వందే భారత్‌ ఎక్స్‌ప్రెస్‌పై రాళ్లు

అత్యవసర కిటికీ అద్దానికి పగుళ్లు
3 గంటలు ఆలస్యంగా రైలు

ఖమ్మం మామిళ్లగూడెం, విశాఖపట్నం(రైల్వేస్టేషన్‌) న్యూస్‌టుడే: భారత తొలి సెమీ హైస్పీడ్‌ రైలు ‘వందే భారత్‌’ శనివారం 3 గంటలు ఆలస్యంగా నడిచింది. ఈ నెల 3 శుక్రవారం సాయంత్రం సికింద్రాబాద్‌ నుంచి విశాఖపట్నం వెళుతున్న రైలుపై ఖమ్మం రైల్వేస్టేషన్‌ దాటిన తర్వాత ముస్తఫానగర్‌ సమీపంలో గుర్తు తెలియని వ్యక్తులు రాళ్లు విసరడంతో సీ12 బోగీలో అద్దానికి పగుళ్లు వచ్చాయి. రాత్రి విశాఖ చేరిన తర్వాత వాల్తేర్‌లో రైల్వే అధికారులు కిటికీ అద్దం మార్చారు. దీనికి 3 గంటల సమయం పట్టడంతో శనివారం ఉదయం 5.45 గంటలకు బయలు దేరాల్సిన రైలును 8.50 గంటలకు వెళ్లేలా మార్పు చేశారు. దీంతో రైలు మూడు గంటలు ఆలస్యంగా నడిచింది. రైలుపై రాళ్లు విసిరిన ఘటనలో ముగ్గురు బాలురు ఉన్నట్లు గుర్తించామని ఖమ్మం ఆర్పీఎఫ్‌ సీఐ ఎం.శ్రీనివాస్‌రెడ్డి తెలిపారు. వారిలో ఇద్దరికి తల్లిదండ్రుల సమక్షంలో కౌన్సెలింగ్‌ ఇచ్చి, లిఖితపూర్వకంగా బాండ్‌ తీసుకున్నట్లు తెలిపారు. ఏలూరు సమీపంలో సైతం నాలుగు రోజుల క్రితం ఇలానే జరిగిందని సమాచారం.