ఇంటర్నెట్‌డెస్క్‌: మధ్యప్రదేశ్‌లో ఎన్నికల పోలింగ్‌ ప్రారంభమైంది. అక్కడ మొత్తం 230 స్థానాలకు ఎన్నికలు జరుగుతున్నాయి. ఉదయం 8 గంటల నుంచి ప్రారంభమైన పోలింగ్‌.. సాయంత్రం 5 గంటల వరకు కొనసాగనుంది. పీసీసీ అధ్యక్షుడు కమల్‌నాథ్‌ ఛింద్వాఢాలో తన ఓటు హక్కును వినియోగించుకున్నారు. మధ్యప్రదేశ్‌లో ఎస్టీ రిజర్వుడు సీట్లు 47, ఎస్సీ రిజర్వుడు 35 ఉన్నాయి. 

మరోవైపు ఛత్తీస్‌గఢ్‌లో మిగిలిన 70 స్థానాలకు నేడు రెండో విడత పోలింగ్‌ కొనసాగుతోంది. అక్కడ ఈ నెల 7న 20 నియోజకవర్గాల్లో తొలివిడత పోలింగ్‌ జరిగింది. ఎస్‌పీ, బీఎస్‌పీ, ఆప్‌, జేడీయూ తదితర పార్టీలు బరిలో ఉన్నప్పటికీ.. రెండు రాష్ట్రాల్లో భాజపా, కాంగ్రెస్‌ల మధ్యే ప్రధాన పోటీ నెలకొని ఉంది. రెండో విడత జరుగుతున్న పోలింగ్‌లో పశ్చిమ రాయ్‌పుర్‌ స్థానంలో అత్యధికంగా 26 మంది పోటీలో ఉండగా.. డౌండీలోహారా స్థానంలో అత్యల్పంగా నలుగురు బరిలో ఉన్నారు. రెండోవిడత పోలింగు జరుగుతున్న 70 స్థానాల్లో క్రితం సారి కాంగ్రెస్‌ 50 చోట్ల గెలుపొందగా, భాజపా 13 సీట్లలో విజయం సాధించింది. జనతా కాంగ్రెస్‌ ఛత్తీస్‌గఢ్‌ నాలుగు, బీఎస్‌పీ రెండు స్థానాల్లో గెలుపొందాయి.