నిఘా నేత్రం.. సమస్తం నిక్షిప్తం

360 డిగ్రీల కెమెరాతో పర్యవేక్షణ
న్యూస్‌టుడే, నిజామాబాద్‌ అర్బన్‌

 సార్వత్రిక ఎన్నికల్లో ప్రవర్తనా నియమావళి పక్కాగా అమలు చేసేందుకు కేంద్ర ఎన్నికల సంఘం నిఘా వ్యవస్థను మరింత పటిష్ఠం చేసింది. ఎన్నికలు ప్రశాంతంగా నిర్వహించేందుకు సాంకేతికతను అందుబాటులోకి తెచ్చింది. నగదు, మద్యం ఇతర వస్తువుల పంపిణీకి అడ్డుకట్ట వేసేందుకు ఇప్పటికే బృందాలను నియమించింది. కోడ్‌ అమల్లోకి వచ్చినప్పటి నుంచి నియోజకవర్గాల్లో నిఘా బృందాలు తనిఖీలు చేస్తున్నాయి. అసెంబ్లీ ఎన్నికల్లో ప్రవేశపెట్టిన 360 డిగ్రీల కోణం కెమెరాల విధానాన్ని పార్లమెంటు ఎన్నికల్లోనూ వినియోగిస్తున్నారు.

రాష్ట్ర కార్యాలయానికి అనుసంధానం

నిఘా బృందాల వాహనాలకు 360 డిగ్రీల కోణం కెమెరాలు బిగించారు. ఆధునిక సాంకేతిక పరిజ్ఞానంతో వీటిని రూపొందించారు. ప్రతి నియోజకవర్గంలో తనిఖీ బృందాలకు ఈ వాహనాలు ఏర్పాటు చేశారు. వీటికి జియోట్యాగింగ్‌ ఏర్పాటు చేశారు. రాష్ట్ర, జిల్లా ఎన్నికల కార్యాలయాలకు అనుసంధానం చేశారు. ఆయా నియోజకవర్గంలో జరిగే ఘటనలను ఎప్పటికప్పుడు ఉన్నతాధికారులు వీక్షిస్తారు.

బృందాల ఏర్పాటు

నిజామాబాద్‌ పార్లమెంటు పరిధిలోని అసెంబ్లీ నియోజకవర్గల్లో ప్రత్యేక నిఘా బృంధాలు పని చేస్తున్నాయి. పోలీసు, రెవెన్యూ, సహకార, ఇతర శాఖలను ఇందులో భాగస్వాములను చేశారు. ఫ్లయింగ్‌ స్క్వాడ్‌లో పోలీసు అధికారి, ఒక వీడియోగ్రాఫర్‌, స్టాటిక్‌ సర్వైలెన్స్‌లో డిప్యూటీ తహసీల్దార్‌, పోలీసు, ఆబ్కారీ, అటవీ శాఖ సిబ్బంది ఉన్నారు. వీడియో సర్వైలైన్స్‌ బృందం ద్వారా వచ్చిన వీడియోలను వ్యూయింగ్‌ బృందం సభ్యులు నిశితంగా పరిశీలిస్తారు. మోడల్‌ కోడ్‌ ఆఫ్‌ కండక్ట్‌(ఎంసీసీ) బృందంలో గెజిటెడ్‌ అధికారితో పాటు పోలీసు, వీడియోగ్రాఫర్‌ ఉంటారు. నియమావళి, ఉల్లంఘన, అభ్యర్థుల ప్రచారం, ఖర్చులపై వీరు నిఘా పెడతారు.