వృద్ధుల్లోనూ పోషణలోపం

వృద్ధుల్లోనూ పోషణలోపం

పోషణలోపం అనగానే ముందుగా చిన్నపిల్లలే గుర్తుకొస్తారు. కానీ ఇది వృద్ధుల్లోనూ తరచుగా కనబడుతుంది. దీనికి చాలా అంశాలు దోహదం చేస్తాయి. రుచి, వాసన, వినికిడి, చూపు తగ్గటం; పదార్థాలను తెచ్చుకోవటానికి వెళ్లే శక్తిలేకపోవటం; నోరు, దంత సమస్యల మూలంగా ఆహారాన్ని నమలటంలో ఇబ్బంది పడటం; మానసికంగా కుంగిపోవటం; మతిమరుపు వంటివన్నీ పోషణలోపానికి దారితీసేవే. వృద్ధులు తగినన్ని పోషకాలు తీసుకోకపోతే బరువు తగ్గటం, కండరాలు కృశించటం, చర్మం కింద కొవ్వు క్షీణించటం వంటివి బయలుదేరతాయి. కొందరికి ఒంట్లో నీరు కూడా పోగుపడుతుంది. దీంతో బరువు తగ్గినా ఆ విషయం బయటపడదు. వృద్ధుల్లో శక్తి సన్నగిల్లితే రోజువారీ పనులు చేసుకోవటంలో ఇబ్బందులు పడతారు. పోషణలోపం అలాగే కొనసాగితే మంచాన పడటంతో పాటు మరణం ముప్పూ పెరుగుతుంది. జబ్బులతో ఆసుపత్రిలో చేరటం, పుండ్లు మానకుండా మొండికేయటం, శస్త్రచికిత్సలు చేయాల్సి వస్తే త్వరగా కోలుకోలేకపోవటం వంటివీ వేధిస్తాయి. అటూఇటూ తేలికగా కదలలేకపోవటం, అదేపనిగా మంచానికి అతుక్కుపోవటం వల్ల చర్మం మీద ఒత్తిడి పడిన చోట పుండ్లు తలెత్తటం, మతిమరుపు వంటివీ తలెత్తుతాయి. అందువల్ల వృద్ధుల్లో పోషణలోపాన్ని వీలైనంత త్వరగా గుర్తించటం చాలా అవసరం. దీంతో మున్ముందు తీవ్రమైన సమస్యల బారినపడకుండా చూసుకోవచ్చు.