Pawankalyan: వీరమల్లు.. పోరాట విల్లు

కథానాయకుడు పవన్‌ కల్యాణ్‌, దర్శకుడు క్రిష్‌ కాంబినేషన్‌లో రూపొందుతోన్న పాన్‌ ఇండియా చిత్రం ‘హరి హర వీరమల్లు’. ఎ.దయాకర్‌ రావు నిర్మాత. ఎం.ఎం.రత్నం సమర్పిస్తున్నారు. నిధి అగర్వాల్‌ కథానాయిక. నర్గిస్‌ ఫక్రి, అర్జున్‌ రాంపాల్‌ కీలక పాత్రలు పోషిస్తున్నారు. ఈ సినిమా ఇప్పటికే 50శాతం చిత్రీకరణ పూర్తి చేసుకుంది.   శుక్రవారం నుంచి హైదరాబాద్‌లో వేసిన ఓ ప్రత్యేక సెట్లో కొత్త షెడ్యూల్‌ ప్రారంభం కానుంది. ఇందులో భాగంగా పవన్‌ కల్యాణ్‌పై ఓ భారీ యాక్షన్‌ సీక్వెన్స్‌ చిత్రీకరించనున్నారు. దీని కోసం పవన్‌   ఇప్పటికే సన్నాహాలు ప్రారంభించారు. హాలీవుడ్‌ స్టంట్‌ మాస్టర్‌ టోడోర్‌ లాజరోవ్‌ ఆధ్వర్యంలో ఈ రిహార్సల్స్‌ జరుగుతున్నాయి. దీనికి సంబంధించిన ఫొటోలను చిత్ర బృందం గురువారం సామాజిక మాధ్యమాల ద్వారా విడుదల చేసింది. ఇవి ప్రస్తుతం నెట్టింట అందరినీ ఆకట్టుకుంటున్నాయి. 17వ శతాబ్దం నేపథ్యంలో సాగే ఓ చారిత్రక కథాంశంతో రూపొందుతున్న చిత్రమిది. ఈ సినిమాకి సాయిమాధవ్‌ బుర్రా సంభాషణలు అందిస్తున్నారు. ఎం.ఎం.కీరవాణి స్వరాలు సమకూరుస్తున్నారు. జ్ఞానశేఖర్‌ ఛాయాగ్రాహణ బాధ్యతలు నిర్వర్తిస్తున్నారు.