ఏసీబీ వలలో పంచాయతీ కార్యదర్శులు

నిందితులు సత్యనారాయణ, ప్రవీణ్‌

పెందుర్తి, న్యూస్‌టుడే: పెందుర్తి మండలం వాలిమెరక జుత్తాడ పంచాయతీ పరిధిలో ఇంటి పన్నుకు లంచం తీసుకుంటూ ఇద్దరు పంచాయతీ కార్యదర్శులు అవినీతి నిరోధక శాఖకు చిక్కిన ఘటన గురువారం సాయంత్రం చోటుచేసుకుంది. ఇందుకు సంబంధించిన వివరాలిలా ఉన్నాయి. నగరానికి చెందిన ఓ వ్యక్తి జుత్తాడలో ఇల్లు కట్టుకున్నాడు. ఆ ఇంటికి పన్ను విధించాలని గ్రేడ్‌-1 పంచాయతీ కార్యదర్శి వి.సత్యనారాయణ, గ్రేడ్‌-5 పంచాయతీ కార్యదర్శి కొర్ర విక్టర్‌ ప్రవీణ్‌లను కోరాడు. ఆ మేరకు వారిద్దరూ రూ.10 వేలు లంచం డిమాండ్‌ చేశారు. తాను జిల్లా పరిషత్‌లో పని చేస్తున్నానని, అంత లంచం ఇచ్చుకోలేనని చెప్పినా వినిపించుకోలేదు. రూ.3 వేలు లంచం ఇస్తానని చెప్పినా అంగీకరించకపోవడంతో రూ.8 వేలు ఇచ్చేందుకు ఒప్పందం చేసుకున్నాడు. అనంతరం విషయాన్ని అవినీతి నిరోధక శాఖ అధికారులకు బాధితుడు తెలియజేశాడు. ఆ మేరకు గురువారం సాయంత్రం వాలిమెరక జుత్తాడ గ్రామ సచివాలయం వద్ద ఏసీబీ అధికారులు వలపన్ని నిందితులను పట్టుకున్నారు. రాత్రి 11 గంటల వరకు ఏసీబీ అధికారులు విచారణ కొనసాగించారు.