హైదరాబాద్‌: కర్ణాటకలో సమస్య ఉంటే తెలంగాణలో రైతులు ఆందోళన చేస్తారా? అని కర్ణాటక ముఖ్యమంత్రి సిద్ధరామయ్య ప్రశ్నించారు. ఇక్కడ నిరసన చేసేవాళ్లు కర్ణాటక  రైతులు కాదని అన్నారు. ఎన్నికల ప్రచారంలో భాగంగా హైదరాబాద్‌ వచ్చిన ఆయన విలేకరులు సమావేశంలో మాట్లాడారు. కర్ణాటక రాష్ట్రానికి వచ్చి చూస్తే.. కాంగ్రెస్‌ పాలన ఏంటో కేసీఆర్‌కు అర్థమవుతుందని తెలిపారు. తెలంగాణలో వచ్చేది కాంగ్రెస్‌ ప్రభుత్వమేనని ధీమా వ్యక్తం చేశారు.ఆరు గ్యారంటీలను కచ్చితంగా అమలు చేసి తీరుతామన్నారు. కర్ణాటకలో కాంగ్రెస్‌ హామీలు అమలవ్వలేదని అసత్యాలు చెబుతున్నారనీ, కర్ణాటకలో అభివృద్ధి గురించి కేసీఆర్‌, కేటీఆర్‌, భాజపా చేస్తున్న ప్రచారాలు అబద్ధమని సిద్ధరామయ్య పేర్కొన్నారు.