సికింద్రాబాద్, కాచిగూడ స్టేషన్లలో ప్యాసింజర్‌ హోల్డింగ్‌ ఏరియాలు

విజయవాడ, తిరుపతి, రాజమండ్రి, గుంటూరుల్లోనూ.. 

ఈనాడు, హైదరాబాద్‌: రాష్ట్రంలోని సికింద్రాబాద్, కాచిగూడ రైల్వేస్టేషన్లలో ప్యాసింజర్‌ హోల్డింగ్‌ ఏరియాలను అభివృద్ధి చేయనున్నారు. దేశవ్యాప్తంగా మొత్తం 76 రైల్వేస్టేషన్లలో వీటిని నిర్మించేందుకు రైల్వేశాఖ గురువారం ఆమోదం తెలిపింది. ద.మ.రైల్వేజోన్‌ పరిధిలో ఏపీలోని విజయవాడ, తిరుపతి, రాజమండ్రి, గుంటూరు రైల్వేస్టేషన్లలోనూ ఏర్పాటు చేయనున్నారు. పండగల సమయంలో రైల్వేస్టేషన్లలో భారీ రద్దీని నియంత్రించేందుకు ప్యాసింజర్‌ హోల్డింగ్‌ ఏరియాలు దోహదం చేస్తాయి. మహాకుంభమేళా సమయంలో దిల్లీ స్టేషన్‌లో తొక్కిసలాట ఘటన అనంతరం అక్కడ ‘యాత్రి సువిధ కేంద్ర’ పేరిట దీనిని అభివృద్ధి చేశారు. ఇందులో టికెట్‌ కౌంటర్లతోపాటు ఒకేసారి వందల మంది ప్రయాణికులు వేచి ఉండేలా వసతులు కల్పించారు. అదే మోడల్‌ను దేశవ్యాప్తంగా ప్రధాన రైల్వేస్టేషన్లలో ఏర్పాటుచేయాలని రైల్వేశాఖ నిర్ణయించింది. ఈ నిర్మాణాలను త్వరగా పూర్తిచేయాలని రైల్వేశాఖ మంత్రి అశ్వినీవైష్ణవ్‌ అధికారుల్ని ఆదేశించారు.