దిల్లీ: మధ్యప్రదేశ్‌, ఛత్తీస్‌గఢ్, రాజస్థాన్‌ అసెంబ్లీ ఎన్నికల ఫలితాల్లో (Assembly election Results) భాజపాకు స్పష్టమైన మెజార్టీ కనిపిస్తోంది. ఇప్పటివరకూ వెలువడిన ఫలితాల ప్రకారం.. పలువురు ప్రముఖుల గెలుపోటములు ఇలా ఉన్నాయి.

• 77 వేల భారీ మెజార్టీతో మధ్యప్రదేశ్‌ ముఖ్యమంత్రి, భాజపా అభ్యర్థి శివరాజ్‌ సింగ్ చౌహన్‌ బుద్నీ నుంచి విజయం సాధించారు. మధ్యప్రదేశ్ మాజీ ముఖ్యమంత్రి, కాంగ్రెస్‌ అభ్యర్థి కమల్‌నాథ్‌ ఛింద్వాఢాలో ఆధిక్యంలో ఉన్నారు.
• రాజస్థాన్‌లో విద్యాధర్ నగర్ నుంచి భాజపా అభ్యర్థి దియా కుమారి విజయం దక్కించుకున్నారు. రాజస్థాన్ సీఎం పదవికోసం పోటీ పడుతున్నవారిలో ఈమె పేరు కూడా ఉందని ప్రచారం జరుగుతోంది.
• రాజస్థాన్‌లో భాజపా అభ్యర్థి రాజ్యవర్ధన్‌ సింగ్‌ రాఠోడ్‌ జోత్వాఢాలో కాంగ్రెస్ అభ్యర్థి అభిషేక్ చౌధరీపై విజయం సాధించారు. 
• సర్దార్‌పురలో రాజస్థాన్‌ ముఖ్యమంత్రి అశోక్‌ గహ్లోత్‌ 26 వేల ఓట్ల తేడాతో విజయం సాధించగా.. మాజీ ఉప ముఖ్యమంత్రి సచిన్‌ పైలట్‌ టోంక్ నుంచి గెలుపొందారు.  
• రాజస్థాన్‌లో మాజీ సీఎం, భాజపా అభ్యర్థి వసుంధరా రాజే ఝల్రాపటన్‌ స్థానంలో విజయం సాధించారు. కాంగ్రెస్‌ అభ్యర్థి రామ్‌లాల్‌ను ఓడించారు. 50వేల ఓట్లకు పైగా తేడాతో ఈ విజయం దక్కింది. 
• ఛత్తీస్‌గఢ్‌లో సీఎం భూపేశ్ బఘేల్‌ పటాన్‌ స్థానం నుంచి, మాజీ ముఖ్యమంత్రి రమణ్‌ సింగ్‌ రాజనంద్‌గావ్‌ నియోజకవర్గం నుంచి విజయం సాధించారు.