ఇళ్లకు వెళ్లడం ఎలా?

సిద్ధం సభకు వచ్చినవారి పరిస్థితి 

ఈనాడు, కాకినాడ: సిద్ధం సభకు పలు జిల్లాల నుంచి వెయ్యికిపైగా బస్సులు ఏర్పాటుచేశారు. జనాన్ని తీసుకొచ్చినప్పుడు చూపిన శ్రద్ధ తిరుగు ప్రయాణంలో చూపకపోవడంతో సభ సాయంత్రం 6.30 గంటలకు ముగిసినా.. బస్సుల కోసం రాత్రి 10 గంటల వరకు నిరీక్షించాల్సి వచ్చింది. జనం రాని ప్రాంతాల్లో కొందరు పిల్లలను బస్సెక్కించి సభకు తీసుకొచ్చారు. సభాస్థలికి, బస్సుల పార్కింగ్‌ ప్రాంతానికి మూడున్నర కి.మీ. దూరం ఉంది. వేలాది వాహనాల ట్రాఫిక్‌ కారణంగా తిమ్మాపురం పంచాయతీ కాదంబరి లేవుట్‌లోని శివారు ప్రాంతాన్ని పార్కింగ్‌కు కేటాయించారు. తీసుకొచ్చినప్పుడు అచ్చంపేట కూడలిలో దించినా.. సభ ముగిసిన తర్వాత మూడున్నర కి.మీ. నడుచుకుని ప్రయాసపడుతూ బస్సుల దగ్గరకు చేరుకోవాల్సి వచ్చింది. గంటల తరబడి ఏడీబీ రోడ్డు కొత్తూరు కూడలిలో బస్సుల కోసం ఎదురుచూడాల్సి వచ్చింది. కొందరు తాము వచ్చిన బస్సులు గుర్తించలేక, అక్కడ తినడానికీ ఏమీ లేక నరకయాతన అనుభవించారు. బస్సు డ్రైవర్లతో మరికొందరు వాదనకు దిగారు.