలహీనంగా ఉన్నానేదానిపై దృష్టిపెట్టి మెరుగయ్యా. వచ్చిన అవకాశాలను సద్వినియోగం చేసుకుని ఘనంగా పునరాగమనం చేయగలిగా’’ అని కోహ్లీ తెలిపాడు. వెస్టిండీస్‌తో టెస్టు సిరీస్‌ మాత్రమే ఆడిన విరాట్ కోహ్లీ వన్డేతోపాటు టీ20 సిరీస్‌ల నుంచి విరామం తీసుకున్నాడు. ఆసియా కప్‌, వన్డే ప్రపంచకప్‌ కోసం సన్నద్ధమవుతున్నాడు.