మీకు లెక్కలొచ్చా

కెలడోస్కోపిక్‌ గొట్టంలోని తొంగిచూసినప్పుడు కనిపించే అద్దాల్లా... జిగేల్‌ మంటున్న రంగులతో కనిపిస్తున్న వీటిని కేకులు అంటే నమ్మడం కష్టమే. కెక్‌లాపిస్‌ సరావక్‌ అని పిలిచే ఈ కేకులని తయారుచేయడం అందరి వల్లా సాధ్యం కాదు. ఎందుకంటే వీటిని తయారీకి కేవలం బేకింగ్‌ నైపుణ్యాలుంటే సరిపోదు. గణితశాస్త్ర పరిజ్ఞానంతో పాటు అపారమైన ఓపికా కావాలి మరి. మలేషియాలోని సరావక్‌ ప్రాంతం ఈ కెక్‌లాపిస్‌ కేకులకు ప్రసిద్ధి. ప్రకృతి సిద్ధమైన రంగులని మాత్రమే వాడి... ముందుగా వేసుకున్న చిత్రాలు, లెక్కల సాయంతో వీటిని తయారుచేస్తారు. వివిధ రంగుల లేయర్‌లని కలపడం... లేయర్ల విషయంలో ఎక్కడా తప్పు రాకుండా చూసుకోవడం చాలా ముఖ్యం. ఒక్కో కేకు తయారీకి సుమారుగా 8 గంటలు పడుతుందట. అక్కడి ప్రభుత్వం ఈ కేకులకి భౌగోళిక గుర్తింపుని కూడా ఇచ్చింది. ప్రపంచంలోనే అత్యంత క్లిష్టమైన కేకులుగా వీటిని పాకశాస్త్ర నిపుణులు చెబుతుంటారు.