Tollywood: పేరు ఊరిస్తోంది

విజయవంతమైన కలయికల్ని పునరావృతం చేయడమన్నది చిత్రసీమలో తరచూ కనిపిస్తూనే ఉంటుంది. ఈ తరహావి ప్రేక్షకుల్లో అంచనాల్ని అమాంతం పెంచేస్తుంటాయి. అంతేకాదు ఇవి మార్కెట్‌ను బలంగా ప్రభావితం చేస్తుంటాయి. అయితే ఇప్పుడీ ట్రెండ్‌ సినిమా పేర్ల విషయంలోనూ కనిపిస్తోంది. హిట్టు కలయికల తరహాలోనే క్లాసిక్‌ టైటిల్స్‌ను పునరావృతం చేయడమన్నది సినీప్రియుల్లో ఆసక్తి రేకెత్తిస్తోంది. మరి ఇప్పుడలా విజయవంతమైన సినిమా పేర్లతో ప్రేక్షకుల్ని అలరించేందుకు సిద్ధమవుతున్న తారలెవరు? వారి చిత్ర విశేషాలేంటి?

సినిమాకి ప్రధాన ప్రచార అస్త్రంగా నిలిచే వాటిలో పేరు కూడా ఒకటి. ఏ చిత్రానికైనా సగం ఆకర్షణ దాని పేరుతోనే వస్తుంది. అందుకే దర్శక నిర్మాతలు ఆ పేరు ఖరారు చేయడం కోసం తెర వెనుక బోలెడంత కసరత్తు చేస్తుంటారు. ఈ క్రమంలోనే సినీ ప్రియుల్ని ఆకర్షించేందుకు విజయవంతమైన సినిమా పేర్లను పునరావృతం చేసి ఊరించే ప్రయత్నం చేస్తుంటారు. నిజానికి ఇలా క్లాసిక్‌ టైటిల్స్‌తో అలరించడమన్నది చిత్రసీమకు కొత్తేమీ కాదు. ‘మల్లీశ్వరి’, ‘మిస్సమ్మ’, ‘దేవదాసు’ల నుంచి మొదలు ‘గీతాంజలి’, ‘తొలిప్రేమ’, ‘ఖుషి’ వరకు ఎన్నో విజయవంతమైన చిత్రాల పేర్లను ఈతరం తారలు తమ సినిమాలతో పునరావృతం చేశారు. వీటిలో చాలా చిత్రాలు బాక్సాఫీస్‌ ముందు సత్తా చాటి ఆ పేరుకున్న గొప్పతనాన్ని నిలబెట్టాయి. ఇప్పుడిదే పంథాలో సినీప్రియుల్ని అలరించేందుకు ఇంకొన్ని సినిమాలు బాక్సాఫీస్‌ ముందుకు దూసుకొస్తున్నాయి.

• ‘కూలీ’... ఈ పేరుకు తెలుగు చిత్రసీమలోనే కాదు బాలీవుడ్‌లోనూ మంచి క్రేజ్‌ ఉంది. ఈ పేరుతో తెలుగులో వెంకటేశ్‌- రాఘవేంద్రరావు కలయికలో వచ్చిన ‘కూలీ నెం.1’, అమితాబ్‌ బచ్చన్‌ - మన్‌మోహన్‌ దేశాయ్‌ల ‘కూలీ’ బాక్సాఫీస్‌ ముందు భారీ విజయాల్ని అందుకున్నాయి. ఇప్పుడిదే పేరుతో థియేటర్లలో జోరు చూపించేందుకు అగ్ర కథానాయకుడు రజనీకాంత్‌ సిద్ధమయ్యారు. ఆయన లోకేశ్‌ కనగరాజ్‌తో చేస్తున్న యాక్షన్‌ థ్రిల్లర్‌కు ఇదే పేరును ఖరారు చేసిన సంగతి తెలిసిందే. బంగారం అక్రమ రవాణా నేపథ్యంలో సాగే ఆసక్తికర కథాంశంతో ఈ చిత్రం రూపొందనుంది. త్వరలో చిత్రీకరణ ప్రారంభించుకోనున్న ఈ సినిమా పాన్‌ ఇండియా స్థాయిలో ‘కూలీ’ పేరుతోనే విడుదల కానుంది. నటుడు మోహన్‌బాబు కెరీర్‌లో మంచి విజయాన్ని అందుకున్న సినిమాల్లో ‘దొంగ పోలీస్‌’ ఒకటి. ఇప్పుడదే పేరుతో రవితేజ హీరోగా ఓ కొత్త సినిమాని ప్రేక్షకుల ముందుకు తీసుకురానున్నారని సమాచారం. తను త్వరలో ‘జాతిరత్నాలు’ ఫేమ్‌ అనుదీప్‌ దర్శకత్వంలో ఓ చిత్రం చేయనున్న సంగతి తెలిసిందే. వినోదం నిండిన యాక్షన్‌ కథాంశంతో రూపొందనున్న ఆ సినిమాలో రవితేజ దొంగగా.. కథానాయిక పోలీసుగా కనిపించనున్నట్లు ప్రచారం వినిపిస్తోంది. అందుకే ఈ కథాంశానికి తగ్గట్లుగానే ‘దొంగ - పోలీస్‌’ అనే పేరు పరిశీలిస్తున్నట్లు తెలిసింది.
• ‘తొలిప్రేమ’, ‘ఖుషి’.. పవన్‌ కల్యాణ్‌ సినీ కెరీర్‌లో భారీ విజయాలందుకున్న చిత్రాలివి. ఇప్పటికే ఈ టైటిళ్లతో వరుణ్‌తేజ్‌, విజయ్‌ దేవరకొండ సినిమాలు చేసిన సంగతి తెలిసిందే. ఇప్పుడు పవన్‌ సినీ జాబితాలోని మరో క్లాసిక్‌ హిట్‌ టైటిల్‌తో ప్రేక్షకుల్ని పలకరించేందుకు నితిన్‌ సిద్ధమవుతున్నారు. అదే శ్రీరామ్‌ వేణు తెరకెక్కిస్తున్న ‘తమ్ముడు’. గమ్మత్తైన విషయం ఏంటంటే ఈ రెండింటి మధ్య ఓ పోలిక ఉంది. పవన్‌ ‘తమ్ముడు’ తరహాలోనే నితిన్‌ ‘తమ్ముడు’లోనూ క్రీడా నేపథ్య అంశాలకు ప్రాధాన్యం ఉంది. అందులో పవన్‌ బాక్సర్‌గా కనిపిస్తే.. ఇందులో నితిన్‌ ఆర్చరీ ఆటగాడిగా దర్శనమివ్వనున్నారు. ప్రస్తుతం చిత్రీకరణ దశలో ఉన్న ఈ సినిమా త్వరలో ప్రేక్షకుల ముందుకు రానుంది. ఈవీవీ సత్యనారాయణ దర్శకత్వంలో వచ్చిన విజయవంతమైన వినోదాత్మక చిత్రాల్లో ‘ఆ.. ఒక్కటీ అడక్కు’ ఒకటి. రాజేంద్రప్రసాద్‌ హీరోగా నటించిన ఈ సినిమా అప్పట్లో ప్రేక్షకుల్ని కడుపుబ్బా నవ్వించింది. ఇప్పుడా పేరుతోనే సినీప్రియుల్ని మరోమారు నవ్వించేందుకు ఈవీవీ తనయుడు అల్లరి నరేశ్‌ సిద్ధమయ్యారు. ఆయన హీరోగా నటించిన ఈ చిత్రాన్ని మల్లి అంకం తెరకెక్కించారు. పెళ్లి కాని కుర్రాళ్ల కష్టాల్ని దీంట్లో వినోదాత్మకంగా చూపించినట్లు ఇప్పటికే విడుదలైన టీజర్‌, ట్రైలర్లను బట్టి అర్థమవుతోంది. మరి ఇది తెరపై ప్రేక్షకుల్ని ఏస్థాయిలో నవ్విస్తుందో తెలియాలంటే మే 3వరకు వేచి చూడక తప్పదు.
• సినిమాల నుంచి కొంతకాలం విరామం తీసుకున్న నారా రోహిత్‌ ‘ప్రతినిధి 2’తో తిరిగి తెరపైకి వస్తున్న సంగతి తెలిసిందే. ప్రస్తుతం ఆయన వెంకటేశ్‌ హిట్‌ సినిమా ‘సుందరకాండ’ టైటిల్‌తో ఓ సినిమా చేస్తున్నారు. ఇది నారా రోహిత్‌కు 20వ చిత్రం. దీని ద్వారా వెంకటేశ్‌ నిమ్మలపూడి అనే కొత్త దర్శకుడు తెరకు పరిచయం కానున్నారు. చిత్రీకరణ దశలో ఉన్న ఈ రొమాంటిక్‌ కామెడీ ఎంటర్‌టైనర్‌ సెప్టెంబరు 6న థియేటర్లలోకి రానుంది. ప్రస్తుతం ఈ పేరు ఒరవడిని కొనసాగిస్తున్న తారల జాబితాలో నటి కాజల్‌ చిత్రం కూడా ఒకటుంది. అదే అఖిల్‌ డేగల దర్శకత్వంలో ముస్తాబైన ‘సత్యభామ’. గతంలో ఇదే పేరుతో ప్రముఖ దర్శకుడు రాఘవేంద్రరావు ఓ విజయవంతమైన చిత్రం చేశారు. ఇప్పుడా పేరుతోనే యాక్షన్‌ విందు రుచి చూపించేందుకు సిద్ధమైంది కాజల్‌. ఆమె పోలీసు పాత్రలో నటించిన ఈ సినిమా మే 17న థియేటర్లలోకి రానున్నట్లు ఇటీవల ప్రకటించారు.