Mohajer-10: 2 వేల కి.మీల దూరం.. 24 గంటలు గాల్లోనే.. సరికొత్త డ్రోన్లు ప్రదర్శించిన ఇరాన్‌

టెహ్రాన్‌: ఇరాన్‌- ఇరాక్‌ యుద్ధ వార్షికోత్సవాన్ని పురస్కరించుకుని టెహ్రాన్‌ భారీ సైనిక కవాతు నిర్వహించింది. ఈ సందర్భంగా ఇరాన్‌ సేనలు పెద్దఎత్తున ఆయుధ సంపత్తితో కదం తొక్కాయి. ఈ క్రమంలోనే ప్రపంచంలోనే అత్యంత దూరం ప్రయాణించగల డ్రోన్లను ప్రదర్శించాయి. వాటితోపాటు బాలిస్టిక్‌, హైపర్‌సోనిక్‌ క్షిపణులను పరేడ్‌లో భాగం చేసినట్లు ఇరాన్‌ మీడియా సంస్థలు పేర్కొన్నాయి. ఈ కవాతులో ప్రదర్శించిన డ్రోన్‌లకు మొహజర్‌, షాహెద్‌, అరాష్‌ అని పేర్లు పెట్టినట్లు తెలిసింది. ఈ సందర్భంగా సైన్యాన్ని ఉద్దేశించి ఇరాన్‌ అధ్యక్షుడు ఇబ్రహీం రైసీ ప్రసంగించారు.

భద్రతామండలి పని తీరును ప్రపంచం ప్రశ్నించాలి!: భారత్‌

‘మన దళాలు ఇరాన్‌తోపాటు పర్షియన్‌ గల్ఫ్‌లో భద్రతను పర్యవేక్షిస్తున్నాయి. యుద్ధం వంటి విపత్కర పరిస్థితులకు దీటుగా ప్రతిఘటించడమే ప్రస్తుత కాలపు తంత్రమని ఈ ప్రాంత ప్రజలకు మనం చాటగలం. లొంగిపోవడమో.. తడబడటమో కాదు.. శత్రువును తోకముడిచేలా చేయగలిగేది ప్రతిఘటన మాత్రమే’ అని వ్యాఖ్యానించారు. ఇదిలా ఉండగా.. మొహజర్‌-10 పేరుతో ఓ అత్యాధునిక డ్రోన్‌ను రూపొందించినట్లు ఇరాన్‌ గత నెలలో వెల్లడించింది. దాదాపు 2 వేల కిలోమీటర్ల దూరం ప్రయాణించడం, 24 గంటలపాటు నిరంతరాయంగా గాల్లో చక్కర్లు కొట్టడం, 300 కిలోల పేలోడ్ మోసుకెళ్లడం వంటి సామర్థ్యాలు దీని సొంతమని తెలిపింది. సుమారు 24 గంటలు ప్రయాణించి 2వేల కిలోమీటర్ల దూరానికి వెళ్లగలదని పేర్కొంది. మొహజర్‌-6తో పోలిస్తే ఇందులో రెట్టింపు సామర్థ్యాలున్నాయి.

1980 సెప్టెంబరు 22న అప్పటి ఇరాక్ అధ్యక్షుడు సద్దాం హుస్సేన్ సేనలు ఇరాన్‌పై దండెత్తడంతో ఇరాన్- ఇరాక్ యుద్ధం మొదలైంది. ఎనిమిదేళ్లపాటు సాగిన ఈ సైనిక సంఘర్షణలో రెండువైపులా దాదాపు 5 లక్షల మంది మృతి చెందినట్లు నివేదికలు చెబుతున్నాయి.