స్పెయిన్‌లో పార్శిల్‌ బాంబుల కలకలం

అమెరికా ఎంబసీ వద్ద ఒకటి పేల్చివేత

మాద్రీద్‌: స్పెయిన్‌లో పార్శిల్‌ బాంబులు కలకలం రేకెత్తిస్తున్నాయి. మాద్రీద్‌లోని ఉక్రెయిన్‌ రాయబార కార్యాలయం వద్ద ఇలాంటి ఒక బాంబు పేలి ఒక ఉద్యోగికి గాయాలైన మరుసటి రోజే అమెరికా ఎంబసీ వద్ద మరొకటి గుర్తించారు. నిపుణులు ఆ ప్రాంతాన్ని తమ ఆధీనంలోకి తీసుకుని, బాంబును వెంటనే పేల్చేశారు. ఉత్తరాల మాదిరిగా కనిపించే వీటిని ‘లెటర్‌ బాంబు’లుగా పిలుస్తున్నారు. స్పెయిన్‌ రక్షణ మంత్రిత్వ శాఖకు, మాద్రీద్‌ వెలుపల వైమానిక స్థావరంలో ఉన్న ఈయూ అంతరిక్ష కేంద్రానికి, ఈశాన్య స్పెయిన్‌లో ఆయుధాల తయారీ కర్మాగారానికి కూడా ఇలాంటివి అందాయి. ఈ కేంద్రంలో తయారయ్యే గ్రెనేడ్లను ఉక్రెయిన్‌కు సరఫరా చేస్తుంటారు. దౌత్య కార్యాలయాలను లక్ష్యంగా చేసుకుని బాంబుల్ని పంపిస్తుండడాన్ని రష్యా ఖండించింది.