Credible Broker: మధ్యవర్తి ద్వారా ఇల్లు కొంటున్నారా? ఇలాంటి వారినే ఎంచుకోండి!

ఇంటర్నెట్‌ డెస్క్‌: ఇల్లు కొనేటప్పుడు అనేక ఇబ్బందులు తలెత్తుతాయి. సమర్థమైన, విశ్వసనీయమైన మధ్యవర్తి (Broker) ద్వారా కొనుగోలు చేస్తే వీటిలో కొన్నింటిని అధిగమించే అవకాశం ఉంటుంది. అయితే, మార్కెట్‌లో ఉన్న బ్రోకర్లను అంత గుడ్డిగా నమ్మొద్దు. వ్యాపారం కోసం, అలాగే వారికి ఉండే కొన్ని పరిమితుల రీత్యా కొన్ని అవాస్తవాలు చెప్పి మనకు ప్రాపర్టీని అంటగట్టే ప్రమాదం లేకపోలేదు. అందుకే సమర్థమైన బ్రోకర్‌ను ఎంచుకోగలిగితే సగం సమస్యలు తీరినట్లే.

బ్రోకర్‌ వివరాలు తనిఖీ చేయండి..

బ్రోకర్‌కు సంబంధించిన కొన్ని ప్రాథమిక వివరాలు తెలుసుకుంటే అవి వారి విశ్వసనీయతను తెలియజేస్తాయి. సదరు వ్యక్తి రాష్ట్ర ప్రభుత్వ ‘స్థిరాస్తి ప్రాధికార సంస్థ (రెరా)’ వద్ద నమోదై ఉండాలి. అలాగే అతను/ఆమె ఏదైనా అసోసియేషన్‌లో భాగస్వాములుగా ఉన్నారేమో ఆరా తీయండి. ‘జాతీయ స్థిరాస్తి వ్యాపారుల సంఘం (NAR)’ వంటి వాటిలో రిజిస్టరై ఉంటే మంచిది. ఒకవేళ అతను ఏదైనా పొరపాటు చేస్తే అసోసియేషన్‌లో ఫిర్యాదు చేయడానికి అవకాశం ఉంటుంది. అలాగే బ్రోకర్‌కు ప్రొఫెషనల్‌ సర్టిఫికెట్‌ ఉందేమో కనుక్కోండి. స్థిరాస్తి వ్యాపారంలో ఉన్నవారికి మహారాష్ట్ర రెరా 20 గంటల కోర్సును అందించి పరీక్ష కూడా నిర్వహిస్తోంది. అందులో వారి ప్రతిభ ఆధారంగా సర్టిఫికెట్‌ అందిస్తోంది. ఇవన్నీ ఒక బ్రోకర్‌ విశ్వసనీయమైన వ్యక్తి అని చెప్పడానికి కొలమానాలేం కాదు. కానీ, సరైన స్థిరాస్తి నిపుణుడి దగ్గరకు వెళ్లడానికి ఇవన్నీ దోహదం చేస్తాయి.

ఇంటి మరమ్మతుకు రుణం కావాలా?

అనుభవం..

సదరు మధ్యవర్తి అనుభవం కూడా చాలా ముఖ్యమైన అంశం. ఎక్కువ అనుభం ఉన్నవారైతే ఇంటి కొనుగోలులో ఉపయోగకరంగా ఉండే అవకాశం ఉంది. అలాంటి వారు చాలా మంది క్లయింట్లను చూసి ఉంటారు. ఎలాంటి సమస్యలు తలెత్తుతాయో ముందే చెప్పగలుగుతారు. అలాగే గత అనుభవాల దృష్ట్యా అవాస్తవాలకు దూరంగా ఉండే అవకాశం ఉంది. కనీసం 10 ఏళ్ల అనుభవం ఉన్న బ్రోకర్లయితే మేలని నిపుణులు సూచిస్తుంటారు.

స్థానిక మార్కెట్‌పై పట్టు..

కొనుగోలుదారుడు తన అవసరాలు చెప్పినప్పుడు బ్రోకర్‌ వివిధ రకాల ప్రత్యామ్నాయాలను ముందుంచగలగాలి. అతని దగ్గర ఎలాంటి ఆప్షన్స్‌ ఉన్నాయో తెలుసుకోవడం చాలా ముఖ్యం. అలాగే సదరు బ్రోకర్‌ దగ్గర అమ్మకానికి ఎన్ని ఇళ్లు ఉన్నాయో కూడా తెలుసుకోవాలి. అలాగే ఆ స్థానిక మార్కెట్‌లో ధరలు ఎలా ఉన్నాయో కూడా కనుక్కోవాలి. తద్వారా ఆ ఏరియాపై అతనికి ఎంత పట్టుందో పసిగట్టాలి. ఇతర మౌలిక వసతులు అతను చెప్పిన విధంగా ఉన్నాయో లేదో చూసుకోవాలి. అలాగే రాబోయే రోజుల్లో ఆ ప్రాంతంలో ఎలాంటి ప్రాజెక్టులు రాబోతున్నాయి? ప్రభుత్వం ఎలాంటి సౌకర్యాలు కల్పించబోతోంది? వాటికి సంబంధించిన అధికారిక ప్రణాళికల సమాచారం గురించి కూడా తెలుసుకోవాలి.

సిఫార్సు చేసిన వ్యక్తే మేలు..

కేవలం వాణిజ్య ప్రకటనలు, వారిచ్చే ఆధారాలను బట్టి బ్రోకర్‌ను ఎంచుకోవడం అంత మంచిది కాదు. గతంలో అతను సర్వీస్‌ అందించిన కస్టమర్ల వివరాలు కనుక్కోండి. కనీసం ఓ నలుగురు లేదా ఐదుగురిని సంప్రదించండి. బ్రోకర్‌ గురించి అడిగి తెలుసుకోండి. అలాగే మంచి మధ్యవర్తి కోసం మిత్రులు, బంధువుల దగ్గర కూడా ఆరా తీయండి. ఎక్కువ మంది సిఫార్సు చేసిన వ్యక్తినే ఎంచుకుంటే మేలు. ఆన్‌లైన్‌లోనూ వారి గురించి వెతకండి. వారి సోషల్‌ మీడియా ఖాతాలపైనా ఓ లుక్కేయండి. చాలా మంది క్లయింట్లు ఈ మధ్య తమ అభిప్రాయాన్ని ఫేస్‌బుక్‌, ట్విటర్‌, యూట్యూబ్‌లో కామెంట్ల రూపంలో ఉంచుతున్నారు. మరోవైపు గూగుల్‌ రివ్యూలు కూడా ఈ విషయంలో ఉపయోగపడతాయి.

పొదుపు తగ్గి అప్పు పెరుగుతోందా? ఈ వ్యూహాలను అనుసరిద్దాం!

ధరలపై మంచి అవగాహన ఉండాలి..

మనం ఎంచుకున్న మధ్యవర్తికి ఆయా ప్రాంతాల్లో ప్రాపర్టీల విలువపై మంచి అవగాహన ఉండాలి. స్థలం, నిర్మాణ ఖర్చులు, ఇంటీరియర్స్‌, ఇతర వసతులకయ్యే కనీస ఖర్చులు ఎలా ఉంటాయో చెప్పగలగాలి. తద్వారా ఓ ఇంటికి ఎంత వరకు పెట్టొచ్చో అంచనా వేయగలగాలి.

ఎక్కువ బ్రోకరేజీ చెల్లించొద్దు..

ప్రాంతాన్ని బట్టి బ్రోకరేజీ (Brokerage) మారుతుంటుంది. దేశ రాజధాని దిల్లీలో కొనుగోలుదారులు 1 శాతం, అమ్మకందారులు 1 శాతం చెల్లిస్తున్నట్లు నిపుణులు తెలిపారు. దీనికి జీఎస్టీ అదనం. అదే బెంగళూరులో ఇది వరుసగా 1 శాతం, 2 శాతంగా ఉన్నట్లు తెలుస్తోంది. అలాగే కొంత మంది డాక్యుమెంటేషన్‌కు అదనంగా ఛార్జ్‌ చేస్తుంటారు. అందుకే ముందే మధ్యవర్తి నుంచి అతనికి చెల్లించాల్సిన మొత్తం గురించి స్పష్టత తీసుకోవాలి. జీఎస్టీ, డాక్యుమెంటేషన్‌, ఇతర అదనపు రుసుముల గురించి ముందే తెలుసుకోవాలి.