23న మల్లన్నసాగర్‌ జలాశయ ప్రారంభోత్సవం

మెదక్‌ ఎంపీ కొత్త ప్రభాకర్‌రెడ్డి వెల్లడి

ఈనాడు డిజిటల్‌, సిద్దిపేట: జిల్లాలోని తొగుట మండల పరిధిలో నిర్మించిన కొమురవెల్లి మల్లన్నసాగర్‌ జలాశయాన్ని రాష్ట్ర ముఖ్యమంత్రి కేసీఆర్‌ ఈనెల 23న ప్రారంభించనున్నట్లు మెదక్‌ ఎంపీ కొత్త ప్రభాకర్‌రెడ్డి తెలిపారు. కాళేశ్వరం ఎత్తిపోతల పథకంలో భాగంగా 50 టీఎంసీల సామర్థ్యంతో నిర్మించిన విషయం తెలిసిందే. గతేడాది ఆగస్టు 7న తొగుట మండలం తుక్కాపూర్‌ వద్ద నిర్మించిన పంప్‌హౌజ్‌ నుంచి మూడు మోటార్ల ద్వారా గోదావరి జలాలను ప్రయోగాత్మక పరిశీలనలో భాగంగా కాళేశ్వరం తాత్కాలిక కాలువలోకి విడుదల చేశారు. అక్కడి నుంచి మల్లన్నసాగర్‌లోకి నీటిని మళ్లించారు. తరువాత ఆగస్టు 22 నుంచి 28 వరకు ఎనిమిది మోటార్ల ద్వారా 4.3 టీఎంసీలను తరలించారు. కొద్దిరోజుల విరామం అనంతరం సెప్టెంబరు 17 నుంచి నీటి విడుదలను కొనసాగించి.. మరో ఆరు టీఎంసీలను మల్లన్నసాగర్‌లోకి పంపారు. మొత్తంగా ప్రస్తుతం 12 టీఎంసీల నీటి నిల్వ ఉంది.