క్రిప్టో కరెన్సీలో పెట్టుబడి పేరిట మోసం

అమీర్‌పేట, న్యూస్‌టుడే: క్రిప్టో కరెన్సీలో పెట్టుబడి పేరిట నలుగురి నుంచి రూ.65,36,590 మేర కొల్లగొట్టిన వ్యక్తిపై కేసు నమోదైంది. ఎస్సార్‌నగర్‌ పోలీసు స్టేషన్‌ పరిధిలో జరిగిన ఈ సంఘటన వివరాలు పోలీసులు తెలిపారు. ఎస్సార్‌నగర్‌ పోలీసుస్టేషన్‌ పరిధిలోని బీకేగూడకు చెందిన ప్రైవేటు ఉద్యోగి బి.విశాల్‌రాజ్‌ జకారియాస్‌తో పాటు ఎం.శ్రీకాంత్‌, పరుచూరి రామయ్య, నవజీవన్‌లు సికింద్రాబాద్‌లోని యూనియన్‌ ఆఫ్‌ ఇవాంజలికల్‌ స్టూడెంట్స్‌ ఆఫ్‌ ఇండియా (యూఈఎస్‌ఐ)లో సభ్యులు. వీరికి 2018లో అంగూరి ప్రకాష్‌కుమార్‌ (54) పరిచయమయ్యాడు. క్రిప్టో కరెన్సీలో పెట్టుబడి పెడితే రెండేళ్లలో 248 శాతం డబ్బు తిరిగి వస్తుందంటూ నమ్మించాడు. పెట్టుబడి పెట్టేందుకు ఓ వెబ్‌సైట్‌ గురించి చెప్పాడు. తన అనుచరులుగా మరో 12 మందిని పరిచయం చేశాడు. నమ్మిన బాధితులు దశల వారీగా మొత్తం రూ.65,36,590 పెట్టుబడిగా పెట్టారు. ఆ తరువాత ఎంతకూ రిటర్న్స్‌ రాకపోవడంతో పాటు విషయం కోసం బాధితులు ఆరా తీయడంతో నిందితుడు ప్రకాష్‌కుమార్‌ మొహం చాటేసేవాడు. చివరకు వెబ్‌సైట్‌ గురించి తెలుసుకుంటే అది నకిలీదని, నిందితుడే దాన్ని తయారుచేశాడని తెలుసుకున్నారు. బాధితులు నగర సీసీఎస్‌లో ఫిర్యాదు చేయగా.. ఈ నెల 22న జీరో ఎఫ్‌ఐఆర్‌ నమోదు చేసిన సీసీఎల్‌ పోలీసులు కేసును ఎస్సార్‌నగర్‌ స్టేషన్‌కు బదిలీ చేశారు.