ఇప్పటికే 32 మంది పింఛనుదారుల్ని పొట్టన పెట్టుకున్నారు
కర్నూలు జిల్లా కౌతాళం, గూడూరు ప్రజాగళం సభల్లో చంద్రబాబు ధ్వజం
జగన్‌ మ్యానిఫెస్టోకు సున్నా మార్కులని ఎద్దేవా  
రాయలసీమ ప్రాజెక్టులన్నీ పూర్తి చేస్తామని హామీ

ఈనాడు, కర్నూలు: ఇంటివద్ద పింఛన్లు ఇవ్వకుండా గత నెలలో 32 మంది పింఛనుదారుల్ని ముఖ్యమంత్రి పొట్టన పెట్టుకున్నారని తెదేపా అధినేత చంద్రబాబు నాయుడు ధ్వజమెత్తారు. రాజకీయ పిచ్చితో పేదల ప్రాణాలతో చెలగాటమాడొద్దని హితవు పలికారు. ఇలా ప్రాణాలు పోగొట్టుకున్నవారి ఆత్మలు ముఖ్యమంత్రిని భూస్థాపితం చేస్తాయని హెచ్చరించారు. ఆదివారం ఆయన కర్నూలు జిల్లా మంత్రాలయం నియోజకవర్గంలోని కౌతాళం, కోడుమూరు నియోజకవర్గంలోని గూడూరుల్లో నిర్వహించిన ప్రజాగళం బహిరంగ సభల్లో మాట్లాడారు. పింఛన్లను లబ్ధిదారుల ఇంటికి తీసుకెళ్లి అందించాలన్నారు. రూ.200 పింఛన్‌ను రూ.2వేలకు పెంచింది తానేనన్నారు. తెదేపా అధికారంలోకి రాగానే పింఛన్‌ను రూ.4 వేలకు పెంచుతామని.. పెంచిన మొత్తాన్ని ఈ ఏప్రిల్‌ నెల నుంచి ఇస్తామని పునరుద్ఘాటించారు.

జగన్‌ రాయలసీమ ద్రోహి

సీఎం జగన్‌ రాయలసీమ ద్రోహి అని, సీమకు కేటాయించిన 102 సాగునీటి ప్రాజెక్టులను రద్దు చేశారని చంద్రబాబు మండిపడ్డారు. ఆర్డీఎస్‌కు రూ.1,955 కోట్లు ఇస్తే ఖర్చు పెట్టలేదని, వేదవతి ప్రాజెక్టుకు రూ.1,942 కోట్లు ఇస్తే పంప్‌హౌస్‌, కాలవ పనులను నిలిపివేశారని ధ్వజమెత్తారు. గుండ్రేవులను కూడా గాలికొదిలేశారన్నారు. ఈ ముఖ్యమంత్రికి నీటి విలువ తెలియదన్నారు. తాము అధికారంలోకి వచ్చిన వెంటనే పెండింగ్‌ ప్రాజెక్టులన్నీ పూర్తి చేస్తామని హామీ ఇచ్చారు.

విజన్‌ లేని సీఎం

ముఖ్యమంత్రికి ఒక విజన్‌.. ప్రజల్ని ఆర్థికంగా, సామాజికంగా పైకి తీసుకొచ్చే సామర్థ్యం ఉండాలని చంద్రబాబు అన్నారు. జగన్‌మోహన్‌రెడ్డికి ప్రజల ఆస్తుల్ని దోచుకోవాలన్న ఆలోచన తప్ప... వారిపై ఎలాంటి ప్రేమా లేదన్నారు. హైదరాబాద్‌ను మించిన రాజధానిని అమరావతిలో నిర్మించాలనుకుంటే దాన్ని నాశనం చేశారని మండిపడ్డారు. జగన్‌రెడ్డి నవరత్నాల పేరుతో నవమోసాలు చేశారని దుయ్యబట్టారు. వైకాపా ఐదేళ్ల పాలనలో ప్రజల జీవితాల్లో ఏమైనా మార్పు వచ్చిందా అని ప్రశ్నించారు. రాయలసీమలో 52 అసెంబ్లీ సీట్లుంటే... ప్రజలకు అబద్ధాలు చెప్పి, మోసాలు చేసి, ఓట్లు దండుకుని 49 సీట్లు గెలిచి చివరకు ఈ ప్రాంతానికి ఏమీ చేయలేదని విమర్శించారు.

వలసలతో యువతకు పెళ్లిళ్లు కావడం లేదు

కర్నూలు జిల్లా నుంచి భారీగా వలసలు ఉంటున్నాయని, ఒక్క మంత్రాలయం నియోజకవర్గం నుంచే ఉపాధి కోసం ఏటా 80 వేల మంది వలసవెళుతున్నారని చంద్రబాబు ఆవేదన వ్యక్తం చేశారు. సరైన ఉద్యోగాలు లేక, ఉపాధి దొరకక, వలసలు వెళ్తుండటంతో కౌతాళం వంటి ప్రాంతాల్లో పలువురికి పెళ్లిళ్లు కూడా కావడం లేదని ఆవేదన వ్యక్తం చేశారు. కూటమి అధికారంలోకి వచ్చిన వెంటనే వలసల నియంత్రణకు చర్యలు తీసుకుంటామన్నారు.

జగన్‌ మ్యానిఫెస్టో అట్టర్‌ఫ్లాప్‌

జగన్‌ మ్యానిఫెస్టోకు ప్రజలు జీరో మార్కులు వేస్తున్నారని చంద్రబాబు ఎద్దేవా చేశారు. ఆయన మ్యానిఫెస్టో అట్టర్‌ఫ్లాప్‌ అయ్యిందన్నారు. అందులో ఏమీ లేదని... జగన్‌ చేతులెత్తేశారని పేర్కొన్నారు. బటన్‌ నొక్కితే ఆదాయం వస్తుందా అని నిలదీశారు. తెదేపా సూపర్‌ సిక్స్‌ హామీలను ప్రజలకు వివరించారు. డ్వాక్రా సంఘాలకు రూ.10 లక్షల వడ్డీ లేని రుణాలు ఇస్తామని ప్రకటించారు.

నాసిరకం మద్యంతో ప్రాణాలు తోడేస్తున్నారు

రాష్ట్రంలో రూ.60 మద్యం సీసాను రూ.200కు విక్రయిస్తున్నారని, ఇందులో రూ.140 జగన్‌ జేబులోకి వెళ్తున్నాయని తెదేపా అధినేత ఆరోపించారు. నాణ్యత లేని, హానికరమైన మద్యంతో సీఎం మహిళల పుస్తెలు తెంచేస్తున్నారని మండిపడ్డారు.

నాణ్యమైన మద్యం కోసం కర్నూలు జిల్లాలోని పలు ప్రాంతాలవారు కర్ణాటక వెళ్తున్నారని చంద్రబాబు చెప్పారు. జగన్‌ను ఇంటికి పంపితేనే రాష్ట్రానికి రక్షణ ఉంటుందన్నారు. రాష్ట్రాన్ని నిలబెట్టడానికి, ప్రజలకు న్యాయం చేయడానికే తెదేపా, భాజపా, జనసేన కూటమిగా ఏర్పడ్డాయన్నారు. మంత్రాలయం అభ్యర్థి రాఘవేంద్రరెడ్డి, కోడుమూరు అభ్యర్థి బొగ్గుల దస్తగిరి, కర్నూలు లోక్‌సభ అభ్యర్థి బస్తిపాటి  నాగరాజులను భారీ మెజారిటీతో గెలిపించాలని కోరారు.