Road Accidents: రహదారులు రక్తసిక్తం.. గంటకు 19 మంది బలి!

దిల్లీ: దేశవ్యాప్తంగా ఏటా రోడ్డు ప్రమాదాలు (Road Accidents) పెరుగుతూనే ఉన్నాయి. గతేడాదిలోనే 4.6లక్షల ప్రమాదాలు చోటుచేసుకున్నట్లు తాజా నివేదిక వెల్లడించింది. అంతకుముందు ఏడాదితో పోలిస్తే ఈ సంఖ్య 12శాతం పెరగడం ఆందోళనకర విషయం. మొత్తంగా దేశంలో ప్రతి గంటకు 53 రోడ్డు ప్రమాదాలు జరుగుతుండగా.. వీటిలో గంటకు 19 మంది చొప్పున ప్రాణాలు కోల్పోతున్నట్లు తాజా నివేదిక తెలిపింది.

‘భారత్‌లో రోడ్డు ప్రమాదాలు-2022’ సంబంధించి కేంద్ర రోడ్డు రవాణా, రహదారుల మంత్రిత్వశాఖ (MoRTH) తాజా నివేదిక విడుదల చేసింది. 2022లో అన్ని రాష్ట్రాలు/కేంద్రపాలిత ప్రాంతాల్లో మొత్తం 4,61,312 ప్రమాదాలు చోటుచేసుకోగా.. అందులో 1,68,491 మంది ప్రాణాలు కోల్పోయారు. మరో 4,43,366 మంది గాయాలపాలయ్యారు. అంతకుముందు ఏడాదితో పోలిస్తే ప్రమాదాలు 11.9శాతం పెరగగా.. మరణాలు 9.4శాతం పెరిగాయి. గాయపడిన  వారి సంఖ్య 15.3శాతం పెరిగింది.

• 2021లో 1.53లక్షల మంది రోడ్డు ప్రమాదాల్లో ప్రాణాలు కోల్పోగా.. 2022లో ఈ సంఖ్య 1.68లక్షలకు పెరిగింది.
• రోడ్డు ప్రమాదాలకు అతివేగమే ప్రధాన కారణంగా కనిపిస్తోంది. నమోదైన మొత్తం ప్రమాదాల్లో 71.2శాతం మరణాలు అతివేగం వల్లే చోటుచేసుకోగా.. రాంగ్‌ సైడ్‌లో ప్రయాణం వల్ల జరిగిన ప్రమాదాల్లో 5.4శాతం మంది మరణించారు.
• మొత్తం రోడ్డు ప్రమాదాల్లో జాతీయ రహదారుల్లో 32.9శాతం, రాష్ట్ర రహదారుల్లో 23.1శాతం, మరో 43.9శాతం ప్రమాదాలు ఇతర రహదారులపై జరిగాయి.
• బైక్‌ సంబంధిత ప్రమాదాలు తొలిస్థానంలో నిలిచాయి. కార్లు, జీపులు, టాక్సీ ప్రమాదాలు రెండోస్థానంలో ఉన్నాయి.
• రోడ్డు ప్రమాదాలు అధికంగా తమిళనాడులో (64 వేలు), తర్వాత మధ్యప్రదేశ్‌లో చోటుచేసుకున్నాయి. ప్రమాదాల్లో ప్రాణాలు కోల్పోయిన వారి సంఖ్య మాత్రం ఉత్తర్‌ప్రదేశ్‌లో అధికంగా ఉంది.
• 67శాతం ప్రమాదాలు నేరుగా ఉన్న రోడ్లపైనే జరిగాయి. మూలమలుపులు, గుంతులు, వంపుల రోడ్లలో కలిపి మొత్తం 13.8శాతం ప్రమాదాలు చోటుచేసుకున్నాయి.
• రోడ్డు ప్రమాద మరణాల్లో వెనకనుంచి వచ్చి ఢీకొట్టిన ఘటనల్లోనే అధికంగా (19.5) ఉన్నాయి. ఢీకొట్టి వెళ్లిపోవడం (Hit and Run) 18.1శాతం, తలకు గాయాలు (Head on Collission) 15.7శాతంగా ఉన్నాయి.
• ఈ ప్రమాదాల్లో 18-45 ఏళ్ల వయసున్న వారే అధికంగా బాధితులుగా మారుతున్నారు. 2022లో ప్రమాదాల్లో 66.5శాతం బాధితులు వీరే.
• ఇదిలాఉంటే, దేశంలో ఏటా సంభవిస్తోన్న రోడ్డు ప్రమాదాలు,  వీటిలో మరణాల సంఖ్యను 2024 నాటికి సగానికి తగ్గించాలని కేంద్ర ఉపరితల రవాణాశాఖ మంత్రి నితిన్‌ గడ్కరీ లక్ష్యాన్ని నిర్దేశించారు.