రిటైల్‌ మార్కెటింగ్‌లో డిప్లొమా చేయాలని..

డిస్టెన్స్‌లో ఎంఏ (ఇంగ్లిష్‌) పూర్తిచేసి.. ప్రైవేటు ఉద్యోగం చేస్తున్నా ఎదుగుదల లేదు. ఇప్పుడు కాకతీయ వర్సిటీ ఎస్‌డీఎల్‌సీఈలో ‘డిప్లొమా ఇన్‌ రిటైల్‌ మార్కెటింగ్‌’ చేద్దామనుకుంటున్నా. ఉపయోగమేనా?

వి.సురేష్‌, వరంగల్‌  

• మీరు ప్రస్తుతం ఏం ఉద్యోగం చేస్తున్నారో చెప్పలేదు. రిటైల్‌ మార్కెటింగ్‌లో డిప్లొమా ఎందుకు చేయాలనుకుంటున్నారు? డిప్లొమా, సర్టిఫికెట్‌ ప్రోగ్రాంలు.. ఆ రంగంలో అప్పటికే ఉద్యోగం చేస్తున్నవారి పదోన్నతికి ఉపయోగపడతాయి కానీ, కొత్తగా ఉద్యోగం పొందటానికి కాదు. మీ ప్రస్తుత వయసును బట్టి కూడా నిర్ణయించుకోవాలి. మీకు రిటైలింగ్‌ రంగంపై నిజమైన ఆసక్తి ఉందా? ఆ రంగంలో ఉద్యోగాలు ఎక్కువని ఆ వైపు వెళ్లాలనుకొంటున్నారా? మీకు రిటైలింగ్‌పై ఆసక్తి ఉంటే, ముందుగా ఆన్‌లైన్‌లో సంబంధిత కోర్సులు కొన్ని చేసి ఆ రంగంలోని ప్రాథమిక అంశాలపై అవగాహన ఏర్పర్చుకోండి. ఆ తరువాత ఏదైనా ప్రముఖ రిటైలింగ్‌ సంస్థలో ఓ చిన్న ఉద్యోగంలో చేరి కొంత అనుభవం, నైపుణ్యాలు గడించండి. మీకు ఆ రంగంలో ఉద్యోగం నచ్చితే రిటైలింగ్‌లో ఎంబీఏ చేసే ప్రయత్నం చేయండి. ఎంబీఏ లాంటి ప్రొఫెషనల్‌ కోర్సులను రెగ్యులర్‌ విధానంలో, అత్యుత్తమ విద్యా సంస్థల నుంచి చదివితే మంచి భవిష్యత్తు ఉంటుంది.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌