Jemimah Rodrigues: అంత బరువైన బ్యాటా: జెమీమాను చూసి ధోనీ ఆశ్చర్యపడిన వేళ..

ఇంటర్నెట్‌ డెస్క్‌: మహిళల వన్డే ప్రపంచకప్‌ టోర్నీలో సంచలన ఇన్నింగ్స్‌తో టీమ్‌ఇండియాను ఫైనల్‌కు చేర్చిన జెమీమా రోడ్రిగ్స్‌పై ప్రశంసల జల్లు కురుస్తోంది. ఆమె పోరాటం అద్భుతం అంటూ దిగ్గజ క్రికెటర్లు మెచ్చుకుంటున్నారు. ఈ సమయంలో జెమీ (Jemimah Rodrigues)కి సంబంధించి ఓ పాత వీడియో వైరల్‌ అవుతోంది. అందులో టీమ్‌ఇండియా మాజీ కెప్టెన్‌ మహేంద్ర సింగ్‌ ధోనీ (MS Dhoni)తో జరిపిన సంభాషణను జెమీమా పంచుకుంది.

‘మీరు ఎప్పుడైనా ధోనీతో మాట్లాడారా? ఆయన ఎలా ఉంటారు?’ అని వ్యాఖ్యాత జెమీమాను అడిగారు. దీనికి ఆమె బదులిస్తూ.. ‘‘ఒకసారి ధోనీ సర్‌ను కలిశాను. అప్పుడు నా బ్యాట్‌ బరువెంత అని ఆయన అడిగారు. 1200 గ్రాములని చెప్పాను. నాకంటే బరువైన బ్యాట్‌ ఉపయోగిస్తున్నావే అని ఆశ్చర్యం వ్యక్తం చేశారు. ఆయన ఎంతో ఒదిగి ఉండే వ్యక్తి. ఆయన చుట్టూ ఏదో ప్రత్యేక శక్తి ఉన్నట్లు అనిపిస్తుంది’’ అని తెలిపింది.

• ‘రీల్స్‌ కాదు.. రన్స్‌ చెయ్‌’.. బ్యాట్‌తోనే ట్రోలర్లపై రోడ్రిగ్స్‌ రోరింగ్‌!

‘‘మరోసారి న్యూజిలాండ్‌లో మేమంతా డిన్నర్‌ చేస్తున్నప్పుడు ధోనీ అక్కడికి వచ్చారు. ఆ వెంటనే అక్కడి వాతావరణం అంతా మారిపోయింది. అప్పుడు కూడా ఆయన చాలా సింపుల్‌గా ఉన్నారు. ధోనీతో మాట్లాడుతుంటే కూడా చాలా కంఫర్టబుల్‌గా అనిపిస్తుంది’’ అని జెమీమా నాటి సంగతులను గుర్తుచేసుకున్నారు. ప్రస్తుతం ఈ వీడియో సామాజిక మాధ్యమాల్లో చక్కర్లు కొడుతోంది.

ఈ ప్రపంచకప్‌ (Women's World Cup)లో తొలి నాలుగు మ్యాచ్‌ల్లో రెండుసార్లు డకౌట్‌ అయిన జెమీమా.. మరో రెండు మ్యాచుల్లో చెప్పుకోదగ్గ స్కోర్‌ చేయలేదు. దీంతో ఆమెను పక్కన పెట్టాల్సిన పరిస్థితి వచ్చింది. అయితే న్యూజిలాండ్‌తో జరిగిన కీలక పోరుతో మళ్లీ జట్టులోకి వచ్చిన రోడ్రిగ్స్‌ 55 బంతుల్లో 76 పరుగులతో నాటౌట్‌గా నిలిచింది. ఇక సెమీస్‌లో భారీ శతకంతో జట్టును ఫైనల్‌కు తీసుకెళ్లింది.