అప్పుడు ఆత్మహత్య చేసుకోవాలనుకున్నా: బైడెన్‌

వాషింగ్టన్‌: అమెరికా అధ్యక్షుడు జో బైడెన్‌ ఒకానొక సమయంలో ఆత్మహత్య చేసుకోవాలనుకున్నారట. ఈ విషయాన్ని ఆయనే ఓ రేడియో ఇంటర్వ్యూలో తెలిపారు. 1972లో జరిగిన కారు ప్రమాదంలో బైడెన్‌ మొదటి భార్య, కుమార్తె మరణించారు. ఆ ఘటన తర్వాత తాను మానసికంగా కుంగిపోయానని బైడెన్‌ తెలిపారు. ‘‘నాకు తాగే అలవాటు లేదు. కాకపోతే ఆ సమయంలో ఓ స్కాచ్‌ బాటిల్‌ తీసుకొని వెళ్లి.. తాగి డెలావర్‌ బ్రిడ్జ్‌ మీద నుంచి దూకాలనుకున్నా. కానీ వెంటనే నా ఇద్దరు కుమారులు గుర్తుకొచ్చారు’’ అని వెల్లడించారు. అయితే ఎన్ని కష్టాలు వచ్చినా ఆత్మహత్య వంటి పిచ్చి ఆలోచనలు చేయాల్సిన అవసరం లేదన్నారు. ఈ ఇంటర్వ్యూలోనే మాజీ అధ్యక్షుడు, తన ప్రత్యర్థి డొనాల్డ్‌ ట్రంప్‌తో చర్చకు సిద్ధమని బైడెన్‌ తెలిపారు. ఎప్పుడు.. ఎక్కడ అన్న విషయాన్ని ప్రస్తావించలేదు గానీ.. చర్చించడానికి తాను సుముఖంగా ఉన్నానని చెప్పారు. దీనికి ట్రంప్‌ కూడా అంతే వేగంగా స్పందించారు.‘‘ఎక్కడైనా, ఎప్పుడైనా ఓకే’’ అంటూ బదులిచ్చారు.