మేడిగడ్డ కుంగుబాటు కేసును సీబీఐకి అప్పగించండి

హైకోర్టులో ప్రజాప్రయోజన వ్యాజ్యం

ఈనాడు, హైదరాబాద్‌: మేడిగడ్డ పిల్లర్ల కుంగుబాటుపై జయశంకర్‌ భూపాలపల్లి జిల్లా మహదేవపూర్‌ పోలీసు స్టేషన్‌లో నమోదైన కేసును సీబీఐకి బదలాయించేలా ఆదేశాలివ్వాలంటూ హైకోర్టులో ప్రజాప్రయోజన వ్యాజ్యం దాఖలైంది. ఈ మేరకు కేంద్ర, రాష్ట్ర ప్రభుత్వాలను ఆదేశించాలని కోరుతూ పీసీసీ సీనియర్‌ ఉపాధ్యక్షుడు జి.నిరంజన్‌ పిటిషన్‌ దాఖలు చేశారు. జాతీయ డ్యాం సేఫ్టీ అథారిటీ నవంబరు 1న ఇచ్చిన నివేదిక ఆధారంగా బాధ్యులపై క్రిమినల్‌ కేసు నమోదు చేసేలా కేంద్రానికి ఆదేశాలు జారీ చేయాలని కోరారు. దీంతోపాటు కాళేశ్వరం ఇరిగేషన్‌ ప్రాజెక్ట్‌ కార్పొరేషన్‌ లిమిటెడ్‌ రూ.86 వేల కోట్లు సేకరించడంపై సీబీఐతో దర్యాప్తు జరిపించాలని కోరారు. ఇందులో ప్రతివాదులుగా కేంద్ర, రాష్ట్ర ప్రభుత్వాలతోపాటు డ్యాం సేఫ్టీ అథారిటీ, సీబీఐ, జాతీయ విపత్తుల నిర్వహణ మండలి, ఎస్‌ఎఫ్‌ఐఓ తదితరులను చేర్చారు. ఈ పిటిషన్‌ ప్రస్తుతం హైకోర్టు రిజిస్ట్రీ పరిశీలనలో ఉంది.