close

తాజా వార్తలు

Updated : 04/05/2021 04:39 IST
Facebook Share Twitter Share WhatsApp Share Telegram Share

ఆసుపత్రిలో చేరానంటూ వల

మన్సూరాబాద్‌వాసికి రూ.1.1 లక్షలు టోకరా

ఈనాడు, హైదరాబాద్‌: ఓ వైపు కరోనా కోరలు చాస్తుంటే.. మరోవైపు సైబర్‌ కేటుగాళ్లు జూలు విదుల్చుతున్నారు. ప్రస్తుత పరిస్థితులను తమకు అనుకూలంగా మార్చుకుని రోజుకో తరహాలో అమాయకులను బురిడీ కొట్టిస్తున్నారు. తాజాగా కొవిడ్‌-19 బారిన పడి ఆసుపత్రిలో చికిత్స పొందుతున్నామంటూ వల విసిరి అందిన కాడికి దండుకుంటున్నారు. రాచకొండ సైబర్‌క్రైం పోలీసులకు ఫిర్యాదు అందడటంతో ఈ మోసం వెలుగు చూసింది.
ఫిర్యాదులు.. అవగాహన : ఫేస్‌బుక్‌లో నకిలీ ప్రొఫైల్స్‌ను సృష్టించి.. ‘ఇబ్బందుల్లో ఉన్నాం.. కొంచెం డబ్బులు సర్దండి’ అంటూ మిత్రులు, బంధువులకు సందేశాలు పంపించారు. నిజమేననుకుని కొందరు సదరు కేటుగాళ్లు సూచించిన నంబర్లకు గూగుల్‌పే, ఫోన్‌పే, పేటీఎం ద్వారా బదిలీ చేశారు. తీరా అసలు విషయం తెలిసి అవాక్కయ్యారు. ఇలాంటి తరహా ఫిర్యాదులు తరచూ అందుతుండటంతో సైబర్‌క్రైం పోలీసులు అప్రమత్తమై సామాజిక మాధ్యమాల్లో విస్తృతంగా అవగాహన కల్పించారు.
రూటు మార్చారు.. :  ఫేస్‌బుక్‌ మోసాలపై అందరికీ అవగాహన రావడంతో ఇప్పుడు కేటుగాళ్లు రూట్‌ మార్చారు. వాట్సాప్‌ వేదికగా వల విసురుతున్నారు. వాట్సాఫ్‌ డీపీ అసలు వ్యక్తిది ఉంచి సన్నిహితులు, బంధువులకు సందేశాలు పంపిస్తున్నారు. ‘చికిత్సకు భారీగా ఖర్చయింది, ఇప్పటివరకు దాచి పెట్టిందంతా అయిపోయింది, మిగిలిన బ్యాలెన్స్‌ కట్టకపోతే డిశ్చార్జి చేయరంట’ అంటూ ఆవేదన వ్యక్తం చేస్తున్నారు. ప్రస్తుతం నా ఫోన్‌ దగ్గర లేదని, ఆసుపత్రికి సంబంధించిన సిబ్బంది నంబర్‌కు గూగుల్‌పే, ఫోన్‌పే, పేటీఎం చేయాలని సూచిస్తున్నారు. ‘అయ్యో.. అక్కడ ఎలా ఉందో’ అనుకుంటూ.. నంబర్‌ చూడకుండానే చాలా మంది హడావుడిగా డబ్బులు పంపించేస్తున్నారు.
ఎలా తెలుస్తున్నాయి..? : ఈ కేటుగాళ్లకు మిత్రులు, బంధువుల ఫోన్‌ నంబర్లు ఎలా తెలుస్తున్నాయి? ఇప్పుడిదే పోలీసులకు అంతుచిక్కడం లేదు. కొందరు ఫేస్‌బుక్‌ ఖాతాల్లో కొందరు ఫోన్‌ నంబర్లను పెడుతుంటారు. అక్కడి నుంచే తీసుకుంటున్నారని ప్రాథమికంగా అంచనా వేస్తున్నారు. మన్సూరాబాద్‌కు చెందిన బాధితుడి(26)కి చారుల్‌ సింఘాల్‌ అనే స్నేహితురాలు ఉంది. ఆమె ఫోటో(డీపీ)తో 72075 39544 అనే నంబర్‌ నుంచి వాట్సాప్‌లో మెసేజ్‌ వచ్చింది. బాధితుడు హెచ్‌ఎస్‌బీసీ క్రెడిట్‌ కార్డు వివరాలిచ్చి రెండు సార్లు ఓటీపీ కూడా చెప్పాడు. కొన్ని రోజుల తర్వాత ఆరోగ్యం ఎలా ఉంది.. అంటూ స్నేహితురాలికి కాల్‌ చేయగా అసలు విషయం బయటపడింది.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని
జాతీయ- అంతర్జాతీయ
మరిన్ని