Abhishek Sharma: అభిషేక్‌ శర్మను ఎదుర్కొనేందుకు మేం సిద్ధంగా ఉన్నాం: మిచెల్‌ మార్ష్‌

ఇంటర్నెట్‌ డెస్క్‌: టీమ్‌ఇండియా విధ్వంసకర బ్యాటర్‌ అభిషేక్‌ శర్మను (abhishek sharma) ఎదుర్కోవడానికి తమ జట్టు సిద్ధంగా ఉందని ఆసీస్ కెప్టెన్‌ మిచెల్ మార్ష్‌ అన్నాడు. ఆస్ట్రేలియాతో టీమ్‌ఇండియా అయిదు టీ20ల సిరీస్‌ ఆడనుంది. దీనిలో భాగంగా రేపు (అక్టోబర్‌ 29) కాన్‌బెర్రా వేదికగా మొదటి మ్యాచ్‌ జరగనుంది. ఈ నేపథ్యంలో మంగళవారం నిర్వహించిన విలేకరుల సమావేశంలో మార్ష్‌ మాట్లాడాడు.  ‘అభిషేక్‌ శర్మ అద్భుతమైన నైపుణ్యమున్న ఆటగాడు. ఐపీఎల్‌లోనూ (IPL) సన్‌రైజర్స్‌ హైదరాబాద్‌ (Sunrisers Hyderabad) తరఫున చక్కగా ఆడాడు. అతడు నిజంగా మాకో ఛాలెంజ్‌. కానీ మేం అతణ్ని ఎదుర్కొనేందుకు సిద్ధంగా ఉన్నాం. ప్రపంచంలోని అత్యుత్తమ ఆటగాళ్లతో తలపడి మనల్ని మనం పరీక్షించుకోవాలి’ అని మిచెల్‌ మార్ష్‌ అన్నాడు. 

• శ్రేయస్‌ అయ్యర్‌ మళ్లీ బ్యాట్‌ పట్టేది అప్పుడే!

అలాగే జోష్‌ ఇంగ్లిస్‌ ఈ సిరీస్‌కు అందుబాటులో ఉండే విషయమై మార్ష్‌ మాట్లాడాడు. అతడు ఇటీవల న్యూజిలాండ్‌ సిరీస్‌లో గాయం వల్ల ఆసీస్‌ జట్టుకు దూరమయ్యాడు. ‘జోష్‌ ఇంగ్లిష్‌ ఫిట్‌నెస్‌ సాధించాడు. జట్టుకు అందుబాటులో ఉన్నాడు. అతడు మాకు చాలా ముఖ్యమైన ఆటగాడు. నాలుగో స్థానంలో బ్యాటింగ్‌కు దిగుతాడు’ అని మార్ష్‌ వివరించాడు. 

అభిషేక్‌ శర్మ ప్రస్తుతం ప్రపంచంలోనే అత్యుత్తమ టీ20 బ్యాటర్‌గా కొనసాగుతున్నాడు. అతడు 23 ఇన్నింగ్స్‌ల్లో 36.91 యావరేజ్‌తో 849 పరుగులు చేశాడు. ఇందులో రెండు శతకాలు, అయిదు అర్ధశతకాలున్నాయి. టీమ్‌ఇండియా, ఆస్ట్రేలియా ఇప్పటి వరకు 32 టీ20ల్లో తలపడింది. అందులో 20 మ్యాచుల్లో భారత జట్టు విజయం సాధించింది. ఆసీస్‌ జట్టు 11 మ్యాచుల్లో గెలిచింది. ఒక మ్యాచ్‌లో ఫలితం తేలలేదు. గత మూడు టీ20 సిరీస్‌ల్లోనూ భారత జట్టు కంగారూలను ఓడించింది.