మహేశ్వరికి పారిస్‌ కోటా స్థానం

దిల్లీ: షూటింగ్‌లో భారత్‌కు మరో ఒలింపిక్‌ కోటా స్థానం ఖాయమైంది. దోహాలో జరిగిన అర్హత టోర్నీలో రజతం గెలిచిన మహేశ్వరి చౌహాన్‌ పారిస్‌ బెర్తు సాధించింది. ఆదివారం మహిళల స్కీట్‌ ఫైనల్లో మహేశ్వరి 3-4తో ఫ్రాన్సిస్కా (చిలీ) చేతిలో ఓడింది. క్వాలిఫికేషన్లో 121 పాయింట్లతో నాలుగో స్థానంలో నిలిచి ముందంజ వేసిన మహేశ్వరి.. ఫైనల్లో అదిరే ప్రదర్శన చేసింది. 54-54తో ఫ్రాన్సిస్కాతో సమంగా నిలిచింది. కానీ షూటాఫ్‌లో తడబడి పసిడి కోల్పోయింది. మహిళల స్కీట్‌లో భారత్‌కు దక్కిన రెండో కోటా స్థానమిది. మొత్తంగా ఇది 21వ కోటా స్థానం.