Military Tank: సైనిక శిక్షణ కేంద్రంలో మాయమై.. తుక్కులో తేలి!

టెల్‌అవీవ్‌: మిలటరీ శిక్షణా కేంద్రంలో కనిపించాల్సిన ఓ భారీ యుద్ధట్యాంకు (Military tank) మాయమైంది. అంతటా గాలించగా.. చివరకు అది ఓ తుక్కు కేంద్రంలో దర్శనమిచ్చింది. ఇజ్రాయెల్‌ (Israel)లో ఈ వ్యవహారం వెలుగుచూసింది. దాదాపు 65 టన్నుల బరువైన ఆ ట్యాంకును అక్కడికి ఎవరు ఎత్తుకెళ్లారనేదానిపై అధికారులు దర్యాప్తు చేస్తున్నారు.

‘మెర్కవా 2 (Merkava 2)’ అనే భారీ యుద్ధట్యాంకు గతంలో ఇజ్రాయెల్‌ సైన్యంలో సేవలందించింది. ప్రస్తుతం దాన్ని తీరప్రాంత నగరమైన హైఫా సమీపంలోని మిలటరీ ట్రైనింగ్‌ జోన్‌కు తరలించారు. అక్కడ సైన్యం శిక్షణ అవసరాలకు వినియోగిస్తున్నారు. ఇటీవల అది అదృశ్యమైనట్లు ఇజ్రాయెల్ సైన్యం గుర్తించింది. ఈ క్రమంలోనే గాలింపు చేపట్టగా.. దూరంగా ఓ తుక్కు కేంద్రంలో దాని ఆచూకీ లభ్యమైంది. ఆ వీడియో వైరల్‌గా మారింది.

ఇక ఆయుధాలివ్వం.. ఉక్రెయిన్‌కు పోలాండ్‌ షాక్‌..!

ఈ యుద్ధట్యాంకు ఏళ్ల క్రితమే సైన్యం నుంచి డీకమిషన్‌ అయ్యిందని ఇజ్రాయెల్‌ సైన్యం తెలిపింది. ప్రస్తుతం అందులో ఆయుధాలేవీ లేవని సైన్యం తెలిపింది. ఈ ఘటనకు సంబంధించి ఇద్దరు అనుమానితులను అరెస్టు చేసినట్లు పోలీసులు తెలిపారు.