రైళ్లు లేవ్‌... రోడ్లు కనపడవ్‌!

* దేశం: గ్రీన్‌లాండ్‌
* రాజధాని: నూక్‌
* విస్తీర్ణం: 21,66,086
* చదరపు కిలోమీటర్లు
* కరెన్సీ: డానిష్‌ క్రోనె
* జనాభా: 56,483
* భాష: గ్రీన్‌లాండిక్‌

ఎక్కువశాతం మంచుతో నిండి ఉండే దేశం గ్రీన్‌లాండ్‌. దీనిలో ఎనభై శాతానికిపైగా నేల మంచు దుప్పట్లోనే ఉంటుంది.
* భౌగోళికంగా చూస్తే ఉత్తర అమెరికా ఖండంలోదే. కానీ ఐరోపా ఖండంతో ఎక్కువ సంబంధాలున్నాయి. ఎందుకంటే ఇది ఐరోపా దేశమైన డెన్మార్క్‌ అధీనంలో ఉండేది. 1981లో పూర్తి స్వతంత్ర దేశంగా మారింది.
* డెన్మార్క్‌ అధీనంలో ఉన్నప్పుడు 1946లో దీన్ని అమెరికా కొనేసుకోవాలని చూసింది. అందుకు డెన్మార్క్‌ అంగీకరించలేదట.
* ఆర్కిటిక్‌, అంటార్కిటిక్‌ మహా సముద్రాల మధ్యలో ఉంటుంది. ప్రపంచంలోనే అతి పెద్ద దీవి ఇది. దీనిలో కొంత భాగం ఆర్కిటిక్‌ వలయంలోనూ ఉంటుంది.
* వీరి అధికారిక భాష గ్రీన్‌లాండిక్‌. డానిష్‌, ఆంగ్లమూ ఎక్కువగా మాట్లాడతారు.
* గున్‌బోర్న్‌ శిఖరం ఇక్కడ అతిఎత్తయిన ప్రాంతం. ఇది సముద్రమట్టానికి  3,733 మీటర్ల ఎత్తున ఉంటుంది.

పడవల్లోనే ప్రయాణం!

* మంచుతో కప్పి ఉండటంతో ఈ దేశంలో రైల్వే వ్యవస్థే లేదు. ఎక్కువగా బోట్లు వాడతారు. విమానాలు, స్నోమొబైల్‌ల మీద అరుదుగా ప్రయాణిస్తారు. దగ్గర దగ్గర దూరాలకైతే కుక్కలతో నడిచే డాగ్‌స్లెడ్‌ల మీదెక్కి వెళతారు.
* ఇక్కడ రోడ్డు వ్యవస్థ కూడా తక్కువే. ఒక్క రాజధాని నగరంలో మాత్రమే మంచి రోడ్లు కనిపిస్తాయి. దేశం మొత్తం మీద 2,570 కార్లున్నాయంతే. ఒక టౌను నుంచి ఇంకో టౌనును కలిపేలా మాత్రం రహదారులు లేవు.
* ఈ నేలల్లో రత్నాల నిధులు ఎక్కువ. నీలం, కెంపులు బాగా దొరుకుతాయి.

అర్ధరాత్రి సూరీడు!

  * భూమిపై ఇదున్నచోటు, తీరుని బట్టి ఇక్కడో విచిత్రం కనిపిస్తుంది. మే మధ్య నుంచి జులై మధ్య వరకూ ఇక్కడ సూర్యుడు ఎప్పుడూ పూర్తిగా అస్తమించడు. అంటే అర్ధరాత్రి కూడా కనిపిస్తాడన్నమాట.
* ఇక్కడున్న మంచు నాలుగు నుంచి ఎనిమిది లక్షల ఏళ్ల క్రితందని శాస్త్రవేత్తలు పరిశోధనల ద్వారా తేల్చారు. అందుకే ఇక్కడ పచ్చదనమూ పెద్దగా కనిపించదు.
* దేశమంతా మంచు కప్పే ఉన్నా అక్కడక్కడా వేడినీటి బుగ్గలున్నాయి. వీటిల్లో దాదాపు 37డిగ్రీల సెల్సియస్‌లో వేడి నీరుంటుంది. అందుకే ఇవున్న చోట్ల పర్యాటకం పెరిగింది.
* ఒక్క జులైలో మాత్రమే ఇక్కడ నీరు గడ్డకట్టని ఉష్ణోగ్రతలు అక్కడక్కడా నమోదవుతాయి. మిగిలిన కాలం అంతా మైనస్‌ డిగ్రీలే.
* ఇక్కడ పేరుకుపోయిన మంచు ప్రపంచం మొత్తం మీద ఉన్న మంచి నీటిలో ఏడు శాతానికి సమానం.

జనం కొంచెం.. భూమి ఘనం!

* విస్తీర్ణాన్ని బట్టి చూస్తే ఇది పెద్ద దేశమే. దాదాపుగా గ్రేట్‌బ్రిటన్‌, ఫ్రాన్స్‌, స్పెయిన్‌, జర్మనీలను కలిపితే ఎంతో అంతకన్నా ఎక్కువే. అయితే జనాభా ఉన్నది మాత్రం వేలల్లోనే.
* రాజధాని నగరం నూక్‌లోనే పదహారు వేల మందికిపైగా జనాభా నివసిస్తున్నారు. చిన్న పల్లెలు కాకుండా ఇక్కడున్నది 16టౌనులు మాత్రమే. రోడ్లు లేకపోవడంతో ఒకదానికొకటి సంబంధంలేనట్లుగా ఉంటాయి.
* ఇక్కడి స్థానికులంతా మధ్య ఆసియా ప్రాంతాల నుంచి వచ్చి స్థిరపడిన వారని చెబుతారు.
* ప్రాచీన కాలం నుంచీ ఇక్కడ ఉంటున్న స్థానికుల్ని కలాలిత్‌ అని పిలుస్తారు. స్థానిక భాషలో దీనర్థం ‘గ్రీన్‌లాండర్‌’ అని.
* పూసల ఎంబ్రాయిడరీతో చేసే ఓరకం దుస్తులువీరి ‘నేషనల్‌ కాస్ట్యూమ్‌’.
* సీళ్లు, తిమింగలాల్ని వీరు ఎక్కువగా తింటారు. అందుకే వీటితోపాటు చేపల్ని వేటాడటం వీరికి ప్రధాన ఆదాయ వనరు.
* మాంసంతో చేసుకునే సాసట్‌ వీరి జాతీయ వంటకం.