dehydration: వేసవి తాపానికి చెక్‌ పెట్టేద్దాం

ఏప్రిల్‌ నెల ఇంకా మొదలవకుండానే సూర్యుడు తన ప్రతాపం చూపిస్తున్నాడు. ఈ వేడి నుంచి ఉపశమనం పొందాలంటే ఏం చేయాలో, ఏం చేయకూడదో చూడండి..

• మనం ఎప్పుడూ వినే మాట.. రోజుకు ఆరు నుంచి ఎనిమిది గ్లాసుల నీళ్లు తాగాలనేది. కానీ తాజాగా నెబ్రాస్కా-లింకన్‌ యూనివర్సిటీ వెబ్‌సైట్‌లో వచ్చిన కథనాన్ని బట్టి ఆ లెక్క అందరికీ ఒకలా కాకుండా మనిషి మనిషికీ మారుతుంది. వాళ్ల ఆరోగ్యస్థితి, చేసే పనులు, వాళ్లున్న వాతావరణం లాంటి అనేక అంశాలను బట్టి శరీరానికి నీళ్లు అవసరమవుతాయి. తమకు ఎంత కావాలనిపిస్తే అంతే తాగాలి.
• తగినన్ని నీళ్లు తాగకపోయినా, అతిగా తాగినా కూడా ప్రమాదమేనంటున్నారు గురుగ్రాం నారాయణ ఆసుపత్రిలో డైటీషియన్‌ పరమీత్‌ కౌర్‌. శరీరంలో నీళ్లు ఎక్కువైతే అది కిడ్నీల మీద ఒత్తిడి పెరుగుతుందని తేల్చారామె.
•  దాహం మరీ ఎక్కువయ్యేదాకా నీళ్లు తాగకుంటే.. చాలా ఎక్కువ నీళ్లు తాగాల్సివస్తుంది. అది కడుపుబ్బరం, తలనొప్పి, మైకం లాంటి సమస్యలకు దారి తీసే అవకాశం ఉంది.
•  ఎండలో వెళ్లేట్లయితే నీళ్లు ఎక్కువ తాగాలి. లేకుంటే చెమట రూపంలో నీరు వెళ్లిపోయి డీహైడ్రేషన్‌ ఏర్పడే ప్రమాదం ఉంది.
•  ఎండగా ఉన్నప్పుడు కూల్‌డ్రింక్స్‌, సోడా, ఐస్‌, ఎసెన్స్‌ కలిపిన పండ్లరసాలు, కోల్డ్‌ కాఫీ లాంటి పానీయాలు తాగాలనిపిస్తుంది. నిజానికి ఇవన్నీ హాని చేసేవే. కనుక వాటికి బదులు నీళ్లు తాగడమే మంచిది.
• మనం చాలాసార్లు నిలబడి నీళ్లు తాగుతాం. దీనివల్ల రక్తం పల్చబడుతుంది, వాపు లాంటి సమస్యలు వస్తాయి- అంటున్నారు హెల్త్‌ అండ్‌ లైఫ్‌స్టైల్‌ కోచ్‌ లూక్‌ కౌంటినో. అందువల్ల ఇక నుంచి కూర్చుని నీళ్లు తాగండి.