ప్రాథమిక పరిశుభ్రతపై పిల్లలకు వర్క్‌షాప్‌

*సెసేమ్ ఇండియా సంస్థ మేనేజింగ్ డైరెక్టర్ సోనాలి ఖాన్

హైదరాబాద్: రోగాల బారిన పడకుండా ఉండేందుకు ప్రతి ఒక్కరు ప్రాథమిక పరిశుభ్రతను పాటించాలని సెసేమ్ ఇండియా సంస్థ మేనేజింగ్ డైరెక్టర్ సోనాలి ఖాన్ సూచించారు. సెసేమ్ వర్క్‌షాప్-ఇండియా, సెసేమ్ వర్క్‌షాప్‌ భారతీయ విభాగం, అంతర్జాతీయంగా ప్రసిద్ధి చెందిన నాన్ ప్రాఫిట్ మీడియా ఎడ్యుకేషనల్ ఆర్గనైజేషన్ హైజీన్ అండ్ బిహేవియర్ ఛేంజ్‌ కోయలిషన్ (HBCC)తో కలిసి ప్రజలలో ‘చేతి పరిశుభ్రత- వ్యాధుల నివారణ’ గురించి అవగాహన కల్పించడానికి ఈ వర్క్ షాప్‌ను నిర్వహించారు. పిల్లలు, కుటుంబాలలో పరిశుభ్రత జ్ఞానం ప్రోత్సహించడం, అభివృద్ధి అవసరాలను తీర్చడం తమ లక్ష్యమన్నారు. ఎప్పటి నుంచో పరిశుభ్రతపై అవగాహన కల్పిస్తున్నా,  కొవిడ్‌-19 మహమ్మారితో దాని ఆవశ్యకత మరింత ఏర్పడిందన్నారు. ప్రముఖ ముప్పెట్స్ ఎల్మో, చమ్కీలు పిల్లలకు తమ సరదా చర్యలతో వినోదాన్ని పంచుతూ వర్క్‌షాప్‌లో అవగాహన కల్పిస్తున్నారు. ఈ మల్టీమీడియా ప్రచారంలో భాగంగా, సెసేమ్ వర్క్‌షాప్ ఇండియా హిందీ, మరాఠీ, తెలుగు, తమిళ భాషలలో వీడియోలు, పోస్టర్‌లతో సహా ‘చేతి పరిశుభ్రత- వ్యాధి నివారణ చర్యలు’ గురించి ప్రజలకు అవగాహన కల్పించడానికి సరళమైన, ఇంకా ఆకర్షణీయమైన ఆన్‌లైన్ కంటెంట్‌ను అందించింది. డిజిటల్ గేమ్స్ మరియు ఇ-బుక్స్, ఫేస్‌బుక్, ఇన్‌స్టాగ్రామ్, యూట్యూబ్, రేడియో వంటి సోషల్ మీడియా సైట్‌ల ద్వారా, అలాగే కమ్యూనిటీలతో ప్రత్యక్ష పరిచయం ద్వారా ఈ మెటీరియల్స్ కుటుంబాలకు అందిస్తున్నారు.