హోంమంత్రి నామినేషన్‌ ర్యాలీకి వెళ్లొస్తుండగా ప్రమాదం

ఒకరి పరిస్థితి విషమం.. 

రహదారి పక్కన పడిపోయిన క్షతగాత్రులు

నల్లజర్ల: హోంమంత్రి నామినేషన్‌ ర్యాలీకి వెళ్లిన ముగ్గురు యువకులు ద్విచక్రవాహనంపై తిరిగొస్తుండగా ప్రమాదానికి గురయ్యారు. ఇందులో ఒకరి పరిస్థితి విషమంగా ఉండగా, మరో ఇద్దరికి గాయాలయ్యాయి. స్థానికులు తెలిపిన వివరాల మేరకు.. నల్లజర్లకు చెందిన గొన్నూరి పండు, కలపాల గణేష్‌, కలపాల సాగర్‌లు ద్విచక్రవాహనంపై శుక్రవారం ఉదయం హోంమంత్రి, గోపాలపురం వైకాపా అభ్యర్థి తానేటి వనిత నామినేషన్‌ కార్యక్రమానికి వెళ్లారు. తిరిగొస్తుండగా వీరవల్లిటోల్‌ప్లాజా వద్ద జాతీయ రహదారి పక్కన విద్యుత్తు స్తంభాన్ని ఢీకొన్నారు. అతివేగంగా వెళ్తుండటంతో బండి రెండు భాగాలుగా విరిగిపోయింది. తీవ్రంగా గాయపడిన ముగ్గుర్నీ హైవే అంబులెన్స్‌లో గోపాలపురం సీహెచ్‌సీకి తరలించారు. అందులో ఒకరి పరిస్థితి విషమంగా ఉండటంతో రాజమహేంద్రవరంలోని ప్రభుత్వ ఆసుపత్రికి తరలించారు. దీనిపై ఎటువంటి కేసు నమోదు కాలేదు.