Womens WC 2025: బలమైన ప్రత్యర్థిని మట్టికరిపించడం సూపర్‌: విరాట్ కోహ్లీ

ఇంటర్నెట్ డెస్క్‌: మహిళల ప్రపంచ క్రికెట్‌లో ఆస్ట్రేలియాకు తిరుగులేదు. ఆ జట్టు ఇప్పటికి ఏడుసార్లు వన్డే ప్రపంచ కప్‌ను నెగ్గింది. ఈసారి కూడా హాట్‌ ఫేవరెట్‌గా బరిలోకి దిగింది. అజేయంగా సెమీస్‌కు చేరుకున్న టీమ్‌కు భారత్‌ అడ్డుగా నిలిచింది. దీనికి కారణం జెమీమా రోడ్రిగ్స్‌ అద్భుత శతకంతోపాటు కెప్టెన్ హర్మన్ ప్రీత్‌ కౌర్ సమయోచిత ఇన్నింగ్స్‌. ఈక్రమంలో టీమ్‌ఇండియాపై సర్వత్రా ప్రశంసల వర్షం కురుస్తోంది. భారత మాజీ కెప్టెన్ విరాట్ కోహ్లీ పోస్టు పెట్టాడు. 

‘‘ఆస్ట్రేలియా వంటి బలమైన ప్రత్యర్థిపై మన జట్టు అద్భుత విజయం సాధించింది. భారీ టార్గెట్‌ను ఛేదించడం తేలికైన విషయం కాదు. ఇలాంటి తీవ్ర ఒత్తిడి ఉన్న మ్యాచ్‌లో  జెమీమా రోడ్రిగ్స్‌ సూపర్‌గా ఆడింది. నమ్మకం, ఆటపై అభిరుచి, గెలవాలనే తపనే ఇందుకు కారణం. వెల్‌డన్‌ టీమ్‌ఇండియా’’ అని విరాట్ పోస్టు చేశాడు.

‘‘జెమీమా రోడ్రిగ్స్‌, హర్మన్‌ ప్రీత్‌ కౌర్ జట్టును ముందుండి నడిపించారు. శ్రీచరణి, దీప్తి శర్మ బంతితో రాణించి మ్యాచ్‌ విజయంలో ముఖ్య భూమిక పోషించారు. ఇలాగే మున్ముందు మరిన్ని విజయాలు సాధించాలని కోరుకుంటున్నా’’ - సచిన్‌ తెందూల్కర్

‘‘ఇది కేవలం మరో సెమీ ఫైనల్‌.. సులువుగా గెలిచేసి ఫైనల్‌కు చేరుకుంటామని ఆసీస్‌ భావించింది. మన అమ్మాయిలు మాత్రం ఇదే నిజమైన సంచలనం సృష్టించే అవకాశం అని భావించారు. వారిపై వచ్చిన విమర్శలను పక్కన పెట్టారు. టీమ్‌ఇండియా ఆటను చూసి ఇప్పుడందరూ గర్వపడుతున్నారు’’ - వీరేంద్ర సెహ్వాగ్

‘‘అసాధారణ ధైర్యం.. అద్వితీయ పోరాటం.. చిరస్మరణీయ ఇన్నింగ్స్‌. మహిళల వన్డే ప్రపంచకప్‌లో మన అమ్మాయిల విజయం అద్భుతం’’ - టీమ్‌ఇండియా కెప్టెన్‌ శుభ్‌మన్‌ గిల్‌