Apple: యాపిల్‌ యాడ్‌లలో ఎప్పుడూ 9:41 సమయమే ఎందుకు?

ఇంటర్నెట్‌ డెస్క్‌: ఏదైనా వాచ్‌ను కొనుగోలు చేయగానే సాధారణంగా అందులో సమయం 10:09గంటలను సూచిస్తుంటుంది. అయితే ప్రముఖ దిగ్గజ సంస్థ యాపిల్ (Apple) విడుదల చేసే ఐఫోన్‌లు (iPhone), ఐప్యాడ్ లేదా మ్యాక్‌బుక్‌లలో మాత్రం ఎప్పుడూ సమయం ఉదయం 9:41 గంటలనే సూచిస్తుంటుంది. ఏదో ఒక సమయాన్ని సెట్‌ చేసే అవకాశం ఉన్నప్పటికీ ఈ ప్రముఖ సంస్థ కేవలం 9:41 సమయాన్నే తమ టైమ్‌స్టాంప్‌గా వాడడానికో కారణం ఉంది. ఇంతకీ ఈ మ్యాజిక్‌ మినిట్‌ వెనుక ఉన్న రహస్యం ఏంటి?

యాపిల్‌ (Apple) సహ వ్యవస్థాపకుడు స్టీవ్‌ జాబ్స్‌ (Steve Jobs) 2007లో మొదటి ఐఫోన్‌ (iPhone)ను ఆవిష్కరించారు. ఉదయం 9 గంటలకు లాంచ్‌ ఈవెంట్‌ ప్రారంభమైతే దానికి సంబంధించిన అన్ని పలు కీనోట్‌లను చర్చించడానికి 42 నిమిషాలు పట్టింది. వినియోగదారులకు ఐఫోన్‌ను రివీల్‌ చేసే సమయానికి వారి వాచ్‌లలో ప్రస్తుతం అవుతున్న సమయమే ఫోన్‌లోనూ చూపించాలని యాపిల్‌ కంపెనీ ప్లాన్‌ చేసింది. ఇందులో భాగంగానే ఫోన్‌ స్క్రీన్‌పై సమయం ఉదయం 9:42 గంటలుగా సెట్‌ చేసింది. అనంతరం యాపిల్‌ సంస్థ నిర్వహించే లాంచ్‌ ఈవెంట్లు 41 నిమిషాల్లోనే పూర్తయిపోతుండడంతో అదే సమయాన్ని చూపించాలనే ఉద్దేశంతో స్టీవ్‌ జాబ్స్‌ రివీల్‌ సమయాన్ని 9:41కు మార్చారు. అలా నాటి నుంచి అన్ని ఐఫోన్లపై టైమ్‌ 9.41గా స్థిరపడిపోయింది. ఐప్యాడ్‌, మ్యాక్‌బుక్‌కు కూడా ఇదే ఆనవాయితీని కొనసాగిస్తున్నారు. యాపిల్‌ వాచ్‌ను మాత్రం దీన్నుంచి మినహాయించారు.