James Cleverly: భార్యను ఎప్పుడూ కొద్దిగా మత్తులో ఉంచాలి

బ్రిటన్‌ హోంమంత్రి వివాదాస్పద వ్యాఖ్యలు

లండన్‌: వివాహ బంధం దీర్ఘకాలం కొనసాగాలంటే భార్యను (wife) ఎప్పుడూ కొంత మత్తులో ఉంచాలని బ్రిటన్‌ హోం మంత్రి జేమ్స్‌ క్లెవర్లీ (James Cleverly) చేసిన వివాదాస్పద వ్యాఖ్య విమర్శలకు తావిస్తోంది. ఆయన్ని మంత్రివర్గం నుంచి తొలగించాలని విపక్షం డిమాండ్‌ చేస్తోంది. ఈ నెల 18న బ్రిటన్‌ ప్రధాని రిషి సునాక్‌ నివాసంలో జరిగిన విందులో మహిళా అతిథులతో మంత్రి మాట్లాడినప్పుడు కొన్ని వ్యాఖ్యలు చేశారు. ‘తన భర్తకంటే మెరుగైనవారు ఎంతోమంది ఉన్నారన్న విషయాన్ని ఎప్పటికీ గుర్తించకుండా భార్యకు నిరంతరం కొద్దిమోతాదులో మత్తుఇచ్చి జోకొట్టాలి. ఇది చాలాకొద్దిగా ఇవ్వడం చట్టవిరుద్ధమేమీ కాదు’ అని అన్నారు. తర్వాత దీనిపై దుమారం రేగడంతో తాను సరదాగా అలా అన్నానని సర్దిచెప్పుకొనే ప్రయత్నం చేశారు. ప్రైవేటు సంభాషణలో చేసిన వ్యాఖ్యలు కేవలం జోక్‌ అని, దానికి ఆయన క్షమాపణలు చెబుతున్నారని క్లెవర్లీ ప్రతినిధి తెలిపారు. మంత్రి రాజీనామా చేయాలని మహిళా సంఘాలు డిమాండ్‌ చేస్తున్నాయి.