విదేశీ వలసదారులంటే భారత్‌కు భయం

 చైనా, రష్యా, జపాన్‌లకు కూడా..: బైడెన్‌

వాషింగ్టన్‌: విదేశీ వలసదారులను తమ దేశంలోకి అనుమతించేందుకు భారత్‌ భయపడుతుందని అమెరికా అధ్యక్షుడు జో బైడెన్‌ అన్నారు. చైనా, రష్యా, జపాన్‌లదీ అదే పరిస్థితి అని పేర్కొన్నారు. అవి వలసదారులను ఎంతమాత్రమూ ఆహ్వానించవని వ్యాఖ్యానించారు. అందుకే వాటి ఆర్థిక వ్యవస్థలు వేగంగా వృద్ధి చెందకుండా ఇబ్బంది పడుతున్నాయన్నారు. అందుకు భిన్నంగా అమెరికా విదేశీ వలసదారులను స్వాగతిస్తుందని.. వారు దేశ ఆర్థిక వ్యవస్థ బలోపేతమయ్యేందుకు కృషి చేస్తుంటారని చెప్పారు. వాషింగ్టన్‌లో బుధవారం సాయంత్రం డెమోక్రాటిక్‌ పార్టీ విరాళాల సేకరణ కార్యక్రమంలో బైడెన్‌ ఈ మేరకు ప్రసంగించారు. అమెరికాకు మిత్రదేశాలైన భారత్‌, జపాన్‌లను తక్కువ చేసేలా ఆయన వ్యాఖ్యలు ఉండటం చర్చనీయాంశమైంది.