నష్టపరిహారం కోసం.. ప్రగతిభవన్‌ వద్ద కుటుంబం ఆత్మహత్యా యత్నం

పంజాగుట్ట, న్యూస్‌టుడే: ప్రభుత్వం స్వాధీనం చేసుకున్న తమ భూమికి నష్టపరిహారం చెల్లించడం లేదంటూ ఓ వ్యక్తి కుటుంబంతో సహా ప్రగతిభవన్‌ వద్ద సోమవారం ఆత్మహత్యాయత్నానికి పాల్పడ్డాడు. స్పందించిన పోలీసులు వారిని అడ్డుకున్నారు. పోలీసులు తెలిపిన వివరాల ప్రకారం.. రంగారెడ్డి జిల్లా ఇబ్రహీంపట్నానికి చెందిన ఐలేష్‌ కూలి పనులు చేసుకుంటూ కుటుంబాన్ని పోషిస్తున్నారు. అభివృద్ధి పనుల కోసం ప్రభుత్వం ఇటీవల తనకు చెందిన అయిదెకరాల భూమిని ప్రభుత్వం స్వాధీనం చేసుకుంది. దానికి సంబంధించిన నష్టపరిహారం ఇంతవరకు చెల్లించలేదు. దీంతో మనస్తాపం చెందిన ఐలేష్‌.. తన భార్య, కుమార్తె, ఇద్దరు కుమారులతో సోమవారం మధ్యాహ్నం ప్రగతిభవన్‌ వద్దకు వచ్చారు. వారు తమ వెంట తెచ్చుకున్న కిరోసిన్‌ను ఒంటిపై చల్లుకుని నిప్పంటించుకునే ప్రయత్నం చేయగా.. అక్కడే ఉన్న పోలీసులు అప్రమత్తమై వారిని అడ్డుకున్నారు. అనంతరం పంజాగుట్ట పోలీసుస్టేషన్‌కు తరలించారు. ఐలేష్‌, ఆయన కుటుంబసభ్యులకు కౌన్సెలింగ్‌ నిర్వహించి ఇంటికి పంపించారు.