10 మంది విజేతలు
తొలిసారి ఎన్నికైన వారు నలుగురు

 ఈనాడు, హైదరాబాద్‌: రాష్ట్ర అసెంబ్లీలో మహిళా ఎమ్మెల్యేల సంఖ్య పెరగనుంది. తొలిసారి రెండంకెల సంఖ్యలో మహిళలు అసెంబ్లీ ఎన్నికల్లో విజయకేతనం(telangana election results) ఎగరవేశారు. రాష్ట్రంలోని 119 శాసనసభ నియోజకవర్గాలకు జరిగిన ఎన్నికల్లో ప్రధాన పార్టీల నుంచి 34 మంది మహిళలు బరిలో నిలిచారు. అత్యధికంగా భాజపా 13 మంది అతివలకు టికెట్లు ఇచ్చింది. కాంగ్రెస్‌ 12 మందికి, భారాస 8 మందికి, జనసేన ఒకరికి టికెట్లు ఇచ్చాయి. అన్ని పార్టీలు, స్వతంత్రులు కలిపి మొత్తంగా 221 మంది మహిళలు ఈ ఎన్నికల్లో పోటీ చేశారు. వీరందరిలో 10 మంది గెలుపొందారు. 2014 నుంచి చూస్తే.. 10 మంది నారీమణులు అసెంబ్లీ గడప తొక్కనుండడం ఇదే మొదటిసారి. తాజాగా విజయం సాధించిన మహిళల్లో కాంగ్రెస్‌ నుంచి ఆరుగురు, భారాస అభ్యర్థులు నలుగురు ఉన్నారు. గెలిచిన 10 మందిలో నలుగురు తొలిసారి అసెంబ్లీ ఎన్నికల్లో పోటీ చేసినవారే. వీరిలో ముగ్గురు కాంగ్రెస్‌ నుంచి, మరొకరు భారాస నుంచి విజయం సాధించారు.