సంచలనానికి ‘కన్నుగీటు’రాయి

సంచలనానికి ‘కన్నుగీటు’రాయి

ఆ నల్ల కలువల్లాంటి కళ్లు..
పెద్దవి చేసి చూసి..
ఎక్కుపెట్టిన విల్లంభులాంటి కనుబొమలు.. ఎగరేసి...
ఓ గీటు గీటితే... ఎంతటి పురుషపుంగవులైనా గాలిలో తేలిపోవాల్సిందే
అలా ఆ కళ్లతో బాణం వేసి...
రెండు వేళ్లతో గురి చూసి
గుండెల్లో   కాల్చింది.. ప్రియా!
అంతే....!

 పాజ్‌కొట్టి.. రిపీట్‌ చేసి.. ఆ 30 సెకన్ల దృశ్యాన్నే తిప్పి తిప్పి చూసి.. నెటిజన్లందరూ అలసిపోయారు. అప్పటికైతే ప్రేమికుల దినోత్సవం మత్తులో ఉన్నవాళ్లకు..గమ్మత్తయిన జ్ఞాపకాల్లోకి తీసుకెళ్లిన సంఘటన ఇది. ఒక్క ప్రేమికులకే కాదు. పద్దెనిమిదేళ్ల ఈ మళయాల కుట్టీ ప్రియా ప్రకాష్‌ వారియర్‌ నేషనల్‌ క్రష్‌. ఒక్క కనుసైగతో మాయచేసి.. రాత్రికి రాత్రే అంతర్జాలంలో అతిలోక సుందరిలా వెలిగిపోయింది..! తనేమీ కష్టపడి డ్యాన్సులు చేయలేదు. మగరాయుడిలా ఫైట్లు చేయలేదు. యాక్షన్‌తో అదరగొట్టలేదు. తను చేసిందల్లా.. సులువుగా, సొగసుగా, కొంటెతనంతో కన్నుకొట్టిందంతే! ఆ ఓరచూపులో అమాయకత్వం. అప్పుడే అరవిరిసిన సహజత్వం. ఆ పిలగాడు (హీరో) ఒక కనుతో సైగ చేస్తే.. తను రెండు కనుబొమలు ఎగరేస్తుంది. కాస్త ఆశ్చర్యంగా మళ్లీ ‘నేనంటే ఇష్టమా’ అన్నట్లు కళ్లతోనే అడుగుతాడు. ‘ఎందుకు కాదు, చచ్చేంత ఇష్టం’ అన్నట్లు కన్నుకొట్టి బుట్టలో పడేస్తుంది ప్రియ. మళయాలీ చిత్రం ‘ఒరు అదార్‌ లవ్‌’లోని మాణిక్య మలరాయ పూవీ పాట టీజర్‌ అంత సంచలనం అవుతుందని దర్శకుడే ఊహించలేదు. అప్పటి వరకు గూగుల్‌లో అత్యధికంగా శోధించే సెలబ్రిటీ సన్నీలియోన్‌ను ప్రియావారియర్‌ అధిగమించింది. ఇప్పుడు మోస్ట్‌ సెర్చ్‌డ్‌ సెలబ్రిటీ తనే! కన్నుగీటడంలో తనూ పీహెచ్‌డీ ఏం చేయలేదు. కన్ను గీటడంలో తనేం శిక్షణ పొందలేదు. అయినా లోకం ఆమెకు ఫిదా అయ్యింది. ఇందులో తన గొప్పెంత ఉందో... దీన్ని ఆస్వాదించిన కళ్లదీ అంతేగొప్ప. సున్నిత భావాలకు దూరంగా...మోడుబారిన వృక్షాలపై తొలకరి చినుకుల్లా కురిసిందా కన్నుగీటు సుందరి. అంతే ఒక్కసారిగా లోలోపల దాగున్న సున్నితత్వం ఇంతలా పరమళించింది. కన్నుగీటడం ఇప్పుడే కాదు.. .ఎప్పుడూ సంచలనమవుతూనే ఉంది... కావాలంటే మీరే చదవండి.

చిన్నప్పుడు సరదాగా కన్నుకొట్టి సరసం ఆడిన సంఘటనలు ప్రతి ఒక్కరి జీవితంలో ఉంటాయి. ప్రియావారియర్‌ కన్నుకొట్టే దృశ్యాన్ని చూసి.. ‘నా కళ్లు చెబుతున్నాయి.. నిను ప్రేమించానని’ అంటూ పాత జ్ఞాపకాల్లోకి వెళ్లేవాళ్లుంటారు. అలాగని కళ్లకు నచ్చినవన్నీ సొంతం అవ్వవు. ‘కన్నులతో చూసేవి గురువా.. కనులకు సొంతమవునా’ అన్నది అందుకే! మనసు లోతుల్లో గూడుకట్టుకున్న ఆ ప్రేమను కొందరు అర్థం చేసుకోలేరు. ‘కన్నుల బాసలు తెలియవులే.. కన్నెల మనసులు ఎరుగములే’ అనీ పాడుకుని బాధను దిగమింగుకోవాల్సి వస్తుంది. కళ్లు పలికించే ఆ సరసం విరిగిపోతే.. చూపులు చురకత్తుల్లాగే ఉంటాయి. ‘కళ్లలోకి కళ్లు పెట్టి చూడవెందుకు.. చెప్పలేని గుండెకోత పోల్చుకుందుకు’ అని మధనపడాల్సి వస్తుంది. కళ్ల సైగలతో మాట్లాడుకునేంత దగ్గరైన ప్రేమ.. రెండు గుండెల్ని తాకిందనుకోవచ్చు. ‘కళ్లు కళ్లు ప్లస్సు.. వాళ్లు వీళ్లు మైనస్‌.. ఒళ్లు ఒళ్లు ఇన్‌ టు.. చేసేటి ఈక్వేషన్‌’లా కథ మొత్తం మారిపోతుంది. అప్పుడా ప్రేమకు హద్దులు ఉండవు. ఎందుకంటే ప్రేమ గుడ్డిది. లేకపోతే.. ప్రియా వారియర్‌ కన్ను కొట్టిన దృశ్యాన్ని.. అందరూ గుడ్డిగా ఎందుకిలా పదే పదే చూస్తున్నారు చెప్పండి?

ముఖం కింది భాగం సులభంగా కదులుతుంది. అంటే.. పెదవులు, బుగ్గలు, నోరు, ముక్కు.. వీటిని అవలీలగా కదిలించి.. భావోద్వేగాలను వ్యక్తపరచవచ్చు. ముఖం పైభాగాన్ని ఇంత సులభంగా కదిలించలేం. కారణం మన మెదడు అడుగు భాగంలోని మోటార్‌ న్యూక్లియర్స్‌. కదలికలకు కేంద్రమైన ఈ నాడీ కణ సముదాయమే.. ముఖకవలికల్ని నియంత్రిస్తుంది. కనురెప్పల్ని పైకెగరేసి కన్నుకొట్టాలంటే.. మనసులో సంకల్పిత చర్య జరిగాకే సాధ్యమవుతుంది. పెదాలతో చిరునవ్వు నవ్వి.. మన ఆనందాన్ని వ్యక్తపరిచినంత సులభంగా.. కన్నుకొట్టలేం.