Priyanka Gandhi: వారణాసిలో మోదీపై ప్రియాంక పోటీ చేస్తే...! సంజయ్‌ రౌత్ ఆసక్తికర వ్యాఖ్యలు

ముంబయి: శివసేన(యూబీటీ) నేత సంజయ్‌ రౌత్(Sanjay Raut) కీలక వ్యాఖ్యలు చేశారు. కాంగ్రెస్ ప్రధాన కార్యదర్శి ప్రియాంకాగాంధీ(Priyanka Gandhi) సార్వత్రిక ఎన్నికల్లో వారణాసి(Varanasi) స్థానం నుంచి పోటీ చేస్తే తప్పక గెలుస్తారని జోస్యం చెప్పారు. ఆ నియోజకవర్గానికి ప్రధాని నరేంద్రమోదీ ప్రాతినిధ్యం వహిస్తోన్న సంగతి తెలిసిందే.

‘వారణాసి ప్రజలు ప్రియాంకాగాంధీ(Priyanka Gandhi)ని కోరుకుంటున్నారు. రానున్న సార్వత్రిక ఎన్నికల్లో ఆమె వారణాసి నుంచి ప్రధాని మోదీకి పోటీగా బరిలో దిగితే తప్పక విజయం సాధిస్తారు. రాయబరేలీ, వారణాసి, అమేఠీలో భాజపాకు గట్టిపోటీ ఉంటుంది’ అని వ్యాఖ్యానించారు. ఎన్నికల్లో ప్రియాంక పోటీపై రెండురోజుల క్రితం ఆమె భర్త రాబర్ట్ వాద్రా స్పందించిన సంగతి తెలిసిందే. ‘ఆమె పార్లమెంట్‌(Parliament)లో అడుగుపెడుతుందని నేను భావిస్తున్నాను. అందుకు ఆమెకు అన్ని అర్హతలున్నాయి. ఆ విషయంలో కాంగ్రెస్ పార్టీ తగిన ప్రణాళిక రచిస్తుందని అనుకుంటున్నాను’ అని అన్నారు. 

‘నిన్ను మోసం చేసినవాడు.. రాష్ట్రాన్ని మోసం చేయరా అమ్మా?’

ఇదిలా ఉంటే.. ఎన్‌సీపీ(NCP) అధినేత శరద్‌ పవార్( Sharad Pawar), తన సోదరుడి కుమారుడు అజిత్ పవార్‌(Ajit Pawar) మధ్య జరిగిన భేటీ గురించి అడిగిన ప్రశ్నకు సంజయ్‌ రౌత్‌ బదులిచ్చారు. ప్రధాని మోదీ.. పాకిస్థాన్‌ మాజీ ప్రధాని నవాజ్‌ షరీఫ్‌ను కలుసుకోగాలేనిది.. వారిద్దరు ఎందుకు కలుసుకోకూడదని ప్రశ్నించారు.  అజిత్‌- శరద్‌పవార్‌ భేటీకి అంత ప్రాధాన్యత ఇవ్వనక్కర్లేదని రౌత్‌ తెలిపారు. ప్రతిపక్షాల కూటమి ‘ఇండియా’ సమావేశానికి అజిత్‌ను ఆహ్వానించి ఉంటారని తాను భావిస్తున్నట్లు చెప్పారు. అలాగే మహారాష్ట్రలోని ప్రస్తుత ప్రభుత్వం పట్ల ఎవరూ సంతృప్తిగా లేరని రౌత్ అన్నారు.