Breaking | Feedback | ePratibha | E-PAPER | Pratibha

డిఫెండింగ్‌ ఛాంపియన్‌కు షాకిచ్చిన భారత హాకీ టీమ్‌

Updated : 08 Aug 2023 00:41 IST

సంక్షిప్త వార్తలు - చిత్ర వార్తలు

08/08/2023 00:30(IST)

డిఫెండింగ్‌ ఛాంపియన్‌కు షాకిచ్చిన భారత హాకీ టీమ్‌

చెన్నై: డిఫెండింగ్‌ ఛాంపియన్‌ దక్షిణ కొరియాకు భారత జట్టు షాక్‌ ఇచ్చింది. చెన్నై వేదికగా జరుగుతున్న ఆసియా ఛాంపియన్స్‌ హకీ టోర్నీలో కొరియాను 3-2 తేడాతో భారత్‌ ఓడించింది. మొత్తం నాలుగు మ్యాచ్‌ల్లో మూడు విజయాలు ఒక డ్రాతో భారత్‌ ఖాతాలో 10 పాయింట్లు చేరాయి. దీంతో లీగ్‌ టేబుల్‌లో భారత్‌ అగ్రస్థానంలో ఉంది. మ్యాచ్‌ ప్రారంభమైన 6వ నిమిషంలో నీలకంఠ శర్మ గోల్‌ చేయడంతో భారత్‌ ఆధిక్యంలోకి దూసుకెళ్లింది. అయితే కాసేపటికే కొరియా ఆటగాడు గోల్‌ చేశాడు. ఇక 23వ నిమిషంలో హర్మన్‌ప్రీత్‌ సింగ్‌, 33వ నిమిషంలో మన్‌దీప్‌ సింగ్‌ గోల్‌ చేయడంలో 3-1 తేడాతో భారత్‌ మరింత ఆధిక్యంలోకి వెళ్లింది. అయితే 58వ నిమిషంలో కొరియా ఆటగాడు గోల్‌ చేసిన్పటికీ భారత్‌ విజయాన్ని ఆ జట్టు అడ్డుకోలేకపోయారు.

07/08/2023 23:41(IST)

ప్రియుడితో గొడవ.. హైటెన్షన్‌ పవర్‌ టవర్‌ ఎక్కిన ప్రియురాలు

ఛత్తీస్‌గఢ్‌: ప్రియుడితో గొడవపడి ప్రియురాలు విద్యుత్‌ సరఫరా అయ్యే 80 అడుగులున్న హైటెన్షన్‌ టవర్‌ పైకి ఎక్కింది. అనంతరం ప్రియురాలిని అనుసరిస్తూ ప్రియుడు సైతం టవర్‌ ఎక్కడంతో ఒక్కసారిగా కలకలం రేగింది. ఈ సంఘటన ఛత్తీస్‌గఢ్‌లోని గౌరేలా పెంద్ర మార్వాహీ జిల్లాలో చోటుచేసుకుంది. పోలీసులు వారితో సంప్రదింపులు జరిపి కిందికి రప్పించారు. దీనికి సంబంధించి వీడియోలు ప్రస్తుతం సామాజిక మాధ్యమాల్లో చక్కర్లు కొడుతున్నాయి.

07/08/2023 23:17(IST)

తెలంగాణ వాణిజ్య పన్నుల శాఖలో భారీగా పదోన్నతులు, బదిలీలు

హైదరాబాద్‌: తెలంగాణ వాణిజ్య పన్నుల శాఖలో భారీ సంఖ్యలో పదోన్నతులు, బదిలీలు చోటుచేసుకున్నాయి. 64 మంది అధికారులకు పోస్టింగ్‌లు ఇస్తూ ప్రభుత్వం ఉత్తర్వులు జారీ చేసింది. వీరిలో 24 మంది డిప్యూటీ కమిషనర్లు, 40 మంది అసిస్టెంట్‌ కమిషనర్లు ఉన్నారు.

07/08/2023 22:42(IST)

విశాఖలో రోడ్డు ప్రమాదం.. ముగ్గురి మృతి

విశాఖ: విశాఖ బీచ్‌ రోడ్‌లోని రాడిసన్‌ హోటల్‌ వద్ద రోడ్డు ప్రమాదం జరిగింది. ఓ కారు డివైడర్‌ను ఢీ కొట్టి అవతలివైపు రోడ్డులో వస్తున్న ద్విచక్రవాహనంపైకి దూసుకెళ్లింది. ఈ ప్రమాదంలో ద్విచక్రవాహనంపై దంపతులు, కారు డ్రైవర్‌ తీవ్ర గాయాలతో మృతిచెందారు. మద్యం మత్తులో కారును అతివేగంగా నడపడమే ప్రమాదానికి కారణంగా పోలీసులు అనుమానిస్తున్నారు.

07/08/2023 22:15(IST)

దిల్లీ సర్వీసుల బిల్లుకు రాజ్యసభ ఆమోదం

దిల్లీ: దిల్లీ సర్వీసుల బిల్లుకు రాజ్యసభ ఆమోదం తెలిపింది. దిల్లీ సర్వీసుల బిల్లుకు అనుకూలంగా 131 ఓట్లు వచ్చాయి. ఈ బిల్లుకు వ్యతిరేకంగా 102 ఓట్లు వచ్చాయి. సాంకేతిక సమస్యతో స్లిప్పుల ద్వారా ఓటింగ్ నిర్వహించారు.

07/08/2023 22:11(IST)

వైకాపా పాలనలో కరెంట్ ఛార్జీలను 8 సార్లు పెంచారు: చంద్రబాబు

తూర్పు గోదావరి: తూర్పు గోదావరి జిల్లా దేవరపల్లిలో చంద్రబాబు రోడ్‌ షో నిర్వహించారు. ఈ రోడ్‌ షోకి ప్రజలు, కార్యకర్తలు భారీగా తరలి వచ్చారు. ఈ సందర్భంగా చంద్రబాబు మాట్లాడారు. వైకాపా పాలనలో కరెంట్ ఛార్జీలను 8 సార్లు పెంచారని చెప్పారు. తెదేపా అధికారంలోకి వస్తే కరెంట్ ఛార్జీలు పెంచమని హామీ ఇస్తున్నట్లు తెలిపారు. బలహీనత గుర్తించి మద్యం ధర పెంచుతున్నారని వివరించారు.

07/08/2023 21:58(IST)

దిల్లీ సర్వీసుల బిల్లు.. సుప్రీం తీర్పును ఉల్లంఘించలేదు: అమిత్‌ షా

దిల్లీ: కేంద్రం తీసుకొచ్చిన దిల్లీ సర్వీసుల బిల్లు సుప్రీం కోర్టు తీర్పును ఉల్లంఘించలేదని హోం మంత్రి అమిత్‌షా అన్నారు. బిల్లుపై రాజ్యసభలో చర్చ సందర్భంగా ఆయన ఈ వ్యాఖ్యలు చేశారు. దేశ రాజధాని దిల్లీలో గ్రూప్‌ ‘ఎ’ అధికారుల నియామకాలు, క్రమశిక్షణ చర్యలకు గానూ గత మేలో కేంద్రం తీసుకొచ్చిన ఆర్డినెన్స్‌ను వ్యతిరేకిస్తూ రాజ్యసభ ప్రతిపక్ష సభ్యులు తీర్మానం ప్రవేశ పెట్టిన సంగతి తెలిసిందే.

07/08/2023 21:57(IST)

దిల్లీ సర్వీసుల బిల్లుపై రాజ్యసభలో ఓటింగ్

దిల్లీ: దిల్లీ సర్వీసుల బిల్లుపై రాజ్యసభలో ఓటింగ్ జరిగింది. దిల్లీ సర్వీసుల బిల్లుపై డివిజన్‌ ఓటింగ్‌కు విపక్షాలు పట్టుబట్టాయి. లోక్‌సభలో దిల్లీ సర్వీసుల బిల్లు ఇప్పటికే ఆమోదం పొందింది.

07/08/2023 21:49(IST)

జహీరుద్దీన్‌ మృతికి రేవంత్ రెడ్డి సంతాపం

హైదరాబాద్‌: సియాసత్‌ మేనేజింగ్ ఎడిటర్ జహీరుద్దీన్‌ మృతికి కాంగ్రెస్‌ నేత రేవంత్‌ రెడ్డి సంతాపం తెలిపారు. జహీరుద్దీన్‌ అకాల మరణం దిగ్భ్రాంతికి గురి చేసిందని చెప్పారు. జహీరుద్దీన్‌ మృతి తెలంగాణకు తీరని లోటని రేవంత్‌ రెడ్డి చెప్పారు.

07/08/2023 21:46(IST)

జహీరుద్దీన్‌ మృతికి సీఎం కేసీఆర్‌ సంతాపం

హైదరాబాద్‌: సియాసత్‌ మేనేజింగ్ ఎడిటర్ జహీరుద్దీన్‌ మృతికి సీఎం కేసీఆర్‌ సంతాపం ప్రకటించారు. ఆయన మరణం ఉర్దూ ప్రపంచానికి తీరని లోటని కేసీఆర్‌ అన్నారు. జహీరుద్దీన్‌ కుటుంబసభ్యులకు సీఎం ప్రగాఢ సానుభూతి తెలిపారు.

07/08/2023 21:02(IST)

లారీ బీభత్సం.. ఒకరు మృతి!

భూపాలపల్లి: జయశంకర్ భూపాలపల్లి జిల్లా కేంద్రంలో లారీ బీభత్సం సృష్టించింది. ఈ సంఘటనలో తీవ్ర గాయాలైన రంజిత్ అనే వ్యక్తి హనుమకొండ మ్యాక్స్ కేర్ ఆసుపత్రిలో చికిత్స పొందుతూ మృతి చెందాడు. ప్రమాదానికి కారణమైన లారీని సీసీ ఫుటేజీ దృశ్యాలను పోలీసులు విడుదల చేశారు. జిల్లా కేంద్రంలో ఓ ఇసుక లారీ టైర్ బ్లాస్ట్ కావడంతో వేగంగా వాహనాలపైకి దూసుకు వచ్చింది. ఈ సంఘటనలో పది బైక్‌లు, కారు ధ్వంసం అయ్యాయి.

07/08/2023 20:59(IST)

రాష్ట్రంలోని హోంగార్డులను పర్మినెంట్ చేయాలి

హైదరాబాద్‌: రాష్ట్ర ముఖ్యమంత్రి కేసీఆర్ హోంగార్డులను పర్మినెంట్ చేస్తానని గతంలో అసెంబ్లీ సాక్షిగా ఇచ్చిన హామీని అమలు చేయాలని రాష్ట్ర హోంగార్డు జేఏసీ ఛైర్మన్‌ సకినాల నారాయణ పేర్కొన్నారు. హైదరాబాద్ బాగ్ లింగంపల్లిలోని సుందరయ్య విజ్ఞాన కేంద్రంలో హోంగార్డు జేఏసీ సమావేశం జరిగింది. రాష్ట్రంలోని హోంగార్డులను పర్మినెంట్ చేయాలని, కారుణ్య నియామకాలు వెంటనే అమలు చేయాలని ఆయన కోరారు.

07/08/2023 20:57(IST)

విశాఖలోని డాక్టర్ వీఎస్ కృష్ణా జూనియర్ కళాశాలలో విద్యార్థుల కొట్లాట

విశాఖపట్నం: విశాఖలోని డాక్టర్ వీఎస్ కృష్ణా జూనియర్ కళాశాలలో సోమవారం యుద్ధాన్ని తలపించిన సన్నివేశాలు చోటు చేసుకున్నాయి. ఇరు వర్గాలకు చెందిన విద్యార్థులు రోడ్లపైకి వచ్చి తన్నుకున్నారు. మరో వర్గం బయట నుంచి విద్యార్థుల్ని రప్పించడంతో వీరంతా బాహాబాహీకి దిగారు. విషయం పెద్దది కావడంతో ఎంవీపీ పోలీసులు రంగ ప్రవేశం చేసి కొంతమందిని అదుపులోకి తీసుకున్నారు. అనంతరం వారందరికీ కౌన్సెలింగ్ చేశారు. ఇంటర్ తొలి సంవత్సరం చదువుకున్న ఓ విద్యార్థి యూనిఫామ్‌ లేకుండానే కళాశాలకు వచ్చాడు. దీంతో గొడవ జరిగింది.

07/08/2023 20:55(IST)

ముగిసిన మోకిల్లా భూముల వేలం

హైదరాబాద్‌: హైదరాబాద్‌లో మోకిల్లా భూముల వేలం ముగిసింది. మొదటి దశ 50 ప్లాట్లను హెచ్‌ఎండీఏ విక్రయించింది. చదరపు గజానికి గరిష్ఠంగా రూ. 1.05 లక్షల ధర పలికింది. సగటున చదరపు గజం భూమి ధర రూ. 80,397. 50 ప్లాట్ల విక్రయంతో ప్రభుత్వానికి రూ. 121.40 కోట్ల ఆదాయం వచ్చింది.

07/08/2023 20:52(IST)

తెదేపా జెండాను కార్యకర్తలు గుండెల్లో పెట్టుకొని మోశారు: బ్రహ్మారెడ్డి

పల్నాడు జిల్లా: పల్నాడు జిల్లా కారంపూడి బహిరంగ సభలో తెదేపా ఇన్‌ఛార్జి జూలకంటి బ్రహ్మారెడ్డి తీవ్ర స్థాయిలో ధ్వజమెత్తారు. వైకాపా అధికారంలోకి వచ్చినప్పటి నుంచి తెదేపా కార్యకర్తలు చాలా ఇబ్బందులు పడ్డారని అన్నారు. అయినా తెలుగుదేశం జెండాను గుండెల్లో పెట్టుకుని మోశారని చెప్పారు. మాచర్ల నియోజకవర్గం ఎమ్మెల్యే రాష్ట్రంలోనే అత్యంత అవినీతిపరుడని ధ్వజమెత్తారు.

07/08/2023 20:49(IST)

భూ తగాదాతో కుమారుడి దాడిలో తండ్రి మృతి

ఖమ్మం: భూ తగాదాతో కుమారుడి దాడిలో తండ్రి మృతి చెందాడు. భూమికి సంబంధించి తల్లిదండ్రులపై కుమారుడు దాడి చేశారు. తీవ్ర గాయాలతో తండ్రి సక్రు అక్కడికక్కడే మృతి చెందాడు. ఖమ్మం జిల్లా కామేపల్లి మండలం గోవిందరాలలో ఈ ఘటన జరిగింది.

07/08/2023 20:43(IST)

ఛలో విద్యుత్‌ సౌధ కార్యక్రమం రద్దు

అమరావతి: ఛలో విద్యుత్‌ సౌధ కార్యక్రమాన్ని విద్యుత్‌ ఐకాస రద్దు చేసింది. మంగళవారం తలపెట్టిన ఛలో విద్యుత్ సౌధకు పోలీసులు అనుమతి నిరాకరించారు. ఈ సందర్భంగా వర్క్‌ టు రూల్‌ కార్యక్రమంలో ఉద్యమాన్ని కొనసాగిస్తామని విద్యుత్‌ ఐకాస తెలిపింది.

07/08/2023 20:17(IST)

జాతీయ చేనేత దినోత్సం.. అలరించిన ఫ్యాషన్‌ షో!

విజయవాడ: జాతీయ చేనేత దినోత్సవం సందర్భంగా ఆప్కో నూతన కార్యక్రమానికి శ్రీకారం చుట్టింది. సరికొత్త డిజైన్లతో రూపొందించిన వస్త్రాలతో విజయవాడలో యువతులు ఫ్యాషన్ షో నిర్వహించారు.

07/08/2023 20:16(IST)

ముగిసిన గద్దర్‌ అంతిమ సంస్కారాలు

అల్వాల్: అల్వాల్‌లోని మహాబోధి పాఠశాల ఆవరణలో గద్దర్‌ అంతిమ సంస్కారాలు ముగిశాయి. గద్దర్‌ కడసారి చూపు కోసం అభిమానులు భారీగా తరలివచ్చారు. గద్దర్‌ అమర్‌ రహే అంటూ అభిమానులు నినాదాలు చేశారు. బౌద్ధ సంప్రదాయం ప్రకారం గద్దర్ అంతిమ సంస్కారాలు ముగిశాయి.

07/08/2023 19:35(IST)

రూ.50 వేలు లంచం తీసుకుంటూ అనిశాకు చిక్కిన విద్యుత్‌శాఖ ఏఈ

విజయవాడ: ఎస్‌పీడీసీఎల్ అసిస్టెంట్ ఇంజినీర్‌ కార్యాలయంలపై అనిశా(అవినీతి నిరోధక శాఖ) దాడి చేసింది. రూ.50 వేలు లంచం తీసుకుంటూ విద్యుత్‌ శాఖ ఏఈ, జూనియర్‌ అసిస్టెంట్ శ్రీనివాసరావు అనిశా అధికారులకు చిక్కారు. మీటర్‌ కనెక్షన్‌ ఇచ్చేందుకు ఏఈ లంచం డిమాండ్ చేసినట్లు అధికారులు తెలిపారు.

07/08/2023 18:55(IST)

గద్దర్‌ భార్యకు సోనియా గాంధీ లేఖ

గద్దర్‌ భార్య విమలరావుకు కాంగ్రెస్‌ పార్లమెంటరీ పార్టీ ఛైర్మన్‌ సోనియాగాంధీ లేఖ రాశారు. ‘మీ భర్త గద్దర్‌ మరణవార్త తెలిసి నేను చాలా బాధపడ్డాను. కళను, సంస్కృతిని వ్యక్తీకరణ సాధనంగా ఉపయోగించి అణగారిన వర్గాల్లో పోరాట పిటిమను పెంచడంలో గద్దర్‌ది కీలక పాత్ర. ప్రజాసమస్యలపై అవగాహన పెంచేందుకు ప్రజాగాయకుడు గద్దర్‌ అంకితభావం, నిబద్ధతతో పని చేశారు. గద్దర్‌ కుటుంబ సభ్యులకు నా సంతాపాన్ని తెలియజేస్తున్నా’ అని సోనియా గాంధీ పేర్కొన్నారు.

07/08/2023 18:51(IST)

గద్దర్‌ అంత్యక్రియలు.. గుండెపోటుతో సియాసత్ ఉర్దూ పత్రిక మేనేజింగ్ ఎడిటర్ మృతి

అల్వాల్‌: అల్వాల్‌లో గద్దర్ అంత్యక్రియలు నిర్వహించారు. గద్దర్‌ నివాసం వద్ద సియాసత్ ఉర్దూ పత్రిక మేనేజింగ్ ఎడిటర్ జహీరుద్దీన్ అలీఖాన్ గుండెపోటుతో మృతి చెందారు. గద్దర్ అంత్యక్రియల్లో పాల్గొనేందుకు ఆయన అల్వాల్‌ వెళ్లారు. ఛాతిలో నొప్పి వస్తుందంటూ జహీరుద్దీన్‌ అక్కడే పడిపోయారు. వెంటనే పోలీసులు ఆస్పత్రికి తరలించారు. అప్పటికే జహీరుద్దీన్‌ మృతి చెందినట్లు వైద్యులు తెలిపారు. ఎల్బీ స్టేడియం నుంచి అల్వాల్‌ వరకు జరిగిన అంతిమ యాత్రలో జహీరుద్దీన్ పాల్గొన్నారు.

07/08/2023 18:47(IST)

సొమ్మసిల్లి పడిపోయిన సీఎం బందోబస్తు ట్రాఫిక్‌ కానిస్టేబుల్‌

రాజమహేంద్రవరం: సీఎం బందోబస్తు ట్రాఫిక్‌ కానిస్టేబుల్‌ ప్రవీణ్‌ సొమ్మసిల్లి పడిపోయారు. కానిస్టేబుల్‌ను ప్రైవేట్‌ ఆసుపత్రికి తరలించారు. రాజమహేంద్రవరం ఆర్ట్స్‌ కాలేజ్ వద్ద బందోబస్తులో ప్రవీణ్‌ విధులు నిర్వహిస్తున్న సమయంలో ఈ ఘటన జరిగింది.

07/08/2023 18:44(IST)

పల్నాడు పౌరుషానికి పురిటిగడ్డ కారంపూడి: లోకేశ్‌

పల్నాడు జిల్లా: కారంపూడిలో నారా లోకేశ్‌ బహిరంగ సభ నిర్వహించారు. తెదేపా నేతలు, స్థానికులు భారీగా తరలివచ్చారు. దీంతో కారంపూడి వీర్లగుడి ప్రాంతం జనసంద్రంగా మారింది. ఈ సందర్భంగా లోకేశ్ మాట్లాడుతూ.. పల్నాడు పౌరుషానికి పురిటిగడ్డ కారంపూడి అని అన్నారు. కులమతాలతో సంబంధం లేకుండా చాపకూడు సిద్ధాంతం అమలు చేసిన బ్రహ్మనాయుడు పుట్టిన గడ్డ ఇది అని అభివర్ణించారు. ఎందరో ప్రముఖులు ఈ ప్రాంతం నుంచి వచ్చారని గుర్తు చేశారు. చంద్రబాబు హై వోల్టేజ్.. ముట్టుకుంటే షాక్ తప్పదని వివరించారు.

07/08/2023 18:38(IST)

సమస్యల పరిష్కారంలో జీహెచ్ఎంసీది ముఖ్యపాత్ర: కేటీఆర్

హైదరాబాద్‌: మంత్రి కేటీఆర్ వివిధ జిల్లాల ఉన్నతాధికారులతో సమావేశం నిర్వహించారు. ఆయన మాట్లాడుతూ.. సమన్వయంతో అన్ని శాఖల అధికారులు ఒక్క దగ్గర ఉండాలన్న లక్ష్యంతో వార్డు ఆఫీసులు ఏర్పాటు చేసినట్లు చెప్పారు. హైదరాబాద్ ప్రజల సమస్యల పరిష్కారంలో జీహెచ్ఎంసీది ముఖ్య పాత్ర అన్నారు. జవహర్ నగర్ డంప్ యార్డ్ 8 వేల టన్నులు దాటిపోయిందని వివరించారు. డంప్ యార్డుల కోసం భూమిని గుర్తించాలని రంగారెడ్డి, సంగారెడ్డి, యాదాద్రి భువనగిరి కలెక్టర్లను మంత్రి ఆదేశించారు.

07/08/2023 18:33(IST)

మరికొద్ది సేపట్లో మహాబోధి విద్యాలయంలో ప్రారంభం కానున్న గద్దర్ అంత్యక్రియలు

గద్దర్‌ అంత్యక్రియలు మరికొద్ది సేపట్లో మహాబోధి విద్యాలయంలో ప్రారంభం కానున్నాయి. రాజకీయ నాయకులు, ప్రముఖులు అల్వాల్‌లో గద్దర్‌కు నివాళి అర్పించారు.

07/08/2023 18:29(IST)

పీపుల్స్‌ ప్లాజా వద్ద ప్రారంభమైన వస్త్ర ప్రదర్శన

హైదరాబాద్: పీపుల్స్‌ ప్లాజా వద్ద మంత్రులు సత్యవతి రాథోడ్‌, శ్రీనివాస్‌ గౌడ్‌ చేనేత వస్త్ర ప్రదర్శనను ప్రారంభించారు. చేనేత దినోత్సవం సందర్భంగా ఈ నెల 15 వరకు వస్త్ర ప్రదర్శన, అమ్మకాలు కొనసాగుతాయి.

07/08/2023 18:23(IST)

ఎస్పీ రిశాంత్ రెడ్డి నన్ను హింసించారు: ఎల్లేటి సంతోష్

విజయవాడ: 2019లో తెదేపా బైక్‌ ర్యాలీలో పాల్గొన్నందుకు ఎస్పీ రిశాంత్‌రెడ్డి తనను ఇబ్బంది పెట్టారని ఎల్లేటి సంతోష్ చెప్పారు. సంతోష్ మీడియాతో మాట్లాడారు. 2019లో నర్సీపట్నం ఏఎస్పీగా రిశాంత్ రెడ్డి పని చేశారు. ఆ సమయంలో ఎస్పీ తనని కర్రలతో చితక బాదారని బాధితుడు తెలిపారు. తుపాకీ ముఖం మీద పెట్టి చంపుతానంటూ బూతులు తిట్టినట్లు వివరించారు. మేడపై నుంచి కిందకి, పైకి పరుగులు పెట్టించాడని చెప్పారు. ఆ సమయంలో కిందకు పడిపోయి కాలు పూర్తిగా దెబ్బతిందని ఆవేదన వ్యక్తం చేశారు. ఈ చర్యపై నిశాంత్‌రెడ్టి మీద కేసు పెట్టినా చర్యలు లేవని తెలిపారు. ఎస్పీ నుంచి తనకు ప్రాణ హాని ఉంది.. తనకు ఏం జరిగినా రిశాంత్ రెడ్డిదే బాధ్యత అని బాధితుడు చెప్పారు. పుంగనూరు ఘటనతో మళ్లీ తనలాగా చాలా మంది ఇబ్బంది పడకూడదని వివరించారు.

07/08/2023 18:17(IST)

జగన్‌ మూర్ఖత్వంతోనే పోలవరం డయాఫ్రమ్‌ వాల్‌ దెబ్బతింది: చంద్రబాబు

పోలవరం: చంద్రబాబు నాయుడు పోలవరం ప్రాజెక్టును సందర్శించారు. ఆయన మాట్లాడుతూ.. జగన్ మూర్ఖత్వంతోనే పోలవరం డయాఫ్రమ్ వాల్‌ దెబ్బతిందని ఆరోపించారు. జగన్ వచ్చాక కమీషన్ల కోసం గుత్తేదారును మార్చారని అన్నారు. ప్రాజెక్టు నిర్మాణంలో తమ హయాంలో అవినీతి లేదని చెప్పారు. పోలవరం ప్రాజెక్టుపై ప్రజలకు వాస్తవాలు తెలియాలని అన్నారు. చంద్రబాబు పోలవరం డ్యామ్‌పై 1.8 కి.మీ. నడిచి పనులను పరిశీలించారు.

07/08/2023 18:10(IST)

ఆర్టీసీ కార్మికుల కల నేరవేరింది: అశ్వత్థామరెడ్డి

హైదరాబాద్‌: ఆర్టీసీని ప్రభుత్వంలో విలీనం చేయడమే కాకుండా.. ఆర్థికపరమైన అంశాలపై మార్గదర్శకాలు రూపొందించాలని ఆర్టీసీ జేఏసీ చైర్మన్ అశ్వత్థామ రెడ్డి పేర్కొన్నారు. హైదరాబాద్ ఆర్టీసీ క్రాస్‌రోడ్‌లోని బస్సు భవన్ ముందు ఆర్టీసీ జేఏసీ ప్రతినిధులు మీడియాతో మాట్లాడారు.. ఆర్టీసీ కార్మికుల సుదీర్ఘ కల నెరవేరిందని ఆయన తెలిపారు.

07/08/2023 17:51(IST)

గద్దర్‌కు నివాళి అర్పించిన సీఎం కేసీఆర్‌

ముఖ్యమంత్రి కేసీఆర్ అల్వాల్‌లోని గద్దర్‌ నివాసానికి చేరుకున్నారు. అనంతరం గద్దర్‌ పార్థివదేహానికి కేసీఆర్‌, మంత్రులు నివాళి అర్పించారు. గద్దర్‌ కుటుంబసభ్యులను కేసీఆర్‌ ఓదార్చారు.

07/08/2023 17:26(IST)

పోలవరం వద్ద చంద్రబాబు సెల్ఫీ ఛాలెంజ్‌

పోలవరం: తెదేపా నేత చంద్రబాబు నాయుడు ప్రతిపక్ష నేతగా తొలిసారి పోలవరం వద్దకు వెళ్లారు. ఆయన పోలవరం ప్రాజెక్టు డ్యామ్‌ పై నుంచి సెల్ఫీ ఛాలెంజ్‌ చేశారు. పోలవరం పనులపై సీఎం జగన్‌కు చంద్రబాబు సవాల్‌ విసిరారు.

07/08/2023 17:20(IST)

గద్దర్‌ మృతిపై మావోయిస్టు పార్టీ ప్రకటన

గద్దర్‌ మృతిపై మావోయిస్టు పార్టీ ప్రకటన విడుదల చేసింది. గద్దర్‌ కుటుంబానికి ప్రగాఢ సంతాపం తెలిపింది. జననాట్య మండలి ఏర్పాటులో గద్దర్‌ కృషి చేశారని పేర్కొంది. 1972-2012 మధ్య మావోయిస్టు సభ్యుడిగా ఉన్నారని తెలిపింది. 2012లో గద్దర్‌ పార్టీ సభ్యత్వానికి రాజీనామా చేశారని వివరించింది. 2012 తర్వాత ఆయన పార్లమెంటు మార్గాన్ని ఎంచుకున్నారని పేర్కొంది.

07/08/2023 17:11(IST)

గౌరవ వేతనం పొందే ఇమామ్‌లు, మౌజమ్‌ల సంఖ్య పెంపు

హైదరాబాద్‌: తెలంగాణలో గౌరవ వేతనం పొందే ఇమామ్‌లు, మౌజమ్‌ల సంఖ్యను పెంచారు. దరఖాస్తులు పెండింగ్‌లో ఉన్న వారికి గౌరవ వేతనం మంజూరు చేశారు. గౌరవ వేతనం పొందే వారి సంఖ్య 9,995 నుంచి 17,000కు పెంచారు. ఇందుకు సంబంధించి మైనార్టీ సంక్షేమ శాఖ ఉత్తర్వులు జారీ చేసింది.

07/08/2023 17:07(IST)

అశేష జనదారులు.. అనేక అశృధారలు.. గద్దరన్న సంపాదించుకున్న ఆస్తి: రేవంత్‌రెడ్డి

గద్దర్‌కు నివాళి అర్పిస్తూ టీపీసీసీ చీఫ్‌ రేవంత్‌రెడ్డి ట్విటర్‌ వేదికగా పోస్టు పెట్టారు.

‘అశేష జనదారులు..

అనేక అశృధారలు..

గద్దరన్న సంపాదించుకున్న ఆస్తి.

ధన్యజీవి…

నిన్ను మరువదు ఈ గడ్డ’ అని ట్విటర్‌లో పోస్టు పెట్టారు.

07/08/2023 17:00(IST)

మంత్రి కేటీఆర్‌ అధ్యక్షతన సిటీ కన్వర్జెన్స్‌ సమావేశం

హైదరాబాద్‌: జీహెచ్‌ఎంసీ కార్యాలయంలో మంత్రి కేటీఆర్‌ అధ్యక్షతన సిటీ కన్వర్జెన్స్‌ సమావేశం నిర్వహించారు. కార్యక్రమంలో మంత్రులు ఎర్రబెల్లి దయాకర్‌రావు, సత్యవతి రాథోడ్‌, శ్రీనివాస్‌ గౌడ్‌, జీహెచ్‌ఎంసీ కమిషనర్‌ రోనాల్డ్‌ రాస్‌, మేయర్‌ గద్వాల విజయలక్ష్మి తదితరులు పాల్గొన్నారు.

07/08/2023 16:57(IST)

9న కేటీఆర్‌ చేతుల మీద ఐటీ హబ్‌ ప్రారంభం: ఎమ్మెల్సీ కవిత

నిజామాబాద్‌: ఐటీ హబ్‌ను ఎమ్మెల్సీ కవిత సందర్శించారు. ఈ నెల 9న నిజామాబాద్‌ ఐటీ హబ్‌ను మంత్రి కేటీఆర్‌ ప్రారంభిస్తారని ఆమె తెలిపారు. 750 మంది పనిచేసే సామర్థ్యంతో ఐటీ టవర్‌ నిర్మించినట్లు చెప్పారు. ఇప్పటికే 15 కంపెనీలతో ఒప్పందం జరిగిందని వివరించారు. నిజామాబాద్‌లో ప్రతి నెల జాబ్‌మేళా ఉండేలా చర్యలు తీసుకుంటున్నట్లు చెప్పారు. ఈ నెల 29న మరో జాబ్‌ మేళా ఉంటుందని తెలిపారు. 58 అంతర్జాతీయ కంపెనీలు ఈ మేళాకు వస్తున్నాయని ఆమె వివరించారు.

07/08/2023 16:52(IST)

సెప్టెంబర్‌ 7న ‘జవాన్‌’

షారుఖ్ ఖాన్‌, నయన తార, ప్రియమణి ప్రధాన పాత్రల్లో అట్లీ దర్శకత్వంలో తెరకెక్కిన యాక్షన్‌ చిత్రం ‘జవాన్‌’. ఈ సినిమా సెప్టెంబర్ 7న ప్రేక్షకుల ముందుకు రానున్నట్లు చిత్రబృందం తెలిపింది. ఈ మేరకు షార్‌ఖ్‌ ఖాన్‌ ఫొటోను ట్విటర్‌లో పంచుకుంది.

07/08/2023 16:44(IST)

బాల్య వివాహానికి ఏర్పాట్లు.. సర్పంచిని ఆశ్రయించిన బాలిక

నిర్మల్‌: కొండాపూర్‌లో 14 ఏళ్ల బాలికకు బాల్య వివాహం చేయడానికి ఏర్పాట్లు చేశారు. కుంటాల మండలం ఓలాకు చెందిన 33 ఏళ్ల వ్యక్తితో బాలికకు వివాహం చేయడానికి నిర్ణయించారు. పెళ్లి కార్యక్రమాల్లో భాగంగా బాలిక ఓలా గ్రామానికి వచ్చింది. వివాహం ఇష్టం లేక బాలిక ఓలా సర్పంచిని ఆశ్రయించింది. దీంతో సర్పంచి ఐసీడీఎస్‌, పోలీసులకు సమాచారమిచ్చారు. బాలికను అధికారులు నిర్మల్‌ సఖి కేంద్రానికి తరలించారు.

07/08/2023 16:34(IST)

పట్టిసీమ నుంచి పోలవరం బయలుదేరిన చంద్రబాబు

పట్టిసీమ ఎత్తిపోతల పథకాన్ని తెదేపా అధినేత చంద్రబాబునాయుడు సందర్శించారు. పట్టిసీమ నుంచి ఆయన పోలవరం వద్దకు బయలుదేరారు. పోలవరం వెళ్లే దారిలో ఆంక్షలున్నాయని, మీడియాకు అనుమతి లేదని పోలీసులు తెలిపారు. దీంతో పోలవరం నిషేధిత ప్రాంతమా?, పోలవరం ప్రాజెక్టు వద్దకు మీడియా వస్తే తప్పేంటని తెదేపా నేతలు ప్రశ్నంచారు.

07/08/2023 16:11(IST)

మణిపుర్‌ అంశంపై ముగ్గురు మాజీ జడ్జిలతో కమిటీ

దిల్లీ: మణిపుర్‌ అంశంపై ముగ్గురు మాజీ జడ్జిలతో కమిటీ ఏర్పాటు చేశారు. జస్టిస్‌ గీతా మిత్తల్‌ నేతృత్వంలో కమిటీ ఏర్పాటు చేశారు. కమిటీలో జస్టిస్‌ గీతా మిత్తల్‌తో పాటు జస్టిస్‌ శాలినీ జోషి, జస్టిస్‌ ఆశా మీనన్‌ సభ్యులుగా ఉన్నారు.

07/08/2023 16:10(IST)

సైకత శిల్పంతో గద్దర్‌కు నివాళి

కరీంనగర్ ఉమ్మడి జిల్లాకు చెందిన శంకర్ అనే కళాకారుడు.. ప్రజా గాయకుడు గద్దర్‌ సైకత శిల్పాన్ని తీర్చిదిద్ది ఆయనకు నివాళి అర్పించారు. కరీంనగర్‌లోని మంకమ్మ తోట ఏరియాలో ఈ సైకత శిల్పాన్ని రూపొందించి ఆయన తెలంగాణకు చేసిన సేవలను గుర్తు చేసుకున్నారు.

07/08/2023 16:04(IST)

తన భూమిని ఇతరులకు కట్టబెట్టారని మాజీ సైనికుడి ఆందోళన

కర్నూలు జిల్లా ఆలూరు తహసీల్దార్ కార్యాలయం ముందు మాజీ సైనికుడు మహేశ్‌ అనే వృద్ధుడు నిరాహార దీక్ష చేపట్టారు. తన సేవలను గుర్తించి ప్రభుత్వం 1979లో 2 ఎకరాల 96 సెంట్లు కేటాయించిందని తెలిపారు. అప్పటి నుంచి 2011 వరకు భూమి తన ఆధీనంలోనే ఉన్నట్లు చెప్పారు. కానీ ఆ తర్వాత రెవెన్యూ అధికారులు కుమ్మక్కై తన భూమిలో 0.53 సెంట్ల భూమిని ఇతరులకు కట్టబెట్టారని ఆరోపించారు. ఈ విషయమై తాను జిల్లా కలెక్టర్‌కు ఎన్నిసార్లు విన్నవించినా పట్టించుకోలేదని ఆవేదన వ్యక్తం చేశారు. తన దగ్గర అన్ని ఆధారాలు ఉన్నాయని, తన భూమి తనకు ఇప్పించాలని, లేదంటే నా ప్రాణం పోయేవరకు పోరాడతానని అన్నారు. ఆయనకు తోటి మాజీ సైనికులు మద్దతు నిలిచారు.

07/08/2023 15:52(IST)

మంగళగిరి నియోజకవర్గాన్ని గంజాయి స్థావరంగా మార్చారు: పంచుమర్తి అనురాధ

గుంటూరు జిల్లా మంగళగిరి నియోజకవర్గాన్ని గంజాయి స్థావరంగా మార్చారని తెదేపా ఎమ్మెల్సీ పంచుమర్తి అనురాధ ఆరోపించారు. జాతీయ చేనేత దినోత్సావాన్ని పురస్కరించుకొని మంగళగిరి టిడ్కో ఇళ్ల వద్ద నారా లోకేశ్ పంపించిన 100 రాట్నాలను ఎమ్మెల్సీ అనురాధ, మాజీ ఎంపీ నిమ్మల కిష్టప్ప లబ్ధిదారులకు అందజేశారు. రాష్ట్రంలో 3 లక్షల మంది నేత కార్మికులుంటే కేవలం 20వేల మందికే నేతన్న నేస్తం ద్వారా డబ్బులు ఇచ్చారని మాజీ ఎంపీ నిమ్మల కిష్టప్ప చెప్పారు. 25 మంది ఎంపీలను ఇస్తే కేంద్రం మెడలు వంచుతానన్న ముఖ్యమంత్రి జగన్.. నేడు కేసుల నుంచి బయటపడేందుకు అదే కేంద్రం ముందు మెడలు వంచారని ఆరోపించారు. గంజాయికి అలవాటు పడిన యువత ఆ మైకంలో అనేక నేరాలకు పాల్పడుతున్నారని ఎమ్మెల్సీ అనురాధ చెప్పారు.

07/08/2023 15:45(IST)

వైఎస్ రాజశేఖర్‌రెడ్డి నిర్వాకం వల్ల పోలవరం పదేళ్లు ఆలస్యమైంది: చంద్రబాబు

వైఎస్ రాజశేఖర్‌రెడ్డి నిర్వాకం వల్ల పోలవరం పదేళ్లు ఆలస్యమైందని తెదేపా అధినేత చంద్రబాబునాయుడు మండిపడ్డారు. రాష్ట్రానికి వరమైన పోలవరం 2004 నుంచి పాలకుల నిర్వాకం వల్ల రెండు సార్లు బలైందని ధ్వజమెత్తారు. పట్టిసీమ వద్ద ఉమ్మడి పశ్చిమ గోదావరి జిల్లా ప్రాజెక్టుల స్థితిగతులపై ఆయన పవర్ పాయింట్ ప్రజంటేషన్‌ ఇచ్చారు. 2004లో పోలవరానికి టెండర్లు మధుకాన్, శీనయ్య సంస్థలకు దక్కితే కక్ష సాధింపు చర్యలతో పనులు రద్దు చేశారని ఆరోపించారు. హెడ్ వర్క్స్‌ను నిర్ల్యక్యం చేసి కమీషన్ల కోసం కాలువ పనులపై దృష్టి పెట్టారని దుయ్యబట్టారు. 2004 నుంచి 2014 వరకు కేవలం 5 శాతం పనులు మాత్రమే జరిగాయని విమర్శించారు. రైతులకు పరిహారం ఇవ్వలేదని ఆగ్రహం వ్యక్తం చేశారు.

07/08/2023 15:38(IST)

తితిదేకు రూ.5.11 కోట్లు విరాళం

తిరుమల: చెన్నై స్థానిక సలహామండలి అధ్యక్షుడు శేఖర్‌రెడ్డి నేతృత్వంలో తొమ్మిది మంది దాతలు కలిసి తితిదేకు రూ.5.11కోట్లు విరాళం అందించారు. దాతలు ఈ మొత్తానికి సంబంధించిన డీడీని సోమవారం తిరుమల అన్నమయ్య భవనంలో తితిదే ఛైర్మన్ వైవీ సుబ్బారెడ్డికి అందజేశారు. చెన్నై టి.నగర్‌లోని వెంకటనారాయణ రోడ్డులో ప్రస్తుతం ఉన్న వేంకటేశ్వర స్వామి ఆలయ విస్తరణ కోసం స్థలం కొనుగోలుకు ఈ మొత్తాన్ని అందించారు.

07/08/2023 15:26(IST)

చింతలపూడి ఎత్తిపోతల ప్రాజెక్టు వద్ద చంద్రబాబు సెల్ఫీ ఛాలెంజ్‌

చింతలపూడి ఎత్తిపోతల ప్రాజెక్టు వద్ద తెదేపా అధినేత చంద్రబాబు నాయుడు సెల్ఫీ ఛాలెంజ్‌ విసిరారు. చింతలపూడి ఎందుకు పూర్తి చేయలేదో చెప్పాలని డిమాండ్‌ చేశారు. గత ప్రభుత్వ హయాంలో రూ.4,909 కోట్లతో పనులకు శ్రీకారం చుట్టినట్లు తెలిపారు. తెదేపా హయాంలోనే ప్రాజెక్టు కోసం రూ.2,289 కోట్లు ఖర్చు చేసినట్లు చెప్పారు. 4.8లక్షల ఎకరాలకు సాగునీరు ఇచ్చేలా రూపకల్పన చేసినట్లు వివరించారు. ప్రాజెక్టును వైకాపా అటకెక్కించడాన్ని ప్రశ్నిస్తూ చంద్రబాబు సెల్ఫీ ఛాలెంజ్‌ విసిరారు.

07/08/2023 15:16(IST)

రెండు ఘాట్ రోడ్లలో క్రాష్ బారియర్ల ఏర్పాటు: వైవీ సుబ్బారెడ్డి

తిరుమలలోని అన్నమయ్య భవన్‌లో తితిదే పాలకమండలి సమావేశం నిర్వహించారు. రూ.4 కోట్లతో అలిపిరి నడకమార్గంలో నరసింహస్వామి ఆలయం నుంచి మోకాలి మిట్ట వరకు భక్తులు సౌకర్యార్థం షెడ్లు ఏర్పాటు చేయనున్నట్లు తితిదే ఛైర్మన్‌ వైవీ సుబ్బారెడ్డి తెలిపారు. భక్తుల సౌకర్యార్థం రూ.2.5 కోట్లతో పీఏసీలో మరమ్మతులు చేయనున్నట్లు చెప్పారు. రూ.24 కోట్ల వ్యయంతో రెండు ఘాట్ రోడ్లలో క్రాష్ బారియర్లు ఏర్పాటు చేయనున్నట్లు చెప్పారు. రూ.4.5 కోట్ల వ్యయంతో నాణ్యత పరిశీలనకు ల్యాబ్ ఆధునికీకరణ చేయనున్నట్లు వివరించారు. రూ.9.85 కోట్లతో వకుళామాత ఆలయం అభివృద్ధి పనులు చేపట్టనున్నట్లు తెలిపారు.

07/08/2023 15:08(IST)

రాణిగంజ్‌కు చేరిన గద్దర్‌ అంతిమ యాత్ర

సికింద్రాబాద్‌: ప్రజాగాయకుడు గద్దర్‌ అంతిమయాత్ర రాణిగంజ్‌కు చేరుకుంది. బన్సీలాల్‌పేట్‌, ఆర్పీ రోడ్‌, సిటీలైట్‌ మీదుగా అంతిమయాత్ర సాగుతోంది. అంతిమయాత్రలో అభిమానులు, కార్యకర్తలు భారీగా పాల్గొన్నారు.

07/08/2023 15:05(IST)

మణిపుర్‌ కేసు.. సుప్రీం ధర్మాసనం ముందు హాజరైన డీజీపీ

దిల్లీ: మణిపుర్‌ హింసకు సంబంధించి దాఖలైన పిటిషన్లపై భారత సర్వోన్నత న్యాయస్థానం మరోసారి విచారణ చేపట్టింది. కేంద్ర, రాష్ట్ర ప్రభుత్వాల తరఫున అటార్నీ జనరల్‌ ఆర్‌ వెంకటరమణి, సొలిసిటర్‌ జనరల్‌ తుషార్‌ మెహతా హాజరై గతవారం సుప్రీం ధర్మాసనం కోరిన నివేదికలను అందించారు. సుప్రీం ఆదేశాల మేరకు ఆ రాష్ట్ర డీజీపీ రాజీవ్‌ సింగ్‌ కూడా ధర్మాసనం ముందు హాజరయ్యారు. రాష్ట్రంలో హింస, ఇప్పటివరకు అధికార యంత్రాంగం తీసుకున్న చర్యలకు సంబంధించి సుప్రీం కోర్టు అడిగే ప్రశ్నలకు ఆయన బదులివ్వనున్నారు. అయితే, హింసాత్మక ఘటనల దర్యాప్తునకు జిల్లా ఎస్పీల నేతృత్వంలో ఎస్‌ఐటీ (SIT)లను ఏర్పాటు చేయాలని మణిపుర్‌ ప్రభుత్వం కోరనున్నట్లు సమాచారం.

07/08/2023 14:42(IST)

ఎల్లారెడ్డి మార్కెట్‌ కమిటీలో బిహార్‌ కూలీల మధ్య గొడవ

కామారెడ్డి: ఎల్లారెడ్డి మార్కెట్‌ కమిటీలో బిహార్‌ కూలీల మధ్య గొడవ జరిగింది. ఈ గొడవలో అర్జున్‌ కుమార్‌ (22)పై ప్రవీణ్ కత్తితో దాడి చేసి పరారయ్యాడు. బాధితుణ్ని నిజామాబాద్‌ ప్రభుత్వ ఆసుపత్రికి తరలించారు.

07/08/2023 14:35(IST)

మహిళ, చిన్నారిని గోదావరిలో తోసేసిన కిరాతకుడి కోసం పోలీసుల గాలింపు

కోనసీమ జిల్లా: మహిళ, చిన్నారిని గోదావరిలో తోసేసిన కిరాతకుడి కోసం పోలీసులు గాలింపు చర్యలు చేపట్టారు. రావులపాలెం గౌతమి గోదావరిలో మహిళ, చిన్నారిని ఓ నిందితుడు తోసేశాడు. ఆ మహిళ, చిన్నారి కోసం మరో బృందం గాలింపు చర్యలు చేపట్టింది. సురక్షితంగా బయటపడిన కీర్తనను పోలీసులు చిన్నారి పెద్దమ్మకు అప్పగించారు. సమయస్ఫూర్తితో ప్రాణాలు కాపాడుకున్న కీర్తనను పలువురు ప్రశింసించారు. పోలీసులను ఉన్నతాధికారులు ప్రశంసించారు.

07/08/2023 14:30(IST)

అంతర్‌ జిల్లాల దొంగల ముఠా అరెస్ట్‌

కోనసీమ జిల్లా: అంతర్‌ జిల్లాల దొంగల ముఠా ఆరుగురిని పోలీసులు అరెస్ట్‌ చేశారు. అరెస్టయిన వారిలో విధుల నుంచి తొలగించిన సీఐఎస్‌ఎఫ్ కానిస్టేబుల్‌ రఫీ ఉన్నారు. గత నెల 27న క్రాప చింతలపూడిలో కొబ్బరి కాయల వ్యాపారి ఇంట్లో దోపిడీ జరిగింది. నిందితుల నుంచి రూ. 14 లక్షల విలువైన బంగారు ఆభరణాలను పోలీసులు స్వాధీనం చేసుకున్నారు.

07/08/2023 14:19(IST)

కడప కలెక్టరేట్‌ ముట్టడికి మున్సిపల్‌ కార్మికుల యత్నం

కడప కలెక్టరేట్‌ ముట్టడికి మున్సిపల్‌ కార్మికులు యత్నించారు. తమ సర్వీసును క్రమబద్ధీకరించాలని డిమాండ్‌ చేశారు. గేట్లు తోసేసి మున్సిపల్‌ కార్మికులు కలెక్టరేట్‌లోకి దూసుకెళ్లారు. పోలీసులు, కార్మికులకు మధ్య తోపులాట జరిగింది. అనంతరం మున్సిపల్ కార్మికులను పోలీసులు అరెస్ట్‌ చేశారు.

07/08/2023 14:15(IST)

రుక్సానా హత్య కేసులో మరో నలుగురి అరెస్ట్‌

అన్నమయ్య: రుక్సానా హత్య కేసులో మరో నలుగురిని అరెస్ట్‌ చేశారు. అన్నమయ్య జిల్లా మదనపల్లెలో ఈ నెల 3న రుక్సానా హత్య జరిగింది. భర్త కదిరి అహ్మద్‌తో పాటు మరో ముగ్గురిని నిందితులుగా గుర్తించారు.

07/08/2023 14:12(IST)

తిరుపతిలోని ఎస్పీడీసీఎల్‌ కార్పొరేట్‌ కార్యాలయం వద్ద ఉద్రిక్తత

తిరుపతిలోని ఎస్పీడీసీఎల్‌ కార్పొరేట్‌ కార్యాలయం వద్ద ఉద్రిక్తత చోటు చేసుకుంది. ఒప్పంద కార్మికులు ర్యాలీగా ఎస్పీడీసీఎల్‌ కార్యాలయం వద్దకు చేరుకున్నారు. పద్మావతి కల్యాణ మండపం వద్ద పోలీసులు కార్మికులను అడ్డుకున్నారు. ఎస్పీడీసీఎల్ ప్రధాన కార్యాలయాన్ని కార్మికులు ముట్టడించారు. దీంతో కార్మికులు, పోలీసులకు మధ్య తోపులాట జరిగింది.

07/08/2023 14:05(IST)

పోలీసుల వేధింపులతో వ్యాపారి ఆత్మహత్యాయత్నం

బాపట్ల: భట్టిప్రోలులో సత్తార్‌(55) అనే ఇనుప సామాన్ల వ్యాపారి పురుగుల మందు తాగి ఆత్మహత్యాయత్నం చేశాడు. చోరీకి గురైన వస్తువులు కొంటున్నారంటూ పోలీసులు వేధిస్తున్నారని ఆయన ఆరోపిస్తున్నాడు. భట్రిప్రోలు, చెరుకుపల్లి పోలీసులకు డబ్బులు ఇచ్చినట్లు తెలిపాడు. భట్టిప్రోలు ఎస్సై వేధింపులే ఆత్మహత్యాయత్నానికి కారణమని సత్తార్‌ ఆరోపిస్తున్నాడు.

07/08/2023 14:00(IST)

జానెడు జాగా ఇవ్వని వారితో ఉంటారా.. లేదా మాతో ఉంటారా: శ్రీనివాస్‌ గౌడ్‌

హైదరాబాద్‌: చేతివృత్తులు నాశనం ఐతే ప్రజలు రోడ్డున పడతారని మంత్రి శ్రీనివాస్‌గౌడ్‌ తెలిపారు. గీత కార్మికులు చెట్టు మీద నుంచి కింద పడితే గతంలో రూ.5 నుంచి రూ.10 వేలు ఇచ్చేవారని గుర్తు చేశారు. తెలంగాణ వచ్చాక పరిస్థితుల్లో మార్పు వచ్చిందని తెలిపారు. తెలంగాణకు ముందు 15 గురుకులాలు ఉంటే ఈరోజు 1000 గురుకులాలు ఉన్నాయని తెలిపారు. కేటీఆర్ ఆధ్వర్యంలో నేతన్నల రాత మారిందని అన్నారు. నేతన్నల భవంతి కోసం ప్రభత్వం రూ.250 కోట్ల విలువైన భూమి, రూ.5 కోట్ల నిధులు ఇచ్చిందని తెలిపారు. జానెడు జాగా ఇవ్వని వారితో ఉండాలా.. కులవృత్తులను పైకి తెచ్చిన వారితో ఉంటారా అని ప్రశ్నించారు.

07/08/2023 13:53(IST)

బాలికతో మాట్లాడుతున్నాడని పెట్రోల్‌ పోసి నిప్పంటించిన యువకులు

అన్నమయ్య: మదనపల్లె రూరల్‌ డ్రైవర్స్‌ కాలనీ వద్ద షేక్‌ అల్తాఫ్‌(19)పై ముగ్గురు యువకులు పెట్రోల్‌ పోసి నిప్పుపెట్టారు. బాలికతో మాట్లాడుతున్నాడనే నెపంతో నిప్పంటించారని బాధితుడు ఆరోపించాడు. తీవ్రగాయాలతో బాధితుడు ఆస్పత్రిలో చేరాడు. బైక్‌పై తీసుకొచ్చి గుర్తు తెలియని వ్యక్తులు హత్యాయత్నానికి పాల్పడ్డారు.

07/08/2023 13:50(IST)

సుప్రీం కోర్టులో వనమాకు ఊరట.. హైకోర్టు తీర్పుపై స్టే

దిల్లీ: సుప్రీం కోర్టులో కొత్తగూడెం ఎమ్మెల్యే వనమా వెంకటేశ్వరరావుకు ఊరట లభించింది. అనర్హతపై హైకోర్టు ఇచ్చిన తీర్పుపై సుప్రీంకోర్టు స్టే విధించింది. ప్రతివాదులకు సుప్రీంకోర్టు నోటీసులు జారీ చేసింది. రెండు వారాల్లో కౌంటర్‌ దాఖలు చేయాలని ఆదేశించింది. విచారణను 4వారాలకు వాయిదా వేసింది.

07/08/2023 13:45(IST)

ఆర్టీసీ ఉద్యోగుల కష్టాలపై పాట రాస్తానన్నారు.. అంతలోనే..: గద్దర్‌పై సజ్జనార్‌ ట్వీట్‌

ఆర్టీసీ ఉద్యోగుల కష్టాలపై ఓ పాట రాసి సంస్థకు అంకితం చేస్తానని గద్దర్‌ చెప్పారని టీఎస్‌ఆర్టీసీ ఎండీ వీసీ సజ్జనార్‌ గుర్తు చేసుకున్నారు. ఎల్బీ స్టేడియంలో గద్దర్‌ పార్థివదేహానికి ఆయన నివాళులర్పించారు. అనంతరం ట్వీట్‌ చేస్తూ ఆయనతో ఉన్న అనుబంధాన్ని సజ్జనార్‌ పంచుకున్నారు. ఉద్యోగుల కష్టాలపై పాట రాస్తానని చెప్పారని.. అంతలోనే గద్దర్‌ మరణవార్త వినడం తనను తీవ్ర దిగ్భ్రాంతికి గురిచేసిందని ఆయన పేర్కొన్నారు.

07/08/2023 13:44(IST)

కొత్తగా 16వేలకు పైగా మగ్గాలు ఇవ్వబోతున్నాం: కేటీఆర్‌

హైదరాబాద్‌: మన్నెగూడలో నిర్వహించిన జాతీయ చేనేత దినోత్సవంలో మంత్రి కేటీఆర్‌ పాల్గొన్నారు. నేతన్నకు బీమాను ప్రభుత్వమే ఇవ్వాలని నిర్ణయించిందని తెలిపారు. కొత్త మగ్గాలకు తెలంగాణ చేనేత మగ్గం అని పేరు పెట్టినట్లు తెలిపారు. కొత్తగా 16వేలకు పైగా మగ్గాలు ఇవ్వబోతున్నట్లు చెప్పారు. చేనేతలకు ప్రభుత్వమే ఉచితంగా గుర్తింపు కార్డులు ఇస్తుందని వివరించారు.

07/08/2023 13:41(IST)

చీతాల మరణాలపై కేంద్రం వాదనపై అనుమానమక్కర్లేదు

కునో నేషనల్‌ పార్కులో చీతాల మరణాల విషయంలో కేంద్ర ప్రభుత్వానికి సుప్రీంకోర్టులో ఊరట లభించింది. చీతాల మరణాలపై కేంద్రం సమర్పించిన వివరాలను అనుమానించాల్సిన అవసరం లేదని కోర్టు స్పష్టం చేసిందని సమాచారం.

07/08/2023 13:38(IST)

కర్నూలుకు చేరిన సీపీఎం మహాపాదయాత్ర

కర్నూలు: సీపీఎం మహాపాదయాత్ర కర్నూలు చేరుకుంది. కర్నూలు జిల్లా సమగ్రాభివృద్ధికి సీపీఎం ఆధ్వర్యంలో ఈ నెల 2న ఆదోనిలో యాత్ర ప్రారంభమైంది. ఈ నేపథ్యంలో కర్నూలు కలెక్టరేట్‌ వద్ద నిర్వహించిన బహిరంగ సభలో బీవీ రాఘవులు పాల్గొన్నారు.

07/08/2023 13:34(IST)

కాలువలోని పూడికను కార్యాలయం ఎదుట పడేసి మాజీ ఎమ్మెల్యే నిరసన

కాకినాడ: పిఠాపురం మున్సిపల్‌ కార్యాలయం వద్ద మాజీ ఎమ్మెల్యే వర్మ నిరసన వ్యక్తం చేశారు. మురుగు కాలువలోని పూడిక తీసి మున్సిపల్‌ కార్యాలయం ఎదుట పడేసి నిరసన తెలిపారు. పది రోజులుగా పారిశుద్ధ్య పనులు చేయడంలేదంటూ ఆయన నిరసన వ్యక్తం చేశారు. వర్మ తీరును నిరసిస్తూ మున్సిపల్ కార్యాలయం ఎదుట వైకాపా కౌన్సిలర్లు నిరసన తెలిపారు. వర్మను అరెస్ట్‌ చేయాలంటూ డిమాండ్‌ చేశారు.

07/08/2023 13:28(IST)

అనంతపురం కలెక్టరేట్‌ ముట్టడి

అనంతపురం కలెక్టరేట్: సమస్యలను పరిష్కరించాలని డిమాండ్ చేస్తూ మున్సిపల్ కార్మికులు అనంతపురం కలెక్టరేట్‌ను ముట్టడించారు. ప్రధాన గేటు ముందు బైఠాయించి నిరసన వ్యక్తం చేశారు. గేటు తోసుకొని లోనికి వెళ్లే ప్రయత్నంలో పోలీసులకు, ఆందోళనకారులకు మధ్య తోపులాట జరిగింది. పరిస్థితి అదుపు తప్పుతుండటంతో ఆందోళన కారులను అరెస్ట్‌ చేశారు.

07/08/2023 13:26(IST)

గద్దర్‌ అంతిమ యాత్ర నేపథ్యంలో పలు మార్గాల్లో ట్రాఫిక్‌జామ్‌

హైదరాబాద్: ప్రజా గాయకుడు గద్దర్‌ అంతిమ యాత్ర నేపథ్యంలో హైదరాబాద్‌లోని ఎంజే మార్కెట్‌, గాంధీ భవన్‌, నాంపల్లి, మాసాబ్‌ ట్యాంక్‌, మహవీర్‌ ఆసుపత్రి, అయోధ్య జంక్షన్‌ ప్రాంతాల్లో రహదారులపై వాహనాల రద్దీ నెలకొంది. దీంతో ట్రాఫిక్‌ పోలీసులు రద్దీని క్రమబద్ధీకరించే పనిలో నిమగ్నమయ్యారు.

07/08/2023 13:15(IST)

రాహుల్‌ గాంధీ ఎంపీ సభ్యత్వం పునరుద్ధరణ ప్రజాస్వామ్య విజయం: రేవంత్‌రెడ్డి

హైదరాబాద్‌: రాహుల్‌ గాంధీ ఎంపీ సభ్యత్వం పునురుద్ధరణ ప్రజాస్వామ్య విజయం అని టీపీసీసీ చీఫ్‌ రేవంత్‌రెడ్డి తెలిపారు. ఎప్పటికైనా న్యాయం గెలిచి తీరుతుందని చెప్పారు. భాజపా నిరంకుశ వైఖరికి ఇది చెంపపెట్టు అని పేర్కొన్నారు.

07/08/2023 13:12(IST)

పోలీసుల అత్యుత్సాహం.. వరద బాధితులకు అనుమతి నిరాకరణ

అల్లూరి జిల్లా కుక్కునూరు మండలం గొమ్ముగూడెం గ్రామంలో సీఎం జగన్ పర్యటన బందోబస్తులోని పోలీసులు అత్యుత్సాహం చూపారు. గొమ్ముగుడేం వరద బాధితులను గ్రామంలోకి వెళ్లకుండా పోలీసులు అడ్డుకున్నారు. తమ బాధలు సీఎంకు చెబుతామని అడిగినా నిరాకరించారు. దీంతో సీతారామపురం నుంచి పొలాల గుండా 3 కిలోమీటర్లు నడిచి సభా ప్రాంతానికి చేరుకునేందుకు గ్రామస్థులు ప్రయత్నించారు. వరదలతో ఇబ్బంది పడిన ఈ గ్రామస్థులకు అనుమతి లేదని పోలీసులు వెనక్కి పంపారు.

07/08/2023 13:05(IST)

వైఎస్‌ఆర్‌ హెల్త్ యూనివర్సిటీ ముట్టడికి ఏఐఎస్‌ఎఫ్‌ నాయకుల యత్నం

విజయవాడ: డాక్టర్ వైఎస్‌ఆర్‌ హెల్త్ యూనివర్సిటీ వద్ద ఉద్రిక్తత చోటుచేసుకుంది. జీవో 107, 108 రద్దు చేయాలని డిమాండ్‌ చేస్తూ ఏఐఎస్‌ఎఫ్‌ నాయకులు యూనివర్సిటీ ముట్టడికి యత్నించారు. ఈ జీవోల వల్ల పేద విద్యార్థులు వైద్య విద్యకు దూరం అవుతున్నారని తెలిపారు. నూతనంగా ప్రారంభం అవుతున్న ఐదు ప్రభుత్వ మెడికల్ కళాశాలల్లో 100శాతం కన్వీనర్ కోటాలో సీట్లను భర్తీ చేయాలని డిమాండ్‌ చేశారు. పోలీసులు ఏఐఎస్‌ఎఫ్‌ నాయకులను అరెస్ట్‌ చేసి గుణదల పోలీస్ స్టేషన్‌కు తరలించారు.

07/08/2023 13:00(IST)

ఆగ్రహం వ్యక్తం చేసిన ఎమ్మెల్యే.. కన్నీరు పెట్టుకున్న సబ్‌ రిజిస్ట్రార్‌

వైఎస్‌ఆర్‌ జిల్లా: ప్రొద్దుటూరు సబ్‌ రిజిస్ట్రార్‌ రామలక్ష్మిపై మాజీ ఎమ్మెల్యే వరదరాజులురెడ్డి.. కార్యాలయానికి వెళ్లి ఆగ్రహం వ్యక్తం చేశారు. సబ్‌ రిజిస్ట్రార్‌ కార్యాలయం అవినీతికి అడ్డాగా మారిందని వరదరాజులురెడ్డి తెలిపారు. కార్యాలయంలోని అధికారులను ఆయన బయటకు పంపారు. దీంతో సబ్‌ రిజిస్ట్రార్‌ రామలక్ష్మి కన్నీరు పెట్టుకున్నారు.

07/08/2023 12:52(IST)

జీవీఎంసీ గాంధీ విగ్రహం వద్ద మున్సిపల్ కార్మికుల ఆందోళన

విశాఖ: జీవీఎంసీ గాంధీ విగ్రహం వద్ద తమ డిమాండ్లు పరిష్కరించాలంటూ మున్సిపల్ కార్మికులు ఆందోళన చేపట్టారు. ఆందోళనకు అనుమతి లేదని కార్మికులను పోలీసులు అదుపులోకి తీసుకుంటున్నారు. ఈక్రమంలో కార్మికులు, పోలీసులకు మధ్య తోపులాట జరిగింది.

07/08/2023 12:46(IST)

విశాఖలో ఆస్తులు హరించేస్తున్నారని జనసేన నిరసన

విశాఖలో ఆస్తులు హరించేస్తున్నారంటూ రుషికొండ వద్ద జనసేన నిరసన తెలిపింది. ప్రజల ఆస్తులు, కొండలు, భూములు గోవిందా అంటూ నినాదాలు చేశారు. వారాహి విజయంతం కావాలని కొండకు వచ్చామని, ఆలయానికి రాకుండా అడ్డుకున్నారని పార్టీ నాయకుడు పంచకర్ల సందీప్‌ చెప్పారు. రుషికొండపై ఇష్టారాజ్యంగా తవ్వకాలు జరిపారని ఆరోపించారు. వైకాపా అక్రమాలను వారాహి యాత్రలో నిలదీస్తామని హెచ్చరించారు.

07/08/2023 12:33(IST)

కావలి కాలువ వద్ద రైతుల ఆందోళన

నెల్లూరు: జలదంకి మండలం చిన్నక్రాక కావలి కాలువ వద్ద ఉద్రిక్తత పరిస్థితి నెలకొంది. కావలి కాలువ ఆయకట్టు నీరు లేక వరి, పత్తి, వేరుశనగ పంటలు ఎండిపోవడంతో రైతులు ఆందోళనకు దిగారు. జలాశయంలో సమృద్ధిగా నీరున్నా సంగం బ్యారేజ్ వద్ద లాక్‌ల మెయింటెనెన్స్ సరిగా లేకపోవడంతో కృత్రిమ నీటి కొరత ఏర్పడుతోంది. దీంతో రైతులు రోడ్డుపై రాళ్లు, మోటార్ బైకులు అడ్డుగా పెట్టి బైఠాయించారు. నీటిపై స్పష్టమైన హామీ వస్తే గాని ఆందోళన విరమించమని తెలిపారు. ఈ క్రమంలో పోలీసులు అక్కడికి చేరుకోవడంతో రైతులు, పోలీసులకు మధ్య వాగ్వాదం చోటు చేసుకుంది.

07/08/2023 12:25(IST)

దిల్లీ ఎయిమ్స్‌లో అగ్నిప్రమాదం

దిల్లీ ఎయిమ్స్‌లో అగ్నిప్రమాదం జరిగింది. ఎండోస్కోపీ గది నుంచి మంటలు చెలరేగాయి. దీంతో ఆస్పత్రిలో సిబ్బందిని పోలీసులు బయటకు పంపారు. 6 అగ్నిమాపక యంత్రాలతో మంటలను అదుపులోకి తీసుకొచ్చేందుకు యత్నిస్తున్నారు.

07/08/2023 12:25(IST)

సభ్యత్వాన్ని పునరుద్ధరించిన అనంతరం.. తొలిసారి పార్లమెంటులో అడుగుపెట్టిన రాహుల్

దిల్లీ: పార్లమెంటు సభ్యత్వాన్ని పునురుద్ధరించిన క్రమంలో కాంగ్రెస్‌ ఎంపీ రాహుల్ గాంధీ పార్లమెంటుకు చేరుకున్నారు. పార్లమెంటు భవనం వద్ద గాంధీ విగ్రహానికి ఆయన నివాళి అర్పించారు. ఇండియా కూటమి నేతలు రాహుల్‌ను పార్లమెంటులోకి ఆహ్వానించారు.

07/08/2023 12:20(IST)

ప్రారంభమైన ప్రజాగాయకుడు గద్దర్‌ అంతిమయాత్ర

ప్రజాగాయకుడు గద్దర్‌ అంతిమయాత్ర ప్రారంభమైంది. అంతిమ యాత్ర ఎల్బీ స్టేడియం నుంచి నుంచి గన్‌పార్క్, అంబేడ్కర్ విగ్రహం, అమరవీరుల స్తూపం, ట్యాంక్ బండ్ మీదుగా అల్వాల్‌లోని ఆయన నివాసం వరకు జరగనుంది. అల్వాల్‌లో గద్దర్‌ పార్థివదేహాన్ని కొంత సమయం ఉంచనున్నారు. అనంతరం సమీపంలోని బోధి విద్యాలయం వరకు తీసుకెళ్లి అంత్యక్రియలు నిర్వహించనున్నారు. అంతిమ యాత్రకు ప్రజలు, కళాకారులు భారీగా తరలివచ్చారు.

07/08/2023 12:15(IST)

వరద బాధితులను అన్నివిధాలుగా ఆదుకుంటున్నాం: సీఎం జగన్‌

అల్లూరి జిల్లా కూనవరంలో సీఎం జగన్‌మోహన్‌రెడ్డి పర్యటించారు. వరద బాధితులతో సమావేశం నిర్వహించి మాట్లాడారు. వరద బాధితులను అన్నివిధాలుగా ఆదుకుంటున్నామని తెలిపారు. అధికారులు వారం పాటు గ్రామాల్లోనే ఉన్నారని తెలిపారు. బాధితులను ఆదుకునేలా సహాయ చర్యలు చేపట్టారని వివరించారు.

07/08/2023 12:10(IST)

తితిదే ప్రత్యేక ఆహ్వానితుల నియామకం ఆర్డినెన్స్‌పై విచారణ వాయిదా

అమరావతి: ఏపీ రాష్ట్ర ప్రభుత్వం తీసుకొచ్చిన ఆర్డినెన్స్‌పై, వ్యాజ్యాలపై హైకోర్టు విచారణ చేపట్టింది. తితిదే బోర్డుకు ప్రత్యేక ఆహ్వానితుల నియామకంపై ప్రభుత్వం ఆర్డినెన్స్ తెచ్చింది. నియామకాలకు వీలు కల్పిస్తూ ఏపీ దేవాదాయ చట్టానికి సవరణ చేస్తూ ఈ ఆర్డినెన్స్‌ తెచ్చింది. భారీగా ప్రత్యేక ఆహ్వానితుల నియామకం నిబంధనలకు విరుద్ధమని పిటిషనర్‌ తరఫు న్యాయవాది వై.బాలాజీ వాదనలు వినిపించారు. విచారణను హైకోర్టు శుక్రవారానికి వాయిదా వేసింది.

07/08/2023 12:00(IST)

పాకిస్థాన్‌ హనీట్రాప్‌లో సీఐఎస్‌ఎఫ్‌ కానిస్టేబుల్‌

విశాఖ: పాకిస్థాన్‌ హనీట్రాప్‌లో సీఐఎస్‌ఎఫ్‌ కానిస్టేబుల్‌ పడ్డాడు. తమీషా అనే మహిళతో కానిస్టేబుల్‌కు సోషల్‌ మీడియాలో పరిచయమైంది. ఈక్రమంలో సీఐఎస్‌ఎఫ్‌ కానిస్టేబుల్‌ కపిల్ కదలికలపై ఉన్నతాధికారులకు అనుమానం వచ్చింది. 2002 నుంచి కపిల్ కుమార్‌ విశాఖ స్టీల్‌ ప్లాంట్‌ సెక్యూరిటీ విధులు నిర్వర్తిస్తున్నాడు. అంతకుముందు రక్షణ రంగంలో భారత్‌ డైనమిక్స్‌ లిమిటెడ్‌లో విధులు నిర్వర్తించాడు. కీలక సమాచారం పాకిస్థాన్‌ గూఢచార సంస్థకు చేరినట్లు అధికారులు అనుమానం వ్యక్తం చేస్తున్నారు. సీఐఎస్‌ఎఫ్‌ కపిల్‌ మొబైళ్లను స్వాధీనం చేరుకొని ఫోరెన్సిక్‌ విచారణకు పంపింది. తదుపరి విచారణ కోరతూ స్టీల్‌ ప్లాంట్‌ పోలీసు స్టేషన్‌లో ఫిర్యాదు చేసింది.

07/08/2023 11:51(IST)

ప్రారంభమైన తితిదే ధర్మకర్తల సమావేశం

తిరుమల: తిరుమలలోని స్థానిక అన్నమయ్య భవనంలో తితిదే ధర్మకర్తల సమావేశాన్ని ఛైర్మన్‌ వైవీ సుబ్బారెడ్డి అధ్యక్షతన నిర్వహించారు. తితిదే ఈవో ధర్మారెడ్డి, బోర్డు సభ్యులు హజరయ్యారు. సుమారు 80 అంశాల మీద బోర్డులో సభ్యులు చర్చించనున్నారు. ఈ సందర్భంగా ప్రస్తుత బోర్డు ఛైర్మన్ వైవీ సుబ్బారెడ్డి.. నూతనంగా నియమితులైన ఛైర్మన్‌ భూమన కరుణాకర్‌రెడ్డిని శాలువాతో సత్కరించారు.

07/08/2023 11:43(IST)

జనసేన అభ్యర్థిగా తెనాలి నుంచి పోటీ: నాదెండ్ల

గుంటూరు: జనసేనపార్టీ రోజురోజుకూ బలపడుతోందని జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌ అన్నారు. జనసేన పార్టీ అభ్యర్థిగా తెనాలి నుంచి పోటీ చేస్తానని చెప్పారు. గుంటూరులో నాదెండ్ల మీడియా సమావేశం నిర్వహించారు. ఈ సందర్భంగా ఆయన మాట్లాడారు. వైకాపా ప్రభుత్వం ధాటికి సామాన్యులు చితికిపోతున్నారన్నారు. ప్రజల వ్యక్తిగత సమాచారం హైదరాబాద్‌లోని ప్రైవేటు సంస్థలకు ఏపీ ప్రభుత్వం పంపిస్తోందని ఆరోపించారు. రాష్ట్రంలో సర్పంచులను డమ్మీలుగా చేసి వాలంటీర్లు పెత్తనం చెలాయిస్తున్నారని విమర్శించారు. తితిదే ఛైర్మన్‌గా భూమన నియామకం వల్ల ఒరిగిందేమీ లేదని నాదెండ్ల మనోహర్‌ ఎద్దేవా చేశారు.

07/08/2023 11:40(IST)

చంద్రబాబును కలిసిన తెదేపా నేతలు.. పుంగనూరు ఘటనలో కేసులపై ఫిర్యాదు

ఏలూరులో తెదేపా అధినేత చంద్రబాబును అన్నమయ్య, చిత్తూరు జిల్లాల నేతలు కలిశారు. పుంగనూరు దాడి ఘటనలో అర్థరహితంగా కేసులు పెడుతున్నారని ఫిర్యాదు చేశారు. మారణాయుధాలతో వచ్చినట్లు కేసు పెట్టారని చంద్రబాబు దృష్టికి నేతలు తీసుకెళ్లారు.

07/08/2023 11:33(IST)

కోర్టులో హాజరుపర్చకపోవడంపై తెదేపా నాయకుల ఆందోళన

అంగళ్లులో మారణాయుధాలతో దాడికి యత్నించారని నల్లారి కిషోర్‌, అమర్‌నాథ్‌రెడ్డిపై కేసు నమోదు చేశారు. ఘంటా నరహరి, శ్రీరాం చినబాబులపై హత్యాయత్నం కేసులు నమోదు చేశారు. అంగళ్లు ఘటనలో పోలీసులు రెండు ఎఫ్‌ఐఆర్‌లు నమోదు చేశారు. పుంగనూరు ఘటనలో 5 ఎఫ్‌ఐఆర్‌లు నమోదు చేశారు. 200 మందిపై కేసులు నమోదు చేశారు. ఇప్పటికే పోలీసులు అదుపులో 60 మంది తెదేపా నాయకులున్నారు. 24 గంటలకు పైగా అదుపులో ఉన్నా కోర్టుకు హాజరుపర్చక పోవడంపై ఆందోళన వ్యక్తం చేస్తున్నారు. అరెస్టు చేసిన 60 మంది ఆచూకీ తెలియట్లేదని కుటుంబసభ్యులు ఆవేదన వ్యక్తం చేస్తున్నారు. రెండు రోజులుగా పోలీసులు చిత్రహింసలకు గురిచేస్తున్నారని తెదేపా ఆరోపిస్తోంది.

07/08/2023 11:24(IST)

గద్దర్ భౌతిక కాయానికి ప్రముఖుల నివాళి

గద్దర్ భౌతిక కాయానికి సీపీఐ రాష్ట్ర కార్యదర్శి కూనంనేని సాంబశివరావు, కాంగ్రెస్‌ ఎంపీ కోమటిరెడ్డి వెంకటరెడ్డి, సుప్రీంకోర్టు మాజీ ప్రధాన న్యాయమూర్తి జస్టిస్‌ ఎన్వీ రమణ, కాంగ్రెస్ సీనియర్ నేత జానారెడ్డి, పరిటాల శ్రీరామ్, మంత్రి నిరంజన్ రెడ్డి నివాళి అర్పించారు.

07/08/2023 10:43(IST)

ఎప్పుడు కలిసినా నవ్వుతూ మాట్లాడే వ్యక్తి గద్దర్‌: ఆలీ

సినీనటుడు ఆలీ.. గద్దర్‌ పార్థివ దేహానికి నివాళి అర్పించారు. గద్దర్‌తో తనకు 30 సంవత్సరాల పరిచయం ఉన్నట్లు తెలిపారు. ఎప్పుడు కలిసినా నవ్వుతూ మాట్లాడే వ్యక్తి అని చెప్పారు. పిట్టల దొర సినిమా విడుదల రోజు తన ఇంటికి వచ్చి సినిమా విజయం సాధిస్తుందని చెప్పారని గుర్తు చేసుకున్నారు. ప్రజల కోసం నిరంతరం పోరాడిన వ్యక్తి లేడని చాలా బాధగా ఉందన్నారు. గద్దర్ ప్రజల మనసులో ఎప్పుడూ బతికే ఉంటారని పేర్కొన్నారు.

07/08/2023 10:31(IST)

గద్దర్‌ భౌతిక కాయానికి మంత్రి ఇంద్రకరణ్‌రెడ్డి నివాళి

గద్దర్‌ భౌతిక కాయానికి మంత్రి ఇంద్రకరణ్ రెడ్డి నివాళి అర్పించారు. అణగారిన వర్గాల కోసం, తెలంగాణ కోసం ఆయన చేసిన పోరాటాన్ని గుర్తు చేసుకున్నారు.

07/08/2023 08:35(IST)

గద్దర్ అంతిమయాత్ర రూట్‌మ్యాప్‌

ప్రజాగాయకుడు గద్దర్‌ అంతిమయాత్ర ఈరోజు మధ్యాహ్నం 12 గంటలకు ఎల్బీస్టేడియం నుంచి ప్రారంభంకానుంది. అక్కడి నుంచి గన్‌పార్క్, అంబేడ్కర్ విగ్రహం, అమరవీరుల స్తూపం, ట్యాంక్ బండ్ మీదుగా అల్వాల్‌లోని ఆయన నివాసం వరకు జరగనుంది. అల్వాల్‌లో గద్దర్‌ పార్థివదేహాన్ని కొంత సమయం ఉంచనున్నారు. అనంతరం సమీపంలోని బోధి విద్యాలయం వరకు తీసుకెళ్లి అంత్యక్రియలు నిర్వహించనున్నారు.

07/08/2023 08:13(IST)

ఉద్యమాల వేగుచుక్క.. హైదరాబాద్‌తో విడదీయలేని అనుబంధం

ఈనాడు, హైదరాబాద్‌: ఆయన మాట సామాజిక సందేశం.. నోటి నుంచి జాలువారే పాట చైతన్య సంకేతం. గజ్జెల చిందులు సామాజిక రుగ్మతలపై అస్త్రాలు. గోలకొండ ఖిల్లా కింద ఘోరీ కడతం కొడకో.. అంటూ ఆలపిస్తే లక్షలాది గొంతుకలు జతకట్టాయి. పోరు తెలంగాణమా అంటూ నినదిస్తే కోట్లాదిమంది పాదాలు ఒకేతాటిపైకి చేరాయి. దశాబ్దాలుగా ఒంట్లో తూటాలతో సహవాసం చేస్తూ సమాజానికి పాటతో ఊపిరిపోస్తూ వచ్చారు. ప్రజా సంఘాలు.. రాజకీయ సమావేశాలు.. వేదిక ఏదైనా ఉద్యమాలకు ఊపిరిపోసిన వేగుచుక్క గద్దర్‌. అల్వాల్‌లో నివాసమున్నా.. నగరం, చుట్టుపక్కల ప్రాంతాలపై పూర్తి అవగాహన ఉంది. ఉద్యమగీతాలు రాసే కవులు.. ఆలపించే గాయకులను ప్రోత్సహించడమే కాదు.. తప్పులను సరిదిద్ది దిశానిర్దేశం చేసేవారంటూ పలువురు యువ గాయకులు తమ అనుభవాలను పంచుకున్నారు. కడ చూపు కోసం ఎంతోమంది ఎల్బీస్టేడియం వైపు తరలివెళ్లారు. సామాజిక మాధ్యమాల్లోనూ గద్దర్‌కు నివాళులర్పిస్తూ పోస్టులు ఉంచారు.

పూర్తి కథనం కోసం క్లిక్‌ చేయండి

07/08/2023 07:45(IST)

Gaddar: ప్రజా గాయక.. సెలవిక..!

కాలికి గజ్జెకట్టి.. ప్రజాక్షేత్రంలో పాటల తూటాలు కురిపించిన ప్రజా గాయకుడు గద్దర్‌ సినిమా రంగంపైనా తనదైన ముద్ర వేశారు. ‘బండెనక బండి కట్టి...’ (మాభూమి), ‘భద్రం కొడుకో...’ (రంగులకల), ‘ఆగదు ఆగదు... ఈ ఆకలి పోరు ఆగదు...’ (అడవి బిడ్డలు), ‘భారతదేశం భాగ్యసీమరా.. సకల సంపదలకి కొదువలేదురా.. (దండకారణ్యం) ‘మల్లెతీగకు పందిరివోలె మసక సీకటిలో వెన్నెలవోలె.. నీ పాదం మీద పుట్టుమచ్చనై చెల్లెమ్మా... (ఒరేయ్‌ రిక్షా), పొడుస్తున్న పొద్దుమీద నడుస్తున్న కాలమా.. పోరు తెలంగాణమా (జై బోలో తెలంగాణ).. ఇలా ఎన్నో పాటలతో రచయితగా, గాయకుడిగా, నటుడిగా మారి సినిమాల్ని ప్రభావితం చేశారు. ప్రజా సమస్యలు, ఉద్యమాలు, సామాన్యుడి పోరాటం తదితర ఇతివృత్తాలతో తెరకెక్కిన చాలా సినిమాల్లో గద్దర్‌ పాట వినిపించింది. బి.నర్సింగరావు, ఆర్‌.నారాయణమూర్తి, ఎన్‌.శంకర్‌ తదితర దర్శకుల సినిమాల్లో గద్దర్‌ పాటలు ఘనంగా వినిపించాయి.

ప్రత్యేక కథనం కోసం క్లిక్‌ చేయండి

07/08/2023 07:44(IST)

Gaddar: పాటే ఆయన ఆయుధం

ఈనాడు, హైదరాబాద్‌: భారత సమాజంలో ఎన్నిరకాల అసమానతలు ఉన్నాయో, ఎన్ని రకాలుగా దోపిడీ జరుగుతుందో, ఎన్ని రకాల వృత్తులున్నాయో అన్నింటిపై పాట రాసి, గజ్జెకట్టి పాడి జనాన్ని ఉర్రూతలూగించిన అభినవ వాగ్గేయకారుడు గద్దర్‌. ప్రజల్లో ఆలోచనలు రేకెత్తించి ఉద్యమంలో భాగమయ్యేలా చేయడంలో దేశవ్యాప్తంగా గుర్తింపు పొందిన ప్రజా యుద్ధనౌక ఆయన. నిరసన వ్యక్తం చేయడానికి పాటే ఆయన ఆయుధం. కిర్రు కిర్రు చెప్పులోయమ్మా.. అంటూ అంటరానితనం గురించి ఆవేదన వ్యక్తం చేయడం.. ఎంత సక్కగుండాదే నా చెత్తకుండీ.. అంటూ దాని గొప్పతనాన్ని వర్ణించడం, సుందరాంగి పాయఖానా.. అంటూ ఇలా చెప్పుకొంటూ పోతే ఎన్నో. సిరిమల్లె చెట్టుకిందా లచ్చుమమ్మో, కొంగు నడుముకు చుట్టవే చెల్లెమ్మా, బావయ్యో ఒక్కసారి చూసిపోవా.. ఇలా మహిళా ఉద్యమం నేపథ్యంలో వారి గురించే ఎన్నో పాటలు. తెలంగాణ గురించి ఇది దగాబడ్డ తెలంగాణ అంటూ.. ఆయన రాయని, పాడని అంశం అరుదు. రష్యాలో గోర్కి, చైనాలో లుషాన్‌ ఎంత ప్రభావం చూపారో భారతదేశంలో గద్దర్‌ అంత ప్రభావం చూపారని అనేక మంది రచయితలు, పరిశోధకులు పేర్కొంటారు.

పూర్తి కథనం కోసం క్లిక్‌ చేయండి

07/08/2023 07:38(IST)

గద్దర్‌ భౌతికకాయం వద్ద నివాళులర్పించిన కిషన్‌రెడ్డి

హైదరాబాద్‌: ప్రజా గాయకుడు గద్దర్‌ భౌతికకాయం వద్ద కేంద్రమంత్రి, భాజపా రాష్ట్ర అధ్యక్షుడు కిషన్‌రెడ్డి నివాళులర్పించారు. ఆయన కుటుంబసభ్యులను ఓదార్చారు.

07/08/2023 07:36(IST)

Gaddar: మర్లవడ్డ గానం... మరపురాని గళం

నడుముకు తెల్లటిపంచె, ఒంటిపై నల్లటి గొంగడి, చేతికి కడియాలు, కాళ్లకు గజ్జెలు, తలకు ఎర్రటి వస్త్రంతో గద్దర్‌ ఎక్కడికి వెళ్లినా ప్రత్యేకంగా కనిపించేవారు. తర్వాత వస్త్రధారణ మార్చినా తనదైన శైలిని మాత్రం కొనసాగించారు. విద్యార్థి దశ నుంచే ప్రజాజీవితంలో సాగారు. తల్లి నుంచి జానపదాన్ని వారసత్వంగా అందిపుచ్చుకున్నారు. అనంతర కాలంలో తన ఆటపాటలతో తెలుగు గడ్డను అలరించారు. ప్రజల ఆత్మీయ బంధువుగా మారారు. వివిధ సామాజిక రుగ్మతలపై పోరాడారు. ఉస్మానియా ఇంజినీరింగ్‌ కళాశాలలో విప్లవపంథాను ఎంచుకుని పాటలతో చైతన్య దీప్తిని వెలిగించిన గద్దర్‌ కొంత కాలానికి జనజీవనన స్రవంతిలోకి వచ్చినా... తుదిశ్వాస విడిచేవరకు తనపాటతో చైతన్యవంతంగా జీవించారు. తొలి, మలిదశ తెలంగాణ ఉద్యమాల్లో ప్రత్యేకంగా నిలిచారు. మలిదశ తెలంగాణ ఉద్యమంలో ఆయన రాసిన పాటలు ఉద్యమానికి కొత్త రూపుని ఇచ్చి ముందుకు తీసుకెళ్లాయి. ఉద్యమ సమయంలో గద్దర్‌ రాసిన పాటలు లేని కార్యక్రమం ఉండేది కాదంటే అతిశయోక్తికాదు.

పూర్తి కథనం కోసం క్లిక్‌చేయండి

06/08/2023 23:06(IST)

రేపు ఉదయం 10.30 గంటలకు గన్‌పార్క్‌కు గద్దర్‌ భౌతికకాయం

రేపు ఉదయం 10.30 గంటలకు గద్దర్‌ భౌతికకాయాన్ని గన్‌పార్క్‌కు తరలించనున్నారు. అమరవీరుల స్థూపం, అంబేడ్కర్‌ విగ్రహం వద్ద నివాళులర్పించిన అనంతరం అల్వాల్‌లోని గద్దర్‌ నివాసానికి ఆయన భౌతికకాయాన్ని తరలించనున్నారు.

06/08/2023 21:47(IST)

ఒక అరుణ తార నేలకొరిగింది: కూనంనేని సాంబశివరావు

గద్దర్ మరణంతో.. ఒక అరుణ తార నేలకొరిగిందని సీపీఐ రాష్ట్ర కార్యదర్శి కూనంనేని సాంబశివరావు అన్నారు. గద్దర్‌ చివరి వరకు కమ్యూనిస్టుగా జీవించారని, ఎన్నో పాటల ద్వారా విప్లవ జ్యోతులను వెలిగించారన్నారు. తెలంగాణ మలిదశ ఉద్యమంలో ఆయన రాసిన పాట పొడుస్తున్న పొద్దుమీద తెలంగాణ ఉద్యమానికి ఊపిరి పోసిందన్నారు.

06/08/2023 21:18(IST)

ప్రభుత్వ లాంఛనాలతో గద్దర్ అంత్యక్రియలు: కేసీఆర్‌

గద్దర్‌ అంత్యక్రియలు ప్రభుత్వ లాంఛనాలతో నిర్వహించాలని సీఎం కేసీఆర్‌ ఆదేశించారు. ఈ మేరకు ప్రభుత్వ అధికారిక లాంఛనాలతో గద్దర్‌ అంత్యక్రియలు నిర్వహించాలని సీఎస్‌ శాంతికుమారికి సీఎం ఆదేశించారు.

06/08/2023 21:12(IST)

గద్దర్‌ ఆట, మాట, పాట ఎప్పటికీ సజీవంగానే ఉంటాయి: ఎన్టీఆర్‌

గద్దర్‌ రచనలతో కొన్ని దశాబ్దాలుగా ప్రజల గుండెల్లో స్ఫూర్తిని నింపారని నటుడు జూ. ఎన్టీఆర్‌ అన్నారు. ట్విటర్ వేదికగా గద్దర్‌ మృతికి నివాళి అర్పించారు. ‘ప్రజా గాయకుడు గద్దర్ మన మధ్యన లేకున్నా.. ఆయన ఆట, మాట, పాట ఎప్పటికీ మన మధ్యన సజీవంగానే ఉంటాయని చెప్పారు. గద్దర్ కుటుంబసభ్యులకు నా ప్రగాఢ సానుభూతి తెలియజేస్తున్నాను’ అని ట్వీట్‌ చేశారు.

06/08/2023 21:08(IST)

గద్దర్‌ వ్యక్తిగతంగా నాకు మంచి ఆత్మీయుడు: వెంకయ్యనాయుడు

గద్దర్‌ మృతికి మాజీ ఉపరాష్ట్రపతి వెంకయ్య నాయుడు నివాళి అర్పించారు. గద్దర్‌ వ్యక్తిగతంగా తనకు మంచి ఆత్మీయుడని వెంకయ్యనాయుడు అన్నారు. గద్దర్‌ పాట నేరుగా మనసుల్ని తాకుతుందని చెప్పారు. గద్దర్‌ పాటలు ప్రజల ఆకాంక్షలను ఆవిష్కరించాయని తెలిపారు.

06/08/2023 20:43(IST)

విప్లవ దివిటీ గద్దర్‌: శ్రీనివాస్‌ గౌడ్‌

ప్రజా గాయకుడు, తెలంగాణ ఉద్యమ నేత, విప్లవ దివిటీ గద్దర్ మృతి తీవ్ర దిగ్భ్రాంతికరం అని మంత్రి శ్రీనివాస్‌ గౌడ్‌ అన్నారు. ట్విటర్‌ వేదికగా నివాళి అర్పించారు. ‘గద్దర్‌ ఆత్మకు శాంతి చేకూరాలని ఆ భగవంతుణ్ని ప్రార్థిస్తున్నాను. గద్దర్‌ కుటుంబసభ్యులకు నా ప్రగాఢ సానుభూతి’ అని ట్వీట్‌ చేశారు.

06/08/2023 20:38(IST)

గద్దర్ పార్థివదేహానికి నివాళులర్పించిన పవన్ కల్యాణ్‌

ఎల్బీ స్టేడియంలో ఉన్న గద్దర్ పార్థివదేహానికి జనసేన అధినేత పవన్ కల్యాణ్‌ నివాళులర్పించారు. అనంతరం పవన్‌.. గద్దర్‌ కుటుంబసభ్యులతో మాట్లాడి ఓదార్చారు.

06/08/2023 20:06(IST)

విప్లవ గళం మూగబోయింది: పురందేశ్వరి

గద్దర్‌ మృతికి ఆంధ్రప్రదేశ్‌ రాష్ట్ర భాజపా అధ్యక్షురాలు పురందేశ్వరి సంతాపం తెలిపారు. విప్లవ గీతాలను ఎంత సునాయాసంగా రాయగలరో.. భావుకత నిండిన గీతాలను అంతే అలవోకగా రాయగలరనిపించిందని ఆమె చెప్పారు. గద్దర్ మృతి ఆయన కుటుంబానికే కాదు.. తెలుగు రాష్ట్రాలకు తీరని లోటుగా అభివర్ణించారు. ఒక విప్లవ గళం మూగబోయిందని పురందేశ్వరి అన్నారు.

06/08/2023 19:27(IST)

తమ్ముడా.. అంటూ ఆప్యాయంగా పలకరించారు: పవన్ కల్యాణ్‌

ప్రజా గాయకుడు గద్దర్‌ మృతికి జనసేన అధినేత పవన్‌ కల్యాణ్‌ నివాళి అర్పించారు. ఆయన మాట్లాడుతూ.. ‘ప్రజా గాయకుడు గద్దర్‌ మరణించారంటే నమ్మశక్యం కావడంలేదు. అస్వస్థతతో బాధపడుతున్న ఆయనను చూడటానికి కొద్ది రోజుల క్రితమే ఆసుపత్రికి వెళ్లాను. తమ్ముడా.. అంటూ ఆప్యాయంగా పలకరించారు. ప్రస్తుతం తెలుగు రాష్ట్రాల్లో నెలకొన్న పరిస్థితులు, జాతీయ, అంతర్జాతీయ విషయాల గురించి మాట్లాడుకున్నాం. ‘మా భూమి’ చిత్రంలో ఆయన గానం చేసిన ‘బండెనక బండి కట్టి పదహారు బండ్లు కట్టి..’ అనే చైతన్య గీతం అజరామరం’ అని పవన్‌ చెప్పారు.

06/08/2023 19:13(IST)

గద్దర్ అకాల మరణం దిగ్భ్రాంతికి గురి చేసింది: భట్టి విక్రమార్క

గద్దర్ అకాల మరణం దిగ్భ్రాంతికి గురి చేసిందని కాంగ్రెస్‌ నేత భట్టి విక్రమార్క అన్నారు. గద్దర్‌ మృతికి భట్టి నివాళి అర్పించారు. ఆయన మాట్లాడుతూ.. సమాజ మార్పు కోసం తన ఆట, పాటతో పని చేశారని చెప్పారు. తెలంగాణ ఉద్యమాన్ని గద్దర్ పాట ఉర్రూతలూగించిందని అన్నారు. ప్రభుత్వం అధికారికంగా గద్దర్ అంత్యక్రియలు చేయాలని చెప్పారు.

06/08/2023 19:07(IST)

సోమవారం మధ్యాహ్నం వరకు ఎల్బీ స్టేడియంలో గద్దర్ పార్థివదేహం: సీతక్క

ప్రజల సందర్శనార్థం ఎల్బీ స్టేడియంలో గద్దర్ పార్థివ దేహం సోమవారం మధ్యాహ్నం వరకు ఉంటుందని ఎమ్మెల్యే సీతక్క చెప్పారు. గద్దర్ అభిమానులు, ప్రజలు, గద్దర్ పార్థివ దేహాన్ని చూడలనుకుంటున్న వారు ఎల్బీ స్టేడియానికి రావచ్చునని సీతక్క చెప్పారు. సోమవారం గద్దర్‌ అంత్యక్రియలు జరుగుతాయి.

06/08/2023 19:03(IST)

గద్దర్‌ పార్థివ దేహానికి నాయకుల నివాళి

ఎల్బీ స్టేడియంలో గద్దర్ పార్థివ దేహానికి నివాళులు అర్పించేందుకు పలు పార్టీ నేతలు తరలివస్తున్నారు. కాంగ్రెస్ నాయకురాలు కొండా సురేఖ, బాల్క సుమన్, గువ్వల బాలరాజు, వివేకానంద గౌడ్, పిడమర్తి రవి, గాదరి కిషోర్, మాజీ ఎంపీ సిరిసిల్ల రాజయ్య నివాళి అర్పించారు.

06/08/2023 19:00(IST)

సోమవారం గద్దర్ అంత్యక్రియలు

సోమవారం మధ్యాహ్నం 12 గంటల వరకు ఎల్బీ స్టేడియంలో గద్దర్‌ పార్థివదేహం ఉంటుంది. ఆయన స్థాపించిన విద్యాలయం గ్రౌండ్‌లో అంత్యక్రియలు చేసేందుకు నిర్ణయించినట్లు కుటుంబసభ్యులు తెలిపారు. అల్వాల్‌లోని గద్దర్ ఇంటి సమీపంలో ఉన్న మహాబోధి విద్యాలయం ఆవరణలో అంత్యక్రియలు నిర్వహించనున్నారు.

06/08/2023 18:54(IST)

గద్దర్‌ మృతిపై సీఎం కేసీఆర్‌ సంతాపం

ప్రజా గాయకుడు గద్దర్‌ మృతి పట్ల తెలంగాణ ముఖ్యమంత్రి కేసీఆర్‌ సంతాపం తెలిపారు. తెలంగాణ పాటకు ప్రపంచ ఖ్యాతి తెచ్చిన ప్రజాగాయకుడు గద్దర్.. తన పాటలతో పల్లెపల్లెనా తెలంగాణ భావజాలం వ్యాప్తి చేశారన్నారు. ఆటపాటలతో ప్రజల్లో స్వరాష్ట్ర చైతన్యం రగిలించారని కొనియాడారు. ప్రజల హృదయాల్లో గద్దర్‌ ప్రజా యుద్ధనౌకగా నిలిచారని.. ఆయన మరణంతో తెలంగాణ గొప్ప ప్రజాకవిని కోల్పోయిందన్నారు. ఈ మేరకు గద్దర్‌ కుటుంబ సభ్యులకు సీఎం కేసీఆర్‌ ప్రగాఢ సానుభూతి తెలిపారు.

06/08/2023 18:36(IST)

నమ్మిన సిద్ధాంతం కోసం నాలుగు దశాబ్దాలుగా పోరాడారు: రఘునందన్ రావు

ప్రజా యుద్ధనౌక గద్దర్ మృతి బాధాకరం అని దుబ్బాక ఎమ్మెల్యే రఘునందన్‌ రావు అన్నారు. నమ్మిన సిద్ధాంతం కోసం నాలుగు దశాబ్దాలుగా గద్దర్ పోరాడారని తెలిపారు. వారి కుటుంబానికి ప్రగాఢ సానుభూతి తెలియజేస్తున్నానని చెప్పారు. తెలంగాణ ఉద్యమాన్ని, ప్రజలను ఆయన గేయాలు చైతన్యం చేసాయని వివరించారు.

06/08/2023 18:32(IST)

ప్రజా యుద్ధనౌక అందించిన స్ఫూర్తి చరిత్ర మరవదు: ఎన్‌. శంకర్‌

గద్దర్‌ మృతికి దర్శకుడు ఎన్‌. శంకర్‌ సంతాపం తెలిపారు. ‘పల్లె పాట మీద ప్రేమ ప్రేమపెంచుకుని, జనం పాటను గుండెకు హత్తుకుని, పోరుపాటను ఎగిరే ఎర్రజెండా కు అద్దిన, ప్రజల గుండె గొంతుక ప్రజా యుద్ధనౌక అందించిన స్ఫూర్తి చరిత్ర మరవదు.. గద్దరన్న ఏ లోకంలో వున్నా.. అన్న పాట అన్ని కాలాల్లో వినిపిస్తూనే ఉంటుంది.. జోహార్ గద్దరన్న’ అని యన్. శంకర్ చెప్పారు.

06/08/2023 18:23(IST)

బడుగు బలహీన వర్గాల సమస్యలపై పోరాటం చేసిన వ్యక్తి: కంభంపాటి రామ్మోహన్‌ రావు

గద్దర్‌ మృతికి కంభంపాటి రామ్మోహన్‌ రావు సంతాపం ప్రకటించారు. బడుగు బలహీన వర్గాల సమస్యలపై పోరాటం చేసిన వ్యక్తి గద్దర్ అని కంభంపాటి రామ్మోహన్‌ రావు అన్నారు.

06/08/2023 18:12(IST)

మంత్రి కొప్పుల ఈశ్వర్ దిగ్భ్రాంతి

విప్లవ గాయకుడు గద్దర్ మరణం పట్ల మంత్రి కొప్పుల ఈశ్వర్ దిగ్భ్రాంతి వ్యక్తం చేశారు. తెలంగాణ ఉద్యమంలో తన గళంతో కోట్ల మంది ప్రజలను గద్దర్ ఉత్తేజపరిచారని, ఆయన మరణం బాధాకరం అని మంత్రి పేర్కొన్నారు.

06/08/2023 18:12(IST)

జనం గుండెల్లో గద్దర్ జీవించే ఉంటారు: నిరంజన్‌ రెడ్డి

గద్దర్‌ మృతి పట్ల వ్యవసాయ శాఖా మంత్రి సింగిరెడ్డి నిరంజన్‌రెడ్డి సంతాపం తెలిపారు. పాటతో ప్రజలను చైతన్యం చేసిన గద్దర్ జనం గుండెల్లో జీవించే ఉంటారని తెలిపారు. గద్దర్‌ ఆత్మకు శాంతి చేకూరాలన్నారు.

06/08/2023 18:10(IST)

గద్దర్ మృతి బాధాకరం: హరీశ్‌ రావు

ప్రజా యుద్ధ నౌకగా పేరుగాంచిన కవి, రచయిత గద్దర్ మృతి బాధాకరమని మంత్రి హరీశ్‌రావు దిగ్భ్రాంతి వ్యక్తం చేశారు. ప్రజా సమస్యలపై పోరాటం చేయడమే కాకుండా తనదైన ఆట, పాటలతో అందరినీ గద్దర్‌ కదిలించారని కొనియాడారు. ‘అమ్మా తెలంగాణమా, ఆకలి కేకల గానమా’, ‘పొడుస్తున్న పొద్దు మీద నడుస్తున్న గానమా’ అంటూ తెలంగాణ ఉద్యమంలో తన గళంతో కోట్లాది మంది ప్రజానీకాన్ని ఉత్తేజపరిచిన గద్దర్ మృతి తీరని లోటు అన్నారు.

06/08/2023 17:51(IST)

కళాకారులు ఇలా వెళ్లిపోవడం చాలా బాధాకరం: కల్వకుంట్ల విద్యాసాగర్‌ రావు

గద్దర్‌ మృతికి కల్వకుంట్ల విద్యాసాగర్‌రావు ట్విటర్‌ వేదికగా నివాళి అర్పించారు. ఈ మేరకు ఓ వీడియోను పంచుకున్నారు. ‘సాయిచంద్ అంత్యక్రియల్లో పాల్గొన్న సమయంలో గద్దర్‌ని ఓదారుర్చుతున్న మంత్రి కేటీఆర్‌, కళాకారులు ఇలా వెళ్లిపోవడం చాలా బాధాకరం’ విద్యాసాగర్‌ రావు ట్వీట్‌ చేశారు.

06/08/2023 17:29(IST)

'ప్రజా యుద్ధ నౌక' గద్దరన్నకు లాల్ సలాం: చిరంజీవి

గద్దర్‌ మృతికి ప్రముఖ సినీనటుడు చిరంజీవి ట్విటర్‌ వేదికగా సంతాపం తెలిపారు.
‘వారి గళం అజరామరం. ఏ పాట పాడినా, దానికో ప్రజా ప్రయోజనం ఉండేలా గొంతు ఎత్తి పోరాడిన ప్రజా గాయకుడు, 'ప్రజా యుద్ధ నౌక' గద్దరన్నకు లాల్ సలాం !
సరళంగా ఉంటూనే అత్యంత ప్రభావవంతమైన తన మాటల పాటలతో దశాబ్దాల పాటు ప్రజల్లో స్ఫూర్తిని రగిల్చిన గద్దరన్న ఇక లేరు అనే వార్త తీవ్ర విషాదాన్ని కలుగజేసింది.
ప్రజా సాహిత్యంలో, ప్రజా ఉద్యమాలలో ఆయన లేని లోటు ఎప్పటికీ పూడ్చలేనిది. పాటల్లోనూ, పోరాటంలోనూ ఆ గొంతు ఎప్పటికీ వినిపిస్తూనే ఉంటుంది.
ఆయన కుటుంబ సభ్యులకు, లక్షలాది ఆయన అభిమానులకు, శ్రేయోభిలాషులకు నా ప్రగాడ సంతాపం !’ అని ట్విటర్‌లో పోస్టు పెట్టారు.

06/08/2023 17:23(IST)

గద్దర్‌ ఓ విప్లవ శక్తి: నందమూరి బాలకృష్ణ

గద్దర్‌ మృతికి నందమూరి బాలకృష్ణ సంతాపం ప్రకటించారు. ‘తన ఆటపాటలతో ప్రజా ఉద్యమాలు నడిపించిన విప్లవకారుడు, ప్రజా ఉద్యమ నాయకుడు గద్దర్ మృతి పట్ల తీవ్ర దిగ్భ్రాంతి వ్యక్తం చేస్తున్నాను. గద్దర్ ఓ విప్లవశక్తి. ప్రజా ఉద్యమ పాటలంటే తెలుగు రాష్ట్రాల్లోనూ, దేశవ్యాప్తంగా మన గద్దర్ గుర్తుకు వస్తారు. ప్రజా ఉద్యమాల్లో గద్దర్ లేని లోటును ఎవ్వరు తీర్చలేరు. గద్దర్ ఆత్మకు శాంతి చేకూరాలని ఆ భగవంతున్ని ప్రార్థిస్తున్నాను. వారి కుటుంబ సభ్యులకు నా ప్రగాఢ సానుభూతి తెలియజేస్తున్నాను’ అని బాలకృష్ణ చెప్పారు.

06/08/2023 17:22(IST)

గద్దర్‌ తన గొంతుతో ప్రజల్లో చైతన్యం తీసుకువచ్చారు: కిషన్‌రెడ్డి

గద్దర్‌ మృతికి భాజపా తెలంగాణ రాష్ట్ర అధ్యక్షుడు కిషన్‌రెడ్డి ట్విటర్‌ వేదికగా నివాళి అర్పించారు. ఆయన మృతి విచారంలో మునిగినట్లు చెప్పారు. తెలంగాణ ఉద్యమంలో తన గొంతుతో ప్రజల్లో చైతన్యం తీసుకురావడంలో గద్దర్‌ కీలకపాత్ర పోషించారని గుర్తుచేశారు. ఆయన ఆత్మకు శాంతి చేకూరాలని ప్రార్థిస్తున్నట్లు కిషన్‌రెడ్డి తెలిపారు.

06/08/2023 17:14(IST)

గద్దర్‌ పార్థివదేహాన్ని ఇంటికి తరలిస్తున్న పోలీసులు

హైదరాబాద్‌: అమీర్‌పేట్‌లోని అపోలో స్పెక్ట్రా ఆసుపత్రి నుంచి గద్దర్ పార్థివ దేహాన్ని పోలీసులు అల్వాల్‌లోని ఆయన ఇంటికి తరలిస్తున్నారు. దీనికోసం ప్రత్యేక అంబులెన్స్‌తో పాటు పోలీసు ఎస్కార్ట్‌ వాహనం ఏర్పాటు చేశారు.

06/08/2023 17:13(IST)

బండెనక బండి కట్టి.. వెండితెరపై గద్దర్‌ కలం.. గళం

అన్యాయాలపై పోరాటం ఆయన పాట..ఉద్యమాలకు ఊపిరి ఆయన పాట..యువతకు ఉత్తేజం ఆయన పాట.. తూటాలతోనే కాదు, పాటలతోనూ విప్లవాన్ని తీసుకురావచ్చని నిరూపించిన ప్రజా గాయకుడు కన్నుమూయడంతో ఉద్యమగళం మూగబోయింది. ప్రజా సమస్యలపై పాట రూపంలో కోట్ల మంది హృదయాల్లో చెరగని ముద్రవేశారు గద్దర్‌. అంతేకాదు, వెండితెరపైనా ఆయన పాట మెరిసింది. పూర్తి వివరాల కోసం క్లిక్‌ చేయండి

06/08/2023 17:09(IST)

వచ్చే ఎన్నికల్లో పోటీ చేస్తానన్నారు: మల్లు రవి

గద్దర్‌ మృతికి కాంగ్రెస్ నేత మల్లు రవి సంతాపం తెలిపారు. ఆయన మాట్లాడుతూ.. వచ్చే ఎన్నికల్లో గద్దర్‌ పోటీ చేస్తానని చెప్పినట్లు తెలిపారు. ఎన్నికల వ్యవస్థలో మార్పు రావాలని అందుకోసం కృషి చేస్తానని గద్దర్‌ చెప్పినట్లు వివరించారు. ఆయన ఆత్మకు శాంతి చేకూరాలని కోరుకుంటున్నా.. ఆయన కుటుంబానికి ప్రగాఢ సానుభూతి అని మల్లు రవి ఆవేదన వ్యక్తం చేశారు.

06/08/2023 17:09(IST)

తెలంగాణ కోసం గళమెత్తిన వ్యక్తి గద్దర్: మాణిక్‌రావు ఠాక్రే

హైదరాబాద్‌: కాంగ్రెస్‌ రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే ఆస్పత్రి వద్ద గద్దర్ కుటుంబసభ్యులను పరామర్శించారు. తెలంగాణ కోసం గళమెత్తిన వ్యక్తి గద్దర్ అని తెలిపారు. అలాంటి వ్యక్తి మృతి చెందడం బాధాకరమన్నారు. రాష్ట్రానికి ఆయన మరణం తీరని లోటని, పేదల పక్షాన నిలబడిన వ్యక్తి గద్దర్ అని పేర్కొన్నారు. మాణిక్‌రావు ఠాక్రే కాంగ్రెస్ పార్టీ తరఫున గద్దర్‌ కుటుంబానికి ప్రగాఢ సానుభూతి తెలిపారు.

06/08/2023 17:05(IST)

గద్దర్‌ ప్రసంగాలు, పాటలు ప్రజల్లో స్ఫూర్తి నింపాయి: తలసాని

గద్దర్‌ మృతికి మంత్రి తలసాని శ్రీనివాస్‌ యాదవ్‌ సంతాపం తెలిపారు. ఆయన మృతి చాలా బాధాకరమని చెప్పారు. గద్దర్‌ మృతి అణగారిన వర్గాల ప్రజలకు తీరని లోటని తెలిపారు. గద్దర్‌ ప్రసంగాలు, పాటలు ప్రజల్లో ఎంతో స్ఫూర్తి నింపాయని వివరించారు.

06/08/2023 17:04(IST)

గద్దర్ కుటుంబ సభ్యులను ఓదార్చిన కాంగ్రెస్‌ నేతలు

హైదరాబాద్‌: ప్రజా గాయకుడు గద్దర్‌ మృతి చెందిన విషయం తెలుసుకున్న కాంగ్రెస్‌ నాయకులు అమీర్‌పేటలోని అపోలో ఆసుపత్రికి చేరుకుని కుటుంబ సభ్యులను పరామర్శించారు. ఏఐసీసీ తెలంగాణ ఇన్‌ఛార్జి మాణిక్‌రావు ఠాక్రే, పీసీసీ చీఫ్‌ రేవంత్‌రెడ్డి, మాజీ ఎంపీ వీహెచ్‌, ఎమ్మెల్యే సీతక్క, మల్లు రవి తదితరులు గద్దర్‌ భార్య విమలను ఓదార్చారు.

06/08/2023 17:02(IST)

మేస్త్రీ కొడుకుగా పుట్టి.. అసామాన్యుడిగా ఎదిగి..

ఈ పదానికి పరిచయం అక్కర్లేదు. వివరణ అవసరం లేదు. తెలుగు నేలలోనే కాదు దేశం నలుమూలలా తన గాత్రంతో ప్రజలను ఉత్తేజపరిచిన ప్రజాగాయకుడు గద్దర్‌. జానపద పల్లెగానం పరిణామం చెంది. విప్లవ గీతంగా మారింది. ఆ గీతానికి పర్యాయపదమే గద్దర్‌. తల్లి కడుపులోంచి బయటపడ్డ మరుక్షణం చిలకరించిన నీటి తుంపరలతో కెవ్వున వేసిన కేక.. 74 ఏళ్ల వయస్సులో నిలిచిపోయింది. ఎంతో మందిలో చైతన్యం తీసుకొచ్చిన ఆ గొంతు మూగబోయింది. ఈ సందర్భంగా ఆయన ఓ ఇంటర్వ్యూలో మాట్లాడిన విషయాలు ఆయన మాటల్లోనే..! పూర్తి వివరాల కోసం క్లిక్‌ చేయండి

06/08/2023 16:56(IST)

ప్రజలపై ప్రేమే గద్దర్‌ను పోరాటం వైపు నడిపింది: రాహుల్‌ గాంధీ

గద్దర్‌ మృతికి కాంగ్రెస్‌ అగ్రనేత రాహుల్‌ గాంధీ ట్విటర్‌ వేదికగా సంతాపం తెలిపారు. ఆయన మృతి వార్త విని బాధలో మునిగిపోయినట్లు చెప్పారు. ప్రజలపై ఆయనకున్న ప్రేమే ఆయన్ను పోరాటం వైపు నడిపిందని తెలిపారు. గద్దర్‌ మార్గం ప్రతి ఒక్కరికి స్ఫూర్తిదాయకమని చెప్పారు.

06/08/2023 16:52(IST)

పెత్తందారీ వ్యవస్థపై ధిక్కార స్వరం... గద్దర్‌

సమాజంలోని అన్నివర్గాలను మేలుకొలిపేది పాట. ఆ పాటలనే సామాన్యులకు సైతం అర్థమయ్యేలా చెప్పి.. చైతన్యవంతులను చేసేది ప్రజాగాయకులు. ఒక్క అక్షరం ముక్క లక్ష మెదళ్లకు కదలిక అన్న రీతిలో ఒక్క పదం అంకుశమై పెత్తందార్ల ఆధిపత్యాన్ని ప్రశ్నించింది. ఆ పదాన్ని గేయరూపంలో పాడి కోట్లాది పీడిత ప్రజల జీవితాల్లో కదలిక తెచ్చినవారు గద్దర్‌. ఆయన పాట పాడితే వేలాది గుండెలు చైతన్యవంతమవుతాయి. నేను సైతం అంటూ ప్రజాయుద్ధక్షేత్రంలోకి వస్తారు. అందుకనే ఆయనను ‘ప్రజాయుద్ధనౌక’ అని వీరావేశంతో పిలుస్తారు. పూర్తి కథనం కోసం క్లిక్‌ చేయండి!

06/08/2023 16:52(IST)

పార్థివదేహాన్ని ఇంటికి తరలించేందుకు ఏర్పాట్లు

గద్దర్‌ పార్థివ దేహాన్ని సికింద్రాబాద్‌ భూదేవినగర్‌లోని ఆయన ఇంటికి తరలించేందుకు ఏర్పాట్లు చేశారు. ప్రత్యేక అంబులెన్స్‌, పోలీసు ఎస్కార్ట్ వాహనంతో ఆయన పార్థివ దేహాన్ని తరలించేందుకు పోలీసులు ఏర్పాట్లు చేశారు.

06/08/2023 16:50(IST)

నా పోరాటానికి గద్దర్‌ స్ఫూర్తి: కోమటిరెడ్డి వెంకట్‌రెడ్డి

ప్రజా గాయకుడు గద్దర్ మృతి పట్ల భువనగిరి ఎంపీ కోమటిరెడ్డి వెంకట్ రెడ్డి సంతాపం ప్రకటించారు. తెలంగాణ ఉద్యమ సమయంలో గద్దర్‌తో మంచి అనుబంధం ఏర్పడిందని.. తన పోరాటానికి ఆయన స్ఫూర్తి అన్నారు. ప్రజా సమస్యలపై ఆయన పోరాటం అజరామరమని, తనదైన పాటలతో ఎంతోమందిని ఉత్తేజ పరిచారన్నారు. తెలంగాణ ఉద్యమ గళం అయిన గద్దర్ స్మృతిలో.. ఆయనకు నివాళులు అర్పిస్తుట్లు వెంకట్‌రెడ్డి తెలిపారు.

06/08/2023 16:49(IST)

అణగారిన వర్గాల ఆత్మగౌరవ ప్రతీక.. గద్దరన్న

ప్రజాగాయకుడు గద్దర్‌ కొన్ని దశాబ్దాల పాటు తన పాట ద్వారా అణగారిన వర్గాల వారిని చైతన్య పరిచారని ఎమ్మెల్యే సీతక్క అన్నారు. అణగారిన వర్గాల ఆత్మగౌరవ ప్రతీక.. గద్దరన్న అని వ్యాఖ్యానించారు.

06/08/2023 16:39(IST)

గద్దరన్నా... నువ్వు నా జీవిత కాల జ్ఞాపకం

నీ గానం... తెలంగాణ వేదం

నీ గజ్జె... తెలంగాణ గర్జన

నీ గొంగడి... తెలంగాణ నడవడి

నీ గొంతుక... తెలంగాణ ధిక్కార స్వరం

నీ రూపం... తెలంగాణ స్వరూపం

గద్దరన్నా... నువ్వు నా జీవిత కాల జ్ఞాపకం

నీ మరణం... నా గుండెకు శాశ్వత గాయం

- రేవంత్‌ రెడ్డి, పీసీసీ అధ్యక్షుడు

06/08/2023 16:38(IST)

ప్రజా గాయకుడు గద్దర్ అన్న హఠాన్మరణం బాధాకరం: జనసేన

గద్దర్‌ మృతికి జనసేన తెలంగాణ విభాగం ట్విటర్‌ వేదికగా సంతాపం తెలిపింది. తెలంగాణ ఉద్యమం కోసం తన గళంతో ప్రజా గళాన్ని వినిపించిన ప్రజా గాయకుడు గద్దర్ అన్న హఠాన్మరణం బాధాకరమని తెలిపింది. ప్రజా యుద్ధనౌక గద్దర్ మృతికి పార్టీ తరఫున, పవన్‌కల్యాణ్‌ తరఫున సంతాపం తెలుపుతున్నట్లు ప్రకటించింది.

06/08/2023 16:33(IST)

అధికారిక లాంఛనాలతో గద్దర్ అంత్యక్రియలు నిర్వహించాలి: వీహెచ్‌

అధికారిక లాంఛనాలతో గద్దర్ అంత్యక్రియలు నిర్వహించాలని కాంగ్రెస్‌ సీనియర్‌ నేత వి.హనుమంతరావు తెలిపారు. ముఖ్యమంత్రి కేసీఆర్ దీని మీద ప్రకటన చేయాలని కోరారు. తెలంగాణ ఉద్యమంలో గద్దర్‌ కీలకపాత్ర పోషించారని వీహెచ్‌ గుర్తు చేశారు.

06/08/2023 16:32(IST)

ఆసుపత్రి వద్దకు చేరుకున్న నాయకులు

కాంగ్రెస్‌ నేత రేవంత్ రెడ్డి, ఎమ్మెల్యే సీతక్క, విమలక్క ఆసుపత్రి వద్దకు చేరుకున్నారు. ఆసుపత్రి వద్ద విమలక్క కన్నీటి పర్యంతమయ్యారు. ఎమ్మెల్సీ, గాయకుడు గోరేటి వెంకన్న ఆసుపత్రి వద్దకు చేరుకున్నారు.

06/08/2023 16:26(IST)

ప్రజా వాగ్గేయకారుల్లో మరో శకం ముగిసింది: ఆర్‌.నారాయణమూర్తి

గద్దర్‌ మృతికి సినీ దర్శకుడు ఆర్‌.నారాయణమూర్తి సంతాపం తెలిపారు.
‘ఒక అన్నమయ్య పుట్టారు.. దివంగతులయ్యారు
ఒక రామదాసు పుట్టారు.. దివంగతులయ్యారు
ఒక పాల్ రబ్సన్ పుట్టారు.. దివంగతులయ్యారు
ఒక గద్దర్ పుట్టారు.. దివంగతులయ్యారు
ప్రజా వాగ్గేయకారుల్లో మరో శకం ముగిసింది’ అని ఆయన అన్నారు.

06/08/2023 16:21(IST)

గద్దర్‌ మృతికి చంద్రబాబు సంతాపం

ప్రజాగాయకుడు గద్దర్‌ మృతి పట్ల చంద్రబాబు నాయుడు సంతాపం వ్యక్తం చేశారు. పాటతో ప్రజా చైతన్యానికి కృషి చేసిన ప్రజాయుద్ధనౌక గద్దర్‌ అని చెప్పారు. గద్దర్‌ తన గళంతో ప్రజలను కదిలించారని గుర్తు చేశారు. ఆయన మృతితో ప్రజా ఉద్యమంలో ఒక శకం ముగిసిందని వివరించారు.

06/08/2023 16:21(IST)

గద్దర్‌ పాట శాశ్వతంగా బతికే ఉంటుంది: ఈటల

ప్రజా గాయకుడు గద్దర్ మృతిపై భాజపా ఎమ్మెల్యే ఈటల రాజేందర్ దిగ్భ్రాంతి వ్యక్తం చేశారు. ఆయన మరణం తెలంగాణకు తీరని లోటు అని చెప్పారు. తెలంగాణ కోసం గద్దర్‌ చేసిన పోరాటం మరవలేనిదని తెలిపారు. భౌతికంగా లేకపోయినా ఆయన పాట శాశ్వతంగా బతికే ఉంటుందని అన్నారు.

06/08/2023 16:17(IST)

ఆయన తెలంగాణ ఉద్యమ గళం: నారా లోకేశ్‌

గద్దర్‌ మృతికి తెదేపా జాతీయ ప్రధాన కార్యదర్శి నారా లోకేశ్ సంతాపం తెలిపారు. గద్దర్‌ మృతి గురించి తెలిసి దిగ్భ్రాంతికి గురైనట్లు తెలిపారు. గద్దర్‌ తెలంగాణ ఉద్యమానికి గళం అయ్యారని గుర్తు చేశారు.

06/08/2023 16:11(IST)

బడుగు, బలహీన వర్గాల విప్లవ స్ఫూర్తి గద్దర్‌: సీఎం జగన్‌

మంగళగిరి: గద్దర్ మృతికి ఏపీ సీఎం జగన్‌మోహన్‌రెడ్డి సంతాపం తెలిపారు. బడుగు, బలహీన వర్గాల విప్లవ స్ఫూర్తి గద్దర్‌ అని తెలిపారు. గద్దర్‌ పాట ఎప్పుడూ సామాజిక సంస్కరణల పాటే అని చెప్పారు.

06/08/2023 16:03(IST)

నంది అవార్డు తిరస్కరించి...

‘అమ్మ తెలంగాణమా...’, ‘పొడుస్తున్న పొద్దుమీద...’ వంటి పాటలు ఉద్యమాలకు మరింత ఊపుతెచ్చాయి. ‘మాభూమి’లో వెండితెరపై కనిపించిన గద్దర్‌ ఆయనకు ‘నీ పాదం మీద పుట్టుమచ్చనై చెల్లెమా..’ పాటకు నంది అవార్డు లభించింది. అయితే, ఆ అవార్డును తిరస్కరించారు.

06/08/2023 16:02(IST)

పాటలతో తెలంగాణ ఉద్యమానికి ఊపుతెచ్చి...

గద్దర్‌ 1949లో తూప్రాన్‌లో జన్మించారు. ఆయన అసలు పేరు గుమ్మడి విఠల్‌ రావ్‌. నిజామాబాద్‌, హైదరాబాద్‌లో విద్యాభ్యాసం పూర్తి చేసిన ఆయన 1975లో కెనరా బ్యాంకులో ఉద్యోగం చేశారు. ఆయనకు భార్య విమల, ముగ్గురు పిల్లలు (సూర్యుడు, చంద్రుడు, వెన్నెల). జన నాట్యమండలి వ్యవస్థాపకుల్లో గద్దర్‌ కూడా ఒకరు. ప్రజా సమస్యలపై పోరాటం చేయడమే కాకుండా తనదైన పాటలతో అందరినీ ఉత్తేజ పరిచేవారు. మరీ ముఖ్యంగా తెలంగాణ ఉద్యమంలో ఆయన కీలక పాత్ర పోషించారు. తన పాటలతో ఉద్యమానికి ఊపుతెచ్చారు.

డిఫెండింగ్‌ ఛాంపియన్‌కు షాకిచ్చిన భారత హాకీ టీమ్‌

తాజా వార్తలు (Latest News)

చెన్నైకి గోల్డెన్ ఛాన్స్‌.. ఇలా జరిగితే ఏకంగా రెండో స్థానానికే!

ఆషికా ‘ఐస్‌ క్రీమ్‌ స్టోరీ’.. శ్రద్ధాదాస్‌ విహార యాత్ర

నేటి రాశి ఫలాలు.. 12 రాశుల ఫలితాలు ఇలా... (17/05/24)

దాడి ఘటనపై తొలిసారి స్పందించిన స్వాతి మాలీవాల్‌

ప్రభాస్‌, అల్లు అర్జున్‌ సినిమాల్లో ఛాన్స్‌.. వైష్ణవీ చైతన్య ఏమన్నారంటే?

వన్‌ టూ త్రీ ఫోర్‌.. ఇప్పటికీ అవే నాలుగంకెల పిన్స్‌!

సుఖీభవ

చదువు