హెచ్‌-4 వీసాదారులకు ఆటోమేటిక్‌గా ఉద్యోగ అనుమతులు

కీలక బిల్లును ఆమోదించనున్న అమెరికా సెనెట్‌

వాషింగ్టన్‌: హెచ్‌-4 వీసాదారులకు శుభవార్త! అమెరికాలో వారికి ఉపాధి దొరకడం ఇకపై సులువుకానుంది. సంబంధిత కీలక బిల్లును సెనెట్‌ త్వరలోనే ఆమోదించనుంది. దీనివల్ల సుమారు లక్ష మందికి లబ్ధి కలగనుంది. హెచ్‌-1బి వీసాదారుల జీవిత భాగస్వాములు, వారి పిల్లలకు (21 ఏళ్లలోపు వయసున్నవారు) హెచ్‌-4 వీసాలు జారీ చేస్తుంటారు. హెచ్‌-4 వీసాదారులు అమెరికాలో ఉద్యోగం చేయాలంటే తప్పనిసరిగా ఎంప్లాయిమెంట్‌ ఆథరైజేషన్‌ డాక్యుమెంట్‌, ఐ-765 కోసం దరఖాస్తు చేసుకోవాలి. ఆ ప్రక్రియ పూర్తయి అనుమతులు వచ్చేందుకు ఏడాది వరకూ సమయం పడుతుంటుంది. దానివల్ల వారు పలు ఉద్యోగావకాశాలు కోల్పోవాల్సి వస్తోంది. ఈ నేపథ్యంలో ప్రస్తుత నిబంధనలను మార్చి.. హెచ్‌-4 వీసాదారులకు ఆటోమేటిక్‌గా ఉద్యోగ అనుమతులు మంజూరయ్యేలా రూపొందించిన బిల్లుకు త్వరలోనే ఆమోదం లభించనున్నట్లు శ్వేతసౌధం ఆదివారం వెల్లడించింది. సెనెట్‌లో ఈ మేరకు రిపబ్లికన్లు, డెమోక్రాట్ల మధ్య అంగీకారం కుదిరినట్లు తెలిపింది. హెచ్‌-1బి వీసాదారుల పిల్లలు 8 ఏళ్లపాటు హెచ్‌-4 వీసాను కలిగి ఉంటే.. వారి వయో పరిమితి ముగిసినప్పటికీ అమెరికాలో కొనసాగుతూ ఉద్యోగం చేసుకునేందుకూ ఈ బిల్లు వీలు కల్పించనుంది. ఈ విధానం కింద రాబోయే అయిదేళ్లపాటు ఏటా 18 వేల మందికి ఉపాధి ఆధారిత గ్రీన్‌కార్డ్‌లను జారీ చేయనున్నారు. జాతీయ భద్రత ఒప్పందం పేరుతో తీసుకొస్తున్న ఈ బిల్లు అమెరికాను బలోపేతం చేయడంతోపాటు సరిహద్దులను సురక్షితంగా మారుస్తుందని దేశాధ్యక్షుడు బైడెన్‌ పేర్కొన్నారు. తాజా బిల్లుతో భారతీయులకు ప్రయోజనం చేకూరనుంది. హెచ్‌-4 వీసాదారులు అమెరికాలో ఉద్యోగం చేసుకొనే అవకాశం కల్పిస్తూ.. 2015లో ఒబామా ప్రభుత్వం నిర్ణయం తీసుకుంది. ట్రంప్‌ అధికారంలోకి వచ్చిన తర్వాత వీటిపై ఆంక్షలు విధించారు.