Sports news: ట్రిపుల్‌జంప్‌లో సెల్వాకు రజతం

కాలి (కొలంబియా): ప్రపంచ అండర్‌-20 అథ్లెటిక్స్‌ ఛాంపియన్‌షిప్‌లో భారత అథ్లెట్లు పతకాల జోరు కొనసాగిస్తున్నారు. తాజాగా పురుషుల ట్రిపుల్‌జంప్‌లో సెల్వా తిరుమారన్‌ రజతం గెలిచాడు. ఫైనల్లో 17 ఏళ్ల సెల్వా 16.15 మీటర్ల దూరం దూకి రెండో స్థానంలో నిలిచాడు. ఈ ఈవెంట్లో జాడెన్‌ హిబర్ట్‌ (జమైకా, 17.27 మీటర్లు) స్వర్ణం నెగ్గాడు. మహిళల 4×400 మీటర్ల రిలే పరుగులో భారత్‌ ఫైనల్‌ చేరింది. క్వాలిఫయింగ్‌లో సమీ, ప్రియా మోహన్‌, రజిత కుంజ, రూపల్‌తో కూడిన భారత జట్టు 3 నిమిషాల 34.18 సెకన్లలో లక్ష్యాన్ని చేరి హీట్‌లో రెండో స్థానంలో నిలిచింది. ఇప్పటికే భారత్‌ ఈ టోర్నీలో మూడు పతకాలు సాధించింది. 2021 నైరోబిలో జరిగిన టోర్నీలో మూడు పతకాలు (రెండు రజతాలు, ఒక కాంస్యం) నెగ్గిన భారత్‌.. ఈసారి ఆ సంఖ్యను దాటేలా ఉంది.

అదరగొట్టిన నందిని: అండర్‌-20 ప్రపంచ అథ్లెటిక్స్‌లో తెలంగాణ అమ్మాయి అగసర నందిని అదరగొట్టింది. మహిళల 100 మీ. హార్డిల్స్‌లో ఫైనల్‌ చేరిన ఆమె.. ఈ ఘనత సాధించిన తొలి భారత అథ్లెట్‌గా చరిత్ర సృష్టించింది. సెమీస్‌లో ఆమె 13.34 సెకన్లలో లక్ష్యాన్ని చేరుకుని తన పేరిటే ఉన్న జాతీయ రికార్డు (13.58సె)ను మరోసారి మెరుగుపర్చింది. హీట్స్‌-3లో మూడో స్థానంలో నిలిచిన ఆమె ఓవరాల్‌గా ఏడో స్థానంతో తుది పోరుకు చేరింది.