London: కత్తితో విచక్షణారహిత దాడి..ఉలిక్కిపడిన లండన్‌

లండన్‌: బ్రిటన్‌ (Britain)లో కత్తి దాడి కలకలం సృష్టించింది. తూర్పు లండన్‌లో హైనాల్ట్‌ ప్రాంతంలో పలువురు కత్తిపోట్లకు గురయ్యారని స్థానిక పోలీసులు వెల్లడించారు. ఈ క్రమంలో ఆయుధం పట్టుకొని తిరుగుతున్న ఓ వ్యక్తి దృశ్యాలు ఆన్‌లైన్‌లో వైరల్‌ అవుతున్నాయి. ఆ దుండగుడిని అదుపులోకి తీసుకున్నట్లు తెలిపారు.

ఈ రోజు (మంగళవారం) ఉదయం వాహనంతో పాటు ఓ ఇంట్లోకి దూసుకొచ్చిన వ్యక్తి, కత్తితో దాడికి పాల్పడినట్లు పోలీసులు తెలిపారు. అతడి దాడిలో ఇద్దరు పోలీసులు కూడా గాయపడినట్లు చెప్పారు. ఇందులో ఉగ్రకోణం ఉండకపోవచ్చని ప్రాథమికంగా వెల్లడించారు. ఈ ఘటనతో స్థానికులు భయభ్రాంతులకు గురయ్యారు. దీనిపై బ్రిటన్ హోం మంత్రి జేమ్స్ క్లెవర్లీ స్పందించారు. ఈ ఘటన గురించి ఉన్నతాధికారుల నుంచి ఎప్పటికప్పుడు వివరాలు అడిగి తెలుసుకుంటున్నట్లు చెప్పారు. దీనిపై ఎలాంటి ఊహాగానాలు వ్యాప్తి చేయొద్దని, దాడి దృశ్యాలను షేర్ చేయొద్దని విజ్ఞప్తి చేశారు. అతని వయసు 36 సంవత్సరాలని, పూర్తి వివరాలు తెలియాల్సి ఉందని అధికారులు తెలిపారు.