మరపురాని ముచ్చట్లు!

ఫీచర్డ్ స్టోరీస్

మరపురాని ముచ్చట్లు!

ఏడ తానున్నాడో బావ జాడ తెలిసినా పోయిరావా.. అందాల ఓ మేఘమాలా! నీవచట కుశలమా?.. నేనిచట కుశలమే.. అంటూ ఎక్కడో దూరంగా ఉన్న ప్రియమైన వారికోసం ఎన్నాళ్లిలా మేఘ సందేశాలు పంపుకోవాలి అని బాధపడుతున్నారా? వాట్సాప్‌లు, వీడియోకాల్స్‌ వచ్చి మాత్రం ఏం లాభం! నీకూనాకూ మధ్య దూరాన్ని పెంచాయి కానీ తగ్గించలేదు. అవన్నీ నీ కొనగోటి స్పర్శ ముందు బలాదూరేగా అంటూ ఎక్కడో ఉన్న ప్రియురాలిని తలచుకుంటున్నారా?అయితే మీరు ఐఓబీ (ఇంటర్‌నెట్‌ ఆఫ్‌ బాడీస్‌) గురించి తెలుసుకోవాల్సిందే. ఒక్క కొనగోటి స్పర్శనేంటి.. ఆమె శ్వాసని... సాన్నిహిత్యాన్ని కూడా దగ్గరగా అనుభవించొచ్ఛు మారుతున్న సాంకేతిక పరిజ్ఞానం మనుషుల మధ్య సంబంధాలని ఏ తీరాలకు చేరుస్తుందో తెలుసుకుందాం..

ఇంటికి దూరంగా ఉన్నారు. అయినా సరే స్మార్ట్‌ పరికరాల సాయంతో ఇంట్లో లైట్లు ఆఫ్‌ చేయగలరు. ఏసీ ఆన్‌ చేయగలరు. వంట వండేయగలరు. ఎండిపోతున్న మొక్కలకు నీళ్లు పోయగలరు. ఇవన్నీ ఐఓటీ (ఇంటర్‌నెట్‌ ఆఫ్‌ థింగ్స్‌)తో సాధించిన విజయాలు. మరి దూరాన ఉన్న మీ శ్రీమతిని దగ్గరకు తీసుకోవాలనిపిస్తే? శ్రీవారి బుగ్గమీద చిటికేసి ప్రేమగా ముద్దాడాలనిపిస్తే? పలకరింపు వరకూ ఓకేకానీ... తాకడం అయ్యేపనేనా? అనే అనుమానం కలుగుతోంది కదూ! ఐఓబీ, టెలీడిల్‌డానిక్స్‌, హెప్టిక్‌ టెక్నాలజీలతోపాటు సెక్స్‌రోబోట్స్‌ వంటి ఆధునిక సాంకేతిక పరిజ్ఞానాలు ఈ దూరాలని దగ్గర చేస్తున్నాయి.

మర మనిషితో ముచ్చట్లు: ఆ మధ్య జపాన్‌లో హకీహికో అనే అబ్బాయి ‘మికు’ అనే అమ్మాయిని పెళ్లాడాడు. పెళ్లి చేసుకోవడంలో వింత లేదు. కానీ ఆ పెళ్లికూతురు ఓ యంత్రం కావడమే వింత. ‘ఇందులో వింతేముంది? మికు నా ఆఫీస్‌ వ్యవహారాలన్నీ చక్కబెడుతుంది. నేను చేయాల్సిన పనులని ఎప్పటికప్పుడు గుర్తుచేస్తుంది. ఇంతకంటే ఏం కావాలి’ అన్నాడు హికో. చూస్తుంటే... ఇంతవరకూ ఉన్న భార్యభర్తల బంధం మారి యంత్రం, మనిషి భాగస్వామ్యం వచ్చేట్టుగా కనిపిస్తోంది కదూ! దానికి కారణం... రోజురోజుకి సెక్స్‌బాట్స్‌ పట్ల యువత పెంచుకుంటున్న వ్యామోహమే. రెండేళ్ల క్రితం బ్రిటన్‌లో జరిగిన ఓ సర్వేలో 18 నుంచి 34 సంవత్సరాల మధ్య వయసు ఉన్న 26 శాతం మంది యువత అచ్చంగా మనుషుల్లా కనిపించే హ్యూమనాయిడ్‌ రోబోలని వివాహం చేసుకోవడానికి సుముఖత చూపించారట. ‘హవ్వ! రోబోట్‌లతో కాపురమేంటి’ అని మీరు అనుకోవచ్ఛు ఉద్యోగాలు, సంపాదన, ఒత్తిడి... భాగస్వామి కోసం సమయం కేటాయించలేని పరిస్థితి వంటివన్నీ ఇలా రోబో భాగస్వాములపై దృష్టిసారించేట్టు చేశాయి.●

ఒత్తిడి, అనారోగ్య సమస్యలతో తలెత్తే లైంగిక పరమైన సమస్యలకు రిమోట్‌ సెక్స్‌ పరిజ్ఞానం ఒక దారి చూపించే అవకాశం ఉందని అంటున్నారు శాస్త్రవేత్తలు. ఉద్యోగం, సంపాదన అంటూ పరుగులు పెట్టే యువతకు భాగస్వామితో ఎలా ప్రేమగా నడుచుకోవాలో తెలియడం లేదు. అటువంటి వారికి ఈ పరిజ్ఞానాన్ని ఉపయోగించి వైద్యం, కౌన్సెలింగ్‌ వంటివి ఇవ్వొచ్చని అంటున్నారు నిపుణులు.

రియల్‌డాల్స్‌ హర్మోనీ సంస్థ యువతలో లైంగిక అవగాహన తీసుకొచ్చే రోబోలని తయారుచేసింది. ఇవి ప్రేమగా పలకరిస్తాయి. ముద్దుముచ్చట్లెన్నో పంచుకుంటాయి. మాటల్లో భాగస్వామికి నచ్చిన విషయాలని గ్రహించేసి మళ్లీ మాట్లాడినప్పుడు వాటిని గుర్తుచేసి ఆశ్చర్యానికి గురిచేస్తాయి.

కృత్రిమమేధ ఇచ్చే భాగస్వామి: ప్రేమలో అవతలి వ్యక్తిని వారి లోపాలు సహా యథాతథంగా స్వీకరించాలని అంటారు. అలా రాజీపడలేని వారు జీవితాంతం ఒంటరిగా ఉండిపోవాల్సిందేనా? ఉండాల్సిన అవసరం లేదు అంటున్నారు డేవిడ్‌లెవీ అనే బ్రిటన్‌ శాస్త్రవేత్త. కృత్రిమమేధ సాయంతో వ్యక్తుల ఇష్టాయిష్టాలను పూర్తిగా తెలుసుకుని అందుకనుగుణంగా భాగస్వామి రోబోలని తయారుచేయొచ్ఛు వాటితో హాయిగా కాపురం చేయొచ్చునంటున్నాడు డేవిడ్‌లెవీ.

గుండెచప్పుడు వింటూ: ‘ప్రియా గుండెల్లో నువ్వే..’ అంటూ మీ ప్రియమైన వారికి పదేపదే కవితలు చెప్పాల్సిన అవసరం లేదు, ‘పిల్లోటాక్స్‌’ పరికరం మీ చేతిలో ఉంటే! కావాలంటే మీ హృదయ సవ్వడిని నేరుగా వినిపించేయడమే. అదెలా అంటారా? ఎంత దూరాన ఉన్నా సరే.. నిద్రలోనూ మీ గుండె చప్పుడుని మీ భాగస్వామికి చేరవేసి హాయిగా సేదతీరుస్తుంది పిల్లో టాక్స్‌ పరికరం. మీ చేతికి ఒక రిస్ట్‌ బ్యాండ్‌ పెట్టుకుని.. స్పీకర్‌ని మీ దిండు కింద పెట్టుకుని తలవాల్చి పడుకుంటే చాలు. తెల్లవార్లూ ఆ గుండెచప్పుళ్ల సవ్వడిలోనే హాయిగా నిద్రపోవచ్ఛు దూరాలని జయించవచ్ఛు

హెప్టిక్‌ టెక్నాలజి

త్రీడీ ప్రపంచంలో అడుగు పెట్టినప్పుడు ఒక్క నిమిషం ఎదురుగా కనిపించేదంతా ‘నిజమేనా’ అనే అనుభూతికి లోనవుతాం. వర్చువల్‌ రియాలిటీ ప్రపంచంలో అయితే ఇంకాస్త ముందుకెళ్లి మరిన్ని వాస్తవాల్లాంటి అనుభూతులు పోగుచేసుకుంటాం. ఈ అనుభూతులకు ‘స్పర్శ’ అనే మరో కొత్త అద్భుతాన్ని కూడా జోడిస్తే? అదే హెప్టిక్‌ టెక్నాలజీ. దూరాన ఉన్న ప్రేయసీప్రియులని దగ్గర చేయడానికీ, వారి మధ్య సాన్నిహిత్యాన్ని పెంచడానికీ ఇప్పుడీ టెక్నాలజీ అద్భుతంగా ఉపయోగపడుతుందని అంటున్నారు శాస్త్రవేత్తలు. హెప్టిక్‌ అంటే స్పర్శ అని అర్థం. మొదట్లో అంధులకు స్పర్శజ్ఞానం అందించడం కోసం, వైద్యులు సర్జరీలు చేయడం కోసం తయారు చేసిన ఈ టెక్నాలజీ ఇప్పుడు అంతకుమించిన ప్రయోజనాలతో దూసుకుపోతోంది. వర్చువల్‌ రియాలిటీ ప్రపంచంలో అడుగుపెట్టినప్పుడు అక్కడున్న మీ భాగస్వామి మిమ్మల్ని ఆప్యాయంగా కౌగిలించుకుంటే? ఆ స్పర్శ అచ్చంగా వాస్తవంగా అనిపిస్తే? దక్షిణ కొరియా శాస్త్రవేత్తలు తయారుచేసిన తేలికపాటి చేతి గ్లౌజులు... ఎంత దూరాన ఉన్నా ప్రియమైన వారిని ఆప్యాయంగా దగ్గరకు తీసుకునే అవకాశం కల్పిస్తున్నాయి.

శాస్త్రవేత్తల అంచనాల ప్రకారం..

2028 నాటికి బ్రెయిన్‌ టు బ్రెయిన్‌ ఇంటర్‌ఫేస్‌ పరిజ్ఞానం సాకారమై దూరాన ఉన్న ఆత్మీయులని కలుసుకోవడం తేలిక అవుతుందని అంటున్నారు.

2033లో సెలబ్రిటీ నమూనాలతో చేసిన రోబోలకి ప్రాధాన్యం పెరుగుతుందట.

2045 నాటికి ప్రతి పదిమందిలో ఒకరు హ్యూమనాయిడ్‌ రోబోలని భాగస్వామిగా చేసుకుంటారని అంచనా!

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి