జన్నారం: మంచిర్యాల జిల్లా జన్నారంలో గురువారం నిర్వహించిన భాజపా సభలో ఆ పార్టీ ప్రధాన కార్యదర్శి, ఎంపీ బండి సంజయ్‌ ఆసక్తికర వ్యాఖ్య చేశారు. సంజయ్‌ మాట్లాడుతుండగా కార్యకర్తలు సీఎం.. సీఎం అంటూ పెద్ద ఎత్తున నినాదాలు చేశారు. దీనిపై ఆయన స్పందిస్తూ ‘మీరు సీఎం సీఎం అన్నందుకే నా పోస్టు పోయింది’ అని వ్యాఖ్యానించారు. 

అంతకుముందు సంజయ్‌ మాట్లాడుతూ భారాస, కాంగ్రెస్‌లో ఏ పార్టీ అధికారంలోకి వచ్చినా మధ్యంతర ఎన్నికలు రావడం ఖాయమన్నారు. అందుకే సుస్థిరంగా ఉండే భాజపాకే పట్టం కట్టాలని ప్రజలకు పిలుపునిచ్చారు. ‘భారాస గెలిస్తే కేటీఆర్‌ను సీఎం చేయాలని కేసీఆర్‌ చూస్తున్నారు. అదే జరిగితే హరీశ్‌రావు, సంతోష్‌ వేరు కుంపటి పెట్టి ప్రభుత్వాన్ని కూలుస్తారు. ఒకవేళ కాంగ్రెస్‌ గెలిస్తే రేవంత్‌రెడ్డి ముఖ్యమంత్రి పీఠం ఎక్కేందుకు చూస్తారు. అదే జరిగితే ఉత్తమ్‌కుమార్‌రెడ్డి, భట్టి విక్రమార్క, కోమటిరెడ్డి వెంకట్‌రెడ్డి ప్రభుత్వాన్ని కూలుస్తారు’ అని బండి సంజయ్‌ అన్నారు.