Macherla Niyojakavargam: మాచర్లలో కేథరిన్‌

నితిన్‌ కథానాయకుడిగా తెరకెక్కుతున్న ‘మాచర్ల నియోజకవర్గం’లో మరో కథానాయికగా కేథరిన్‌ ఎంపికైంది. ఆ విషయాన్ని మంగళవారం చిత్రబృందం ఓ ప్రకటనలో వెల్లడించింది. ఎం.ఎస్‌.రాజశేఖర్‌రెడ్డి దర్శకత్వంలో తెరకెక్కుతున్న ఈ సినిమాలో నితిన్‌కి జోడీగా కృతిశెట్టి నటిస్తున్న విషయం తెలిసిందే. ఇందులో ఉన్న మరో నాయికకి చోటుండగా, ఆ స్థానాన్ని కేథరిన్‌తో భర్తీ చేశారు. ప్రస్తుతం హైదరాబాద్‌లో జరుగుతున్న షెడ్యూల్‌లోనే కేథరిన్‌ చిత్రీకరణలో పాల్గొంటుంది. నితిన్‌, కేథరిన్‌ జోడీగా నటిస్తున్న తొలి సినిమా ఇదే. సుధాకర్‌రెడ్డి, నిఖితారెడ్డి నిర్మిస్తున్నారు. రాజ్‌కుమార్‌ ఆకెళ్ల సమర్పకులు. నితిన్‌ని ఇదివరకెప్పుడూ చూడని ఓ సరికొత్త అవతారంలో ప్రేక్షకులు చూడనున్నారని సినీ వర్గాలు తెలిపాయి. ఏప్రిల్‌ 29న ప్రేక్షకుల ముందుకు రానున్న ఈ సినిమాకి ఛాయాగ్రహణం: ప్రసాద్‌ మూరెళ్ల, సంగీతం: మహతి స్వరసాగర్‌, కూర్పు: కోటగిరి వెంకటేశ్వరరావు, మాటలు: మామిడాల తిరుపతి, కళ: సాహి సురేష్‌.